កំពង់ឆ្នាំងៈ រថយន្តធុនធំ សណ្តោងរ៉ឺម៉កមួយគ្រឿង ខណៈកំពុងបើកសុខៗ ស្រាប់តែដាច់កង់ក្រោយ ហើយបានរេចង្កូតបោលទៅបុករថយន្ត៣គ្រឿងទៀត កំពុងធ្វើដំណើរតាមផ្លូវ បណ្តាលឲ្យរថយន្តខ្លះ គេចធ្លាក់ប្រឡាយ និងរថយន្តខ្លះទៀត រងការខូចខាតស្ទើរទាំងស្រុង។
គ្រោះថ្នាក់ចរាចរណ៍ខាងលើនេះ បានកើតឡើងនៅវេលាម៉ោង១០ព្រឹកថ្ងៃទី២៧ ខែវិច្ឆិកា ឆ្នាំ២០១៨ នៅលើកំណាត់ផ្លូវជាតិលេខ៥ ចន្លោះបង្គោលគីឡូម៉ែត្រលេខ៦៩-៧០ ស្ថិតក្នុងភូមិគោកស្តៅ ឃុំគោកបន្ទាយ ស្រុករលាប្អៀរ ខេត្តកំពង់ឆ្នាំង។
ប្រភពពីប្រជាពលរដ្ឋ ដែលឃើញហេតុការណ៍ បានឲ្យដឹងថា មុនពេលកើតហេតុ ខណៈមេឃកំពុងធ្លាក់ភ្លៀង គេឃើញមានរថយន្តធុនធំមួយគ្រឿង មានសណ្ដងរ៉ឺម៉ក ពណ៌ខៀវលាយស ពាក់ស្លាកលេខ3B -3945 បើកបរក្នុងទិសដៅពីត្បូងទៅជើង លុះមកដល់ចំណុចកើតហេតុខាងលើ បានដាច់កង់ក្រោយខាងឆ្វេង បណ្តាលឲ្យជ្រុលទៅបុករថយន្តផ្សេងៗ៣គ្រឿង បណ្តាលឲ្យរងការខូចខាតស្ទើរទាំងស្រុង តែមិនបណ្តាលឲ្យមានមនុស្សណាម្នាក់ រងរបួស ឬស្លាប់នោះឡើយ។
ក្រោយកើតហេតុអ្នកបើកបររថយន្តបង្ក ត្រូវបានសមត្ថកិច្ចនគរបាលក្រុងកំពង់ឆ្នាំងធ្វើការឃាត់បាន នៅចំណុចខាងមុខវត្តអារញ្ញ សង្កាត់កំពង់ ឆ្នាំងក្រុងកំពង់ឆ្នាំង នាំយកមកកាន់ការិយាល័យនគរបាលចរាចរណ៍ខេត្តកំពង់ឆ្នាំង ដើម្បីកសាងឯកសារចាត់ការតាមនីតិវិធីផងដែរ៕