ភ្នំពេញៈ បុរសជាបុគ្គលិកសហគ្រាសផលិតថ្នាំពេទ្យម្នាក់ ខ្យល់គស្លាប់ក្នុងបន្ទប់តែម្នាក់ឯង យ៉ាងអណោចអធ័ម សូម្បីតែសាច់ញាតិ មិនបានដឹងទៅជួយមិនទាន់ផង ត្រូវបានញាតិស្នាក់នៅជិតខាងប្រទះឃើញ បន្ទាប់ពីមិនបានឃើញជនរងគ្រោះ ងើបចេញទៅធ្វើការងារដូចសព្វដង ហៅគោះទ្វារមិនសូរឆ្លើយ ឡើងអើតមើល ឃើញដេកស្លាប់បាត់ទៅហើយ បង្កឲ្យភ្ញាក់ផ្អើលកាលពីវេលាម៉ោង៧៖១៥នាទីព្រឹក ថ្ងៃទី១៦ ខែវិច្ឆិកា ឆ្នាំ២០១៨ ស្ថិតនៅបន្ទប់ជួលលេខ១៥ ភូមិព្រៃបឹង សង្កាត់កន្ទោក ខណ្ឌពោធិសែនជ័យ រាជធានីភ្នំពេញ។
ជនរងគ្រោះឈ្មោះ អុីវ ណាង ភេទប្រុស អាយុ៣០ឆ្នាំ មុខរបរ បុគ្គលិកសហគ្រាសផលិតឱសថPPM ស្នាក់នៅបន្ទប់ជួលលេខ១៥ ភូមិព្រៃបឹង សង្កាត់កន្ទោក ខណ្ឌពោធិសែនជ័យ មានស្រុកកំណើតភូមិវាលប្រិយ៍ ឃុំចំបក់ ស្រុកបាទី ខេត្តតាកែវ។ មានប្រពន្ធឈ្មោះ ណៃ ស្រីនាង អាយុ៣៣ឆ្នាំ មុខរបរមេផ្ទះ មានកូនចំនួន២នាក់ ប្រុស១នាក់ ស្រី១នាក់ រស់នៅភូមិទ្រា ឃុំសេនារាជឧត្តម ស្រុកព្រះស្តេច ខេត្តព្រៃវែង។
តាមសាច់ញាតិ បានឲ្យដឹងថា ជនរងគ្រោះមកស្នាក់នៅតែម្នាក់ឯងទេ នៅបន្ទប់ជួលចំណុចខាងលើ រីឯប្រពន្ធនៅមើលថែកូនៗនៅឯស្រុកព្រះស្តេច ខេត្តព្រៃវែង រហូតមកដល់ព្រឹកថ្ងៃនេះ ក៏ជួបហេតុការណ៍នេះតែម្តង។
តាមសម្តីបុរសឈ្មោះ សុខ ណាង អាយុ២៥ឆ្នាំ មុខរបរ កម្មកររោងចក្រ ស្នាក់នៅបន្ទប់ជួលក្បែរខាង បានឲ្យដឹងថា ជារៀងរាល់ព្រឹកជនរងគ្រោះតែងតែភ្ញាក់ក្រោកពីដំណេកម៉ោង៦ព្រឹក ហើយចាក់ចម្រៀងតាមធុងបាស មុនរៀបចំខ្លួនទៅធ្វើការងារ តែសម្រាប់ព្រឹកកើតហេតុនេះ មិនឮសូរ ចាក់ចម្រៀង មិនឃើញក្រោកងើប ចេញក្រៅដូចសព្វដង មិនបានចាប់អារម្មណ៍ រហូតដល់វេលាម៉ោង៧ជាងទៅហើយ នៅតែមិនឃើញចញក្រៅ ទើបរួមជាមួយអ្នកជិតខាង៥ទៅ៦នាក់ ងឿងឆ្ងល់ គោះទ្វារហៅ ក៏មិនសូរឆ្លើយ ដាក់ជណ្តើរឡើងអើតមើល ស្រាប់តែប្រទះឃើញដេកស្លាប់ទៅវិញ ទើបនាំគ្នាឆោឡោ ប្រាប់ទៅម្ចាស់ផ្ទះជួលរាយការណ៍ ប្រាប់សមត្ថកិច្ច ចុះមកពិនិត្យមើល និងប្រាប់សាច់ញាតិ មកមើលជាក់ស្តែង រួចសាច់ញាតិ មកគាស់ទ្វារបើកមើល ឃើញពិតជាស្លាប់បាត់ទៅហើយ។
សាកសពជនរងគ្រោះ ក្រោយពីសមត្ថកិច្ចជំនាញពិនិត្យកោសល្យវិច័យរួច ឃើញថា ស្លាប់ដោយជំងឺខ្យល់គ ពុំមានពាក់ព័ន្ធបទល្មើសអ្វីឡើយ រួចប្រគល់ជូនក្រុមគ្រួសារ ចាតចែងដឹកយកទៅធ្វើបុណ្យតាមប្រពៃណី៕
