Tuesday, December 18, 2018

ប៉ូលិសកម្ពុជា តាមចាប់មេក្លោងម្នាក់ និងស្នើឡាវ ធ្វើបត្យាប័នជនសង្ស័យជនជាតិខ្មែរ ឆបោកលុយពលរដ្ឋជាង៦០លានដុល្លារ

អាម៉ាប៉ាប៉ាញ៉ូស
ភ្នំពេញៈ មន្ត្រីនគរបាលជាន់ខ្ពស់កម្ពុជា បានឲ្យដឹងថា នៅដើមខែធ្នូ ឆ្នាំ២០១៨នេះ កម្ពុជា បានដាក់សំណើសុំបត្យាប័នទៅសាធារណរដ្ឋប្រជាធិបតេយ្យប្រជាមានិតឡាវ ដើម្បីបញ្ជូនជនជាប់ចោទជនជាតិខ្មែរម្នាក់ មកផ្តន្ទាទោសនៅក្នុងយុត្តាធិការនៃព្រះរាជាណាចក្រកម្ពុជា តាមដីកាបង្គាប់ឲ្យចាប់ខ្លួន លេខ៤២៧ ដ.ច.ន ចុះថ្ងៃទី១១ ខែកក្កដា ឆ្នាំ២០១៧ របស់សាលាដំបូងរាជធានីភ្នំពេញ។

ជនជាប់ចោទឈ្មោះ ហួត សុវណ្ណ គឺជាមេខ្លោងម្នាក់ នៅក្នុងប្រព័ន្ធឆបោកដ៏ធំដែលមានសមាសភាព មកពី «ក្រុមហ៊ុន EBC» «អង្គការ AIF» និង «សមាគមន៍ ICA»។

ក្រុមហ៊ុន និងអង្គការទាំងនេះ តែងតែដើរឆបោកប្រជាពលរដ្ឋគ្រប់ទីកន្លែង ជាអាទិ៍បានឆបោកប្រជាពលរដ្ឋខ្មែរជាង៧ពាន់នាក់ អស់ទឹកប្រាក់ជាង៦០លានដុល្លារ មកពីខេត្តជាច្រើន នៅកម្ពុជា តាមរយៈការបញ្ចុះបញ្ចូលឲ្យដាក់ប្រាក់វិនិយោគរួម ដោយជនល្មើសសន្យាថា នឹងផ្តល់មកវិញនូវអត្រាចំណេញខ្ពស់។

លោកឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ និងជាប្រធាននាយកដ្ឋានកណ្តាលសន្តិសុខ នៃអគ្គស្នងការដ្ឋាននគរបាលជាតិ ក្រសួងមហាផ្ទៃ នៅថ្ងៃទី១៧ ខែធ្នូ ឆ្នាំ២០១៨នេះ បានឲ្យ​ដឹងថា ថ្នាក់ដឹកនាំក្រសួងមហាផ្ទៃ និងអគ្គស្នងការដ្ឋាននគរបាលជាតិ កំពុងខិតខំប្រឹង ប្រែងអស់ពីសមត្ថភាពជំនាញទាំងផ្លូវច្បាប់ និងការទូតដើម្បីនាំយកជន ជាប់ចោទពីប្រទេសឡាវ និងដើម្បីរកយុត្តិធម៌ជូនប្រជាពលរដ្ឋស្លូតត្រង់។

លោក​ឧត្តមសេនីយ៍ឯក បន្តថា «សមត្ថកិច្ចជំនាញកំពុង បន្តស្រាវជ្រាវ និងស៊ើបអង្កេតស៊ីជម្រៅបន្ថែមទៀត ដើម្បីវែកមុខ និងនាំយកមេខ្លោងធំៗ និងដៃជើងរបស់ក្រុមនេះមកផ្តន្ទាទោសតាមច្បាប់ ឲ្យខាងតែបាន ទោះជាត្រូវចំណាយពេលវេលាប៉ុណ្ណាក៏ដោយ»

មន្ត្រីជាន់ខ្ពស់កម្ពុជា ក៏បានបញ្ជាក់ថ្ងៃនេះផងដែរថា កម្ពុជាកំពុងជំរុញដំណើរការកិច្ចនីតិវិធី បត្យាប័នជាមួយសាធារណរដ្ឋប្រជាមានិតប្រជាធិបតេយ្យឡាវ ក្នុងស្មារតីអ្នកជិតខាងល្អ។

សូមបញ្ជាក់ថា សាធារណរដ្ឋប្រជាមានិតឡាវ និងព្រះរាជាណាចក្រកម្ពុជា បានចុះហត្ថលេខា លើសន្ធិសញ្ញាបត្យាប័ន ក្នុងឆ្នាំ១៩៩៩ ដែលសន្ធិសញ្ញានេះចូលជាធរមានឆ្នាំ២០០៥។

ទន្ទឹមគ្នានេះ ដែរក្នុងក្របខ័ណ្ឌប្រទេសអាស៊ានទាំង១០ ក៏មានសន្ធិសញ្ញាស្តីពីជំនួយផ្នែកច្បាប់ទៅវិញទៅមកក្នុងរឿងព្រហ្មទណ្ឌផងដែរ៕

@Amapapa.News

Feature Ads