កំពង់ចាមៈ គណៈកម្មការអាចារ្យវត្តជ្រោយថ្មរ ខេត្តកំពង់ចាម នាពេលថ្មីៗនេះ បានសម្តែងការព្រួយបារម្ភ ចំពោះបច្ច័យរបស់សម្តេចកិត្តិព្រឹត្តបណ្ឌិត ប៊ុន រ៉ានី ហ៊ុន សែន ដែលបានប្រគេនមកឲ្យអតីតព្រះមេគុណខេត្តកំពង់ចាម និងជាចៅអធិការវត្តជ្រោយថ្ម លោក អន ធាងអាន ដើម្បីទុកកសាងសាលាបាលី ក្នុងវត្តជ្រោយថ្ម។ ការព្រួយបារម្ភរបស់តាអាចារ្យគណៈកម្មការវត្តជ្រោយថ្មនេះ គឺកើតឡើងបន្ទាប់ពីអតីតព្រះមេគុណខេត្តកំពង់ចាម និងជាចៅអធិការវត្តជ្រោយថ្ម បានលាចាកសិក្ខាបទជាង១ខែនេះ ហើយនឹងរៀបចំមង្គលការនៅថ្ងៃទី១៧ ខែធ្នូ ឆ្នាំ២០១៨។
ប្រភពពីអាចារ្យវត្តជ្រោយថ្ម បានឲ្យដឹងថា កាលពីល្ងាចថ្ងៃទី២ ខែសីហា ឆ្នាំ២០១៨ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានអញ្ជើញបូជាទៀនធូប ផ្កាភ្ញី ថ្វាយព្រះ និងនាំយកទេយ្យវត្ថុជាច្រើន ទៅប្រគេនព្រះសង្ឃ ដែលគង់ចាំព្រះវស្សានៅវត្តទុស្សនារាម (ហៅវត្តជ្រោយថ្ម) និងវត្តខេមវ័ន បឹងស្នាយ ដែលស្ថិតនៅក្រុងកំពង់ចាម ខេត្តកំពង់ចាម។ ជាមួយគ្នានោះ សម្តេចកិត្តិព្រឹទ្ធបណ្ឌិត បានប្រគេនថវិកាចំនួន៥ម៉ឺនដុល្លារផងដែរទុកឲ្យលោក អន ធាងអាន អតីតព្រះមេគុណខេត្ត និងជាចៅអធិការវត្តជាអ្នកកាន់កាប់ ដើម្បីកសាងសាលាបាលី។ ប៉ុន្តែនៅពេលដែលលោក អន ធាងអាន បានលាចាកសិក្ខាបទរយៈពេលជាងមួយខែ ខាងគណៈកម្មការអាចារ្យវត្ត មិនបានទទួលព័ត៌មានជាក់លាក់អំពីថវិកានោះទេ។ ដោយមិនដឹងថា តើអតីតមេគុណខេត្ត អន ធាងអាន យកថវិកានោះចាត់ចែងទៅលើអ្វី និងទុកនៅឯណានោះទេ ដែលប្រការនេះ ធ្វើអោយកើតមានមន្ទិលសង្ស័យនោះ ។
បើតាម លោកតាអាចារ្យដដែលថា ដោយឡែកនៅមានថវិកាចំនួនជាង១ម៉ឺនដុល្លារផ្សេងទៀតដែលបានមកពីសប្បុរសជនចូលបច្ច័យទុកទិញដី ជាប្រយោជន៍វត្ត ហើយថវិកានេះ ក៏លោក អន ធាងអាន ជាអ្នកកាន់កាប់ដែរ ហើយលុយនោះ មិនទាន់បានចាត់ចែងក្នុងការទិញដីនោះទេ។
ទាក់ទិនទៅក្តីកង្វល់របស់អាចារ្យវត្តជ្រោយថ្មនោះ អតីតព្រះមេគុណខេត្តកំពង់ចាម និងជាចៅអធិការវត្តជ្រោយថ្មលោក អន ធាងអាន បានបំភ្លឺថា លុយចំនួន៥ម៉ឺនដុល្លារ ដែលសម្តេចកិត្តិព្រឹទ្ធបណ្ឌិតបានប្រគេន គឺលោកបានផ្ញើនៅក្នុងធនាគារមិនទាន់បានចាត់ចែងសាងសង់អ្វីទេ។ ដោយឡែកចំពោះថវិកាជាង១ម៉ឺនដុល្លារទៀត លោកបានយកទៅជួយកសាងសាលាបាលី នៅភូមិទួលបី ក្នុងស្រុកកងមាស ដែលជាស្រុកកំណើតរបស់លោក ហើយថវិកានេះ លោកសន្យា និងសងមកវត្តជ្រោយថ្មវិញ ប៉ុន្តែគ្មានថ្ងៃកំណត់នោះទេ។
ដោយមានពាក្យចរចាមអារាមថា ការលាចាកសិក្ខាបទរបស់លោក អន ធាងអាន អាចមានការបង្ខិតបង្ខំ ក្នុងរឿងស្នេហាពីព្រោះវាជាការកម្រ ដែលមានព្រះសង្ឃឋានៈជាព្រះមេគុណខេត្ត និងជាចៅអធិការវត្តផងនោះ លាចាកសិក្ខាបទដូច្នេះ។ ប៉ុន្តែយ៉ាងណាក៏ដោយ ចំពោះរឿងរ៉ាវស្នេហា លោក អន ធាងអាន បានបំភ្លឺថា បានកើតឡើងក្រោយពីលោកបានសឹក ហើយមង្គលការនេះ គឺគ្មានការបង្ខិតបង្ខំពីភាគីណាមួយនោះទេ។ លោកថា ប្រការដែលលោក លាចាកសិក្ខាបទនេះ មូលហេតុមកពីអស់និស្ស័យ និងមានជំងឺប្រចាំកាយ មិនអាចអត់អាហារល្ងាចបាន។ ហើយក្រោយពីសឹក ម្តាយរបស់លោក បានស្តីដណ្តឹងប្រពន្ធឲ្យតែម្តងទៅ ដែលនិងត្រូវចូលរោងការនៅថ្ងៃទី១៧ ខែធ្នូ ឆ្នាំ២០១៨ ខាងមុខនេះ៕
