មណ្ឌលគិរីៈ រថយន្តដឹកឈើរបស់មន្ត្រីអាវុធហត្ថលើផ្ទៃប្រទេសម្នាក់ ត្រូវបានសមត្ថកិច្ចឃាត់បានមួយចំអិនកំពិស ក៏ដោះលែងវិញបាត់ស្រមោល ក្រោយពីមានការអន្តរាគមន៍ ដល់ខណ្ឌរដ្ឋបាលព្រៃឈើ។
ករណីនេះ បានកើតឡើងនៅព្រឹកថ្ងៃទី១៤ ខែធ្នូ ឆ្នាំ២០១៨ នេះ នៅចំណុចភូមិឆ្នែង ឃុំស្រែខ្ទុម ស្រុកកែវសីមា ខេត្តមណ្ឌលគិរី។
តាមប្រភពព័ត៌មាន បានឲ្យដឹងថា រថយន្តសាំងយ៉ុងខាងលើ បានដឹកឈើប្រភេទប្រណីតពេញប្រៀប ចេញពីទីរួមខេត្តមណ្ឌលគិរី មកដល់ចំណុចខាងលើ ត្រូវបានមន្ត្រីរដ្ឋបាលព្រៃឈើ ឃាត់ធ្វើការត្រួតពិនិត្យ ហើយបន្ទាប់ពីសួរនាំ អ្នកបើកបររថយន្តដឹកឈើ បានប្រាប់ថា ឈើ ដែលខ្លួនដឹកនេះ ជារបស់មន្ត្រីអាវុធហត្ថលើផ្ទៃប្រទេសម្នាក់ ពាក់ផ្កាយ២ ឈ្មោះ ធឿន។
ប្រភព បានបន្តទៀតថា ក្រោយពីសួរនាំអ្នកបើកបររថយន្តរួច ក៏មានការអន្តរាគមន៍ខ្វាត់ខ្វែង មួយសន្ទុះ ក្រោយមកក៏សមត្ថកិច្ចដោះលែងបាត់ស្រមោល។
ដោយឡែកនាយខណ្ឌរដ្ឋបាលព្រៃឈើ ខេត្តមណ្ឌលគិរី បានឲ្យដឹងថា កំពុងឲ្យមន្ត្រីជំនាញនាំយករថយន្តដឹកឈើទៅរក្សាទុកនៅកន្លែង។ ប៉ុន្តែជាក់ស្ដែង រថយន្តដឹកឈើខាងលើនេះ ត្រូវបានដោះលែងបាត់ទៅហើយ ។ នេះបើតាមការអះអាងរបស់មន្ត្រីតូចតាចនៅមូលដ្ឋាន៕
