ខេត្តបន្ទាយមានជ័យ៖ ស្រូវប្រហែលជា២ហិកតា ត្រូវបានអគ្គីភ័យឆាបឆេះ បង្កឲ្យមានការភ្ញាក់ផ្អើល នៅថ្ងៃទី១៦ ខែធ្នូ ឆ្នាំ២០១៨ វេលាម៉ោង១២និង៣០នាទីថ្ងៃត្រង់ នៅចំណុចខាងត្បូងផ្លូវរថភ្លើង១០ ២០០ម៉ែត្រ ស្ថិតក្នុងភូមិណាកាឆាយ ឃុំកូប ស្រុកអូរជ្រៅ ខេត្តបន្ទាយមានជ័យ។
នៅក្នុងហេតុការណ៍នោះដែរ កងកម្លាំងនគរបាលស្រុកអូរជ្រៅ ដឹកនាំដោយលោកវរសេនីយ៍ត្រី អ៊ឹម សារ៉ាត់ អធិការរងទទួលសេនាធិការដ្ឋាន និងលោកអនុសេនីយ៍ឯក រី សារ៉េត អធិការរងទទួលកិច្ចការប៉ុស្តិ៍បានដឹកនាំកម្លាំងជំនាញ និងកម្លាំងប៉ុស្តិ៍រដ្ឋបាលកូប និងកម្លាំងប្រជាការពាររួមជាមួយប្រជាពលរដ្ឋ ចុះជួយធ្វើអន្តរាគមន៍ពន្លត់។
តាមការឲ្យដឹងពីលោកវរសេនីយ៍ទោ សែស វិបុល អធិការនគរបាលស្រុកអូរជ្រៅ បានឲ្យដឹងថា៖ ប្រជាពលរដ្ឋដែលរងនូវការខូចខាតស្រូវ ដោយសារអគ្គីភ័យនេះ មានចំនួន៤នាក់ ១/.ឈ្មោះ លឹម យ៉ៃ ភេទស្រី អាយុ៦៦ឆ្នាំ រស់នៅភូមិខៃដន ឃុំកូប ស្រុកអូរជ្រៅ ខេត្តបន្ទាយមានជ័យ (ឆេះអស់ចំនួន ៣រ៉ៃ ),២/.ឈ្មោះ សើន សុភ័ក្រ្ត ភេទប្រុស អាយុ៣៤ឆ្នាំ រស់នៅភូមិអូរជ្រៅ ឃុំកូប ស្រុកអូរជ្រៅ បន្ទាយមានជ័យ (ឆេះអស់៣រ៉ៃ),៣/.ឈ្មោះ ខឿន រ៉ាឌី ភេទប្រុស អាយុ២៦ឆ្នាំ រស់នៅភូមិអូរជ្រៅ ឃុំកូប (ឆេះអស់៣រ៉ៃ),៤/.ឈ្មោះ ឆែម រី ភេទប្រុស អាយុ៣៦ឆ្នាំ រស់នៅភូមិអូរជ្រៅ ឃុំកូប (ឆេះអស់ ៣ រ៉ៃ) សរុបទាំងអស់ប្រហែល ២ ហិតា (៤ម្ចាស់)។
លោកអធិការ បានបញ្ជាក់ថា៖ ក្រោយពីកើតហេតុ ឆ្លងតាមការសាកសួរព័ត៌មាន គឺមុនពេលកើតហេតុក្រុមក្មេងឃ្វាលគោ បានដុតនាំគ្នាដុតខ្យង និងត្រី ហើយពន្លត់មិនអស់ បណ្តាលអោយរាលឆេះស្រូវតែម្តង។ជាមួយគ្នានោះដែរ លោកអធិការបានផ្តាំផ្ញេីដល់ប្រជាពលរដ្ឋ ត្រូវតែណែនាំកូនចៅ កុំឲ្យមានការដុតភ្លើងនៅវាលស្រែ នាំឲ្យមានភ្លើងឆាបឆេះ បង្កឲ្យខូចខាតទ្រព្យសម្បត្តិរបស់អ្នកដទៃ ព្រោះរដូវនេះ គឺជារដូវក្តៅហួតហែង វាងាយនឹងបង្កឲ្យកើតមានអគ្គីភ័យ៕