ភ្នំពេញៈ ដោយសារការអាក់ខានក្នុងការប្រមូល និងដឹកជញ្ជូនសំរាមរបស់ក្រុមហ៊ុនស៊ីនទ្រី នៅថ្ងៃទី២៦ ធ្នូនេះ លោក សុខ ពេញវុធ អភិបាលនៃគណៈអភិបាលខណ្ឌដូនពេញ បានចាត់ឲ្យកម្លាំងប្រជាការពារខណ្ឌគ្រប់គោលដៅ បញ្ចេញម៉ូតូកង់បី និងរថយន្ត ក្នុងនោះមាន៖ រថយន្តសាលាខណ្ឌ ៥គ្រឿង ម៉ូតូកង់បី៤គ្រឿង គ្រឿងចក្រ១គ្រឿង និងជួលរថយន្តបន្ថែមចំនួន ៤គ្រឿងទៀត ដើម្បីប្រមូល ដឹកជញ្ជូន និងសម្អាតទីតាំងដេប៉ូសំរាម គ្រប់ទីកន្លែងក្នុងមូលដ្ឋានខណ្ឌដូនពេញ ឲ្យធានាបាននូវសណ្តាប់ធ្នាប់សាធារណៈ អនាម័យបរិស្ថាន និងសោភ័ណភាពទីក្រុង។
សូមរំឭកថា កម្មករប្រមូលសំរាមរបស់ក្រុមហ៊ុន ស៊ីនទ្រី ប្រមាណជាង២ពាន់នាក់ បានប្រមូលផ្ដុំគ្នាធ្វើកូដកម្ម នៅការ៉ាសរថយន្តស៊ីនទ្រី ផ្លូវបេតុបឹងតាម៉ាត ភូមិម័ល សង្កាត់ដង្កោ ខណ្ឌដង្កោ ដោយបាននាំគ្នាតវ៉ា អត់ធ្វើការ ដោយទាមទារឲ្យក្រុមហ៊ុន ដំឡើងប្រាក់ខែឲ្យពួកគេ ចំនួន១២ដុល្លារបន្ថែម លើប្រាក់ខែគោល ដោយទាមទារលក្ខខណ្ឌ ចំនួន៤ចំណុច ដូចជា ៖ ១-សុំឲ្យក្រុមហ៊ុនទូទាត់ប្រាក់ឈប់សំរាកប្រចាំឆ្នាំដែលនៅសល់ ។ ២-ទូរទាត់ប្រាក់បំណាច់អតីតភាពការងារតាមប្រកាសលេខ ៤៤៣ ក.ប.ប្រ.ក.ខល។ ៣-ស្នើសុំដំឡើងប្រាក់ឈ្នួលប្រចាំឆ្នាំ ចំនួន១៥$ សម្រាប់ឆ្នាំ២០១៩ ។ ៤-បញ្ហាផ្សេងៗ ។
កូដកម្មនេះ ដឹកនាំដោយសហជីពកម្មករ និយោជិក វិស័យទេសចរណ៍ ដែលដឹកនាំដោយលោក ទូច កុសល ហើយក្នុងការតវ៉ានេះ កម្មករស៊ីនទ្រី បានប្រាប់ឲ្យភ្នាក់ងារ Cam Post (ខេមប៉ុស្តិ៍) ដឹងថា ប្រាក់ខែពួកគាត់ បានចែកជា២វេន គឺវេនយប់ និងថ្ងៃ ដោយអ្នកធ្វើការវេនថ្ងៃទទួលបានប្រាក់ខែចំនួន៥១ម៉ឺន និងអ្នកធ្វើការវេនយប់ទទួលបានប្រាប់ខែ៦១ម៉ឺន ហើយពួកគាត់មាននាំគ្នាធ្វើការតវ៉ានេះ ដោយពួកគាត់ទាមទារ ឲ្យខាងក្រុមហ៊ុន ដំឡើងប្រាក់ខែចំនួន១២ដុល្លារ លើប្រាក់ខែគោលពួកគាត់បន្ថែមទៀត ព្រមទាំងឲ្យក្រុមហ៊ុន ផ្តល់សេវាថែមទាំងសុភាព នឹងមានប្រាក់បំណាច់ឆ្នាំ និងហូបចុកដូច កម្មករ កម្មការិនី រោងចក្រដែរ ។
ជាលទ្ធផលក្នុងការដោះស្រាយ ភាគីក្រុមហ៊ុនក្រុមហ៊ុនស៊ិនទ្រី ព្រមព្រៀងចំនួន ០៣ចំណុចគឺទី(១.២.៤) ចំពោះចំណុចទី៣ ដែលកម្មករស្នើសុំដំឡើងប្រាក់ឈ្នួលប្រចាំឆ្នាំ១៥$បន្ថែម ពីលើប្រាក់ខែបច្ចុប្បន្ន គឺខាងក្រុមហ៊ុនឲ្យតែ០៦$ប៉ុណ្ណោះ និងដំឡើងឲ្យ០១$ទៀត នៅខែ០៧ ឆ្នាំ២០១៩ តែខាងកម្មករមិនព្រមទទួលយកដំណោះស្រាយនេះទេ តែបញ្ចុះនៅត្រឹម១២$។
ក្នុងហេតុការណ៍នេះដែរ ក៏មានការប៉ះទង្គិចគ្នា រវាងកម្មករស៊ីនទ្រីគ្នាឯង និងកម្មករគ្នាឯង ដោយមានអ្នកខ្លះចង់បានប្រាក់ខែប៉ុណ្ណឹង ហើយអ្នកខ្លះទៀត ទាមទារដំឡើងប្រាក់ខែ ។
ដោយឡែកខាងក្រុមហ៊ុនវិញ ក៏បានហៅតំណាងខាងកម្មករឲ្យចូលចរចារគ្នា តែខាងក្រុមហ៊ុនឡើងឲ្យដែរ តែតម្លៃទាបពេក គឺត្រឹមតែ៦ដុល្លារ ទើបពួកគាត់ជាកម្មករទទួលយកមិនបាន គឺទាមទារ ១២ដុល្លារ ទើបព្រមចូលធ្វើការវិញ ដូច្នេះហើយបើសិនជាការចរចាមិនត្រូវគ្នាទេ ខាងកម្មករមិនព្រមចេញទៅប្រមូលសំរាមវិញឡើយ៕
