រដ្ឋបាលខេត្តកែបនឹងរៀបចំព្រឹត្តិការណ៍ឆ្លងឆ្នាំសាកល និងខួបលើកទី៤០ នៃទិវាបុណ្យជាតិជ័យជម្នះ៧ មករា នៅថ្ងៃទី៣០-៣១ ខែឆ្នូ ឆ្នាំ២០១៨ នៅខេត្តកែប ក្នុងព្រឹត្តិការណ៍នេះដែរក៏មានការបាញ់កាំជ្រួចជាច្រើនគ្រាប់ អុំទូកផ្កាចារសមុទ្រ បង្ហើរខ្លែង បង្ហោះគោម និងប្រគំតន្ត្រី។ នេះបើយោងតាមសេចក្តីព្រាងកម្មវិធីរបស់រដ្ឋបាលខេត្តកែប។
ដើម្បីឱ្យព្រឹត្តការណ៍នេះមានភាពឱឡារិក អ៊ូរអរ និងសប្បាយរីករាយ រដ្ឋបាលខេត្តកែបបានសរសេរលិខិតមួយ ដើម្បីសំណូមពរឱ្យម្ចាស់សណ្ឋាគារ ម្ចាស់ផ្ទះសំណាក់ ម្ចាស់រមណីយដ្ឋាន អាជីករ និងក្រុមហ៊ុនឯកជន ចូលរួមផ្តល់ជាថវិកា និងសម្ភារផ្សេងៗឱ្យបានគ្រប់ៗគ្នា។
លោក ទឹម វុទ្ធី បញ្ជាក់ថា៖ បច្ចុប្បន្នខេត្តកែប កំពុងតែមានឥទ្ធិពលដែលទាក់ទាញភ្ញៀវទេសចរច្រើន ដោយសារកំណើនភ្ញៀវទេសចរច្រើនដូច្នេះ ខេត្តកែបនឹងរៀបចំកម្មវិធីសប្បាយៗដែលទាញយកភ្ញៀវទេសចរឱ្យកាន់តែច្រើនបន្ថែមទៀត។
លោក ទឹម វុទ្ធី នាយករដ្ឋបាលខេត្តកែប បានស្នើឱ្យប្រជាពលរដ្ឋ ភ្ញៀវទេសចរជាតិ-អន្តរជាតិ ម្ចាស់រមណីយដ្ឋាន ម្ចាស់ក្រុមហ៊ុន ម្ចាស់ផ្ទះសំណាក់ ឬអាជីករផ្សេងៗ រួមគ្នារៀបចំសណ្តាប់ធ្នាប់តាមភូមិឋាន តាមទីសាធារណៈ ឬតាមរមណីយដ្ឋាននានា រក្សាអនាម័យ ដើម្បីឱ្យបរិសា្ថនល្អស្អាត និងមានរបៀបរៀបរយផងដែរ។
បើតាមគម្រោងឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម និងលោកជំទាវ នឹងអញ្ជើញជាអធិបតីភាពដ៏ខ្ពង់ខ្ពស់ក្នុងពិធីប្រណាំងទូកផ្កាចារសមុទ្រផងដែរ។
