បន្ទាយមានជ័យៈ រថយន្តចង្កូតស្តាំពាក់ស្លាកលេខនគរបាលមួយគ្រឿង ក្នុងចំណោមរថយន្តស្លាកលេខនគរបាល និងស្លាកលេខខេមរភូមិន្ទរាប់រយគ្រឿង ដែលកំពុងចរាចរក្នុងខេត្ត ត្រូវបានមន្ត្រីគយរដ្ឋាករខេត្តស្ទាក់ចាប់ ខណៈកំពុងបើកបរក្បែរបន្ទាត់ព្រំដែនកម្ពុជា-ថៃ។ ការស្ទាក់ចាប់ពីសំណាក់ក្រុមមន្ត្រីគយនេះ ធ្វើឡើងកាលពីម៉ោង១២និង៣០នាទី ថ្ងៃទី១៦ ខែធ្នូ ឆ្នាំ២០១៨ នៅចំណុចប៉ុស្តិ៍ដើមចាន់គីរី ស្ថិតក្នុងភូមិចាន់គីរីសង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
សេចក្តីរាយការណ៍ បានឲ្យដឹងថា រថយន្តដែលត្រូវមន្ត្រីគយក្រុងប៉ោយប៉ែតស្ទាក់ចាប់ខាងលើ ជារថយន្តចង្កូតស្តាំគ្មានពន្ធ សេរីទំនើបធុន២កិប ម៉ាកហ្វតរេងជឺ (Ford ranger)ពណ៌ស ពាក់ស្លាកលេខ នគរបាល 2-6088 ដែលគេដឹងថា ជារបស់មន្ត្រីនគរបាលមួយរូប ដែលមានតួនាទីជាមេប៉ុស្តិ៍សង្កាត់ប៉ោយប៉ែត។ រថយន្តទំនើបនេះ ក៏បានបញ្ជូនបន្តមកសាខាគយនិងរដ្ឋាករខេត្ត ដើម្បីចាត់ការបន្តនៅព្រឹកថ្ងៃទី១៧ ខែធ្នូ ឆ្នាំ២០១៨។
ជួបជាមួយអ្នកកព័ត៌មាន លោក ឆែ សុធា ប្រធានសាខាគយនិងរដ្ឋាករខេត្តបន្ទាយមានជ័យ បានដឹងថា រថយន្តខាងលើ ជារថយន្តចង្កូតស្តាំគ្មានពន្ធ ហើយពាក់ស្លាកលេខក្លែងបន្លំ ត្រូវបានឈ្មួញខិលខូចលួចនាំចូលពីប្រទេសថៃ ដោយល្មើសច្បាប់មកកម្ពុជា ហើយបញ្ហាបទល្មើសឈ្មួញនាំចូលរថយន្តចង្កូតស្តាំគ្មានពន្ធដោយល្មើសច្បាប់នេះ រាជរដ្ឋាភិបាលបានហាមឃាត់រួចមកហើយថា "គ្មានទេវប្បធម៌អន្តរាគមន៍ដោះលែង"។
ជាមួយនិងការឃាត់រថយន្តចង្កូតស្តាំគ្មានពន្ធ និងល្មើសច្បាប់នេះ ប្រជាពលរដ្ឋ បានសម្តែងការសាទរ និងគាំទ្រចំពោះមន្ត្រីគយ និងរដ្ឋាករ ហើយក៏បានសំណូមពរសុំឲ្យមន្ត្រីជំនាញនិងស្ថាប័នពាក់ព័ន្ធបន្តទប់ស្កាត់ បង្ក្រាបគ្រប់បទល្មើស នៅដើមទីជាពិសេសតាមបន្ទាត់ព្រំដែនកម្ពុជាថៃដែលឈ្មួញខិលខូចលួចនាំចូល មិនគួរមកបង្ក្រាបកណ្តាលក្រុងនោះទេ។ មួយវិញទៀតប្រជាពលរដ្ឋដែលមានលុយបន្តិចបន្តួចឃើញគេជិះរថយន្តចង្កូតស្តាំបាន ពិសេសអស់លោកសមត្ថកិច្ចពួកគាត់ទិញជិះដឹកប្រពន្ធកូនដើរលំហែរគ្រប់គ្នាបានរលូន ពួកគាត់ក៏ចង់ទិញជិះដែរ តែជាទូទៅពុំមានវាសនាល្អប៉ុន្មានទេ បើមិនជាប់គុក ក៏គេរឹបអូសយករថយន្តដែរ ដែលប្រការនេះធ្វើអោយពួកគាត់ខាតបង់ទ្រពសម្បត្តិ និងរងភាពអយុត្តិធម៌ពីសំណាក់អ្នកអនុវត្តន៍ច្បាប់។
សូមបញ្ជាក់ថា ទោះបីជាមានការបង្ក្រាបពីសំណាក់សមត្ថកិច្ចជំនាញគយ និងសមត្ថកិច្ចពាក់ពន្ធ័ជាបន្តបន្ទាប់ក៏ដោយក៏គេឃើញថា រថយន្តចង្កូតស្តាំនៅតែបន្តហូរចូលពីតាមច្រករបៀងព្រំដែនច្រើន តែសមត្ថកិច្ចហាក់ទប់ស្កាត់បានតិចតួច៕
