សៀមរាបៈ លោកវរសេនីយ៍ឯក ណុប សារ៉ាត់ អធិការនគបាលស្រុកសូទ្រនិគម ខេត្តសៀមរាប កាលពីថ្ងៃទី២៧ ខែធ្នូ ឆ្នាំ២០១៨ បានចេញលិខិតបំភ្លឺ និងច្រានចោល ជុំវិញករណីស្រ្តីម្នាក់ ចោទលោកថា ជាអ្នកនៅពីក្រោយរឿងឃាតកម្ម។ លោកថា ការផ្សព្វផ្សាយព័ត៌មាន នេះ ជាព័ត៌មានមិនពិត និងបំប៉ោព័ត៌មាន ញ៉ុះញ៉ុងធ្វើឲ្យមានការយល់ច្រឡំ ថែមទាំងធ្វើឲ្យប៉ះពាល់ដល់កិត្តិយមន្ត្រីយុត្តិធម៌ ក្នុងមូលដ្ឋាន ដែលកំពុងអនុវត្តច្បាប់។
ការចេញលិខិតបំភ្លឺរបស់លោកអធិការនេះ ក្រោយពីស្ត្រីម្នាក់ឈ្មោះ ឈុំ ស្រីមុំ ហៅង៉ិក និងកូនស្រីម្នាក់ ឈ្មោះ តាន់ សុវណ្ណលីដា រស់នៅភូមិគោកមន ឃុំដំដែក ស្រុកសូទ្រនិគម ខេត្តសៀមរាប បានធ្វើការឡាយវីដេអូតាមរយៈផេកសារព័ត៌មាន “សៀមរាបថ្មី” កាលពីថ្ងៃទី២៥ ខែធ្នូ ឆ្នាំ២០១៨ ដោយចោទប្រកាន់មកលើលោកអធិការថា ជាមនុស្សនៅពីក្រោយខ្នងឃាតកម្ម ក្នុងករណីឃាតកម្មលើកូនរបស់អ្នកស្រី។
ក្នុងរឿងនេះលោក ណុប សារ៉ាត់ អធិការនគរបាលស្រុកសូទ្រនិគម បានផ្តល់បទសម្ភាសន៍តាមទូរស័ព្ទជាមួយភ្នាក់ងារ CAM POST ថា លោកស្នើសុំឲ្យអ្នកស្រី និងកូន ជាពិសេសសារព័ត៌មានខាងលើ ដែលបានធ្វើការឡាយផ្ទាល់តាមផេករបស់ខ្លួននោះ សុំឲ្យធ្វើការបកស្រាយសាជាថ្មី បើមិនអ៊ីចឹងទេ លោកនឹងប្រមូលឯកសារត្រៀមដាក់ពាក្យបណ្តឹងបញ្ជូនទៅតុលាការ ពីបទបង្ខូចមួលបង្កាច់កិត្តិយលមន្ត្រីយុត្តិធម៌ នឹងញ៉ុះញុង់បំប៉ោព័ត៌មានមិនពិត ធ្វើឲ្យប៉ះពាល់ដល់សង្គម។
លោកអធិការ បានបញ្ជាក់បន្ថែមថា ក្នុងករណីហ្នឹង គឺមានការចូលរួមពិនិត្យលើករណីឃាកម្មរបស់កូនអ្នកស្រី មានទាំងមន្ត្រីជំនាញមកពីខាងស្នងការនគបាលខេត្ត ចុះមកពិនិត្យជុំវិញករណីកូនអ្នកស្រីផងដែរ៕
