header ads

Sponsor

អាម៉ាប៉ាប៉ាញ៉ូស

ភ្នំពេញៈ ឧបទ្ទវហេតុ​គ្រោះថ្នាក់ចរាចរណ៍មួយបានកើតមានឡើង​ ដោយជនជាតិចិន២នាក់ ស្រវឹងស្រា​ បើករថយន្ត TACOMA មួយគ្រឿង​ បោះពួយល្បឿនលឿន មកដល់ផ្លូវបែកជាបួន បើកបត់ឆ្វេងដើម្បីឆ្លងផ្លូវ តែខ្វះការប្រុងប្រយត្ន័​ បានចូលទៅគន្លងចរាចរណ៍ម្ខាងទៀត ទើបត្រូវរថយន្ត THUNDRA ដែលបើកបត់ស្ដាំចេញមក​ពន្លះគ្នាពន្លះគ្នាលាន់ដូចរន្ទះ ខ្ទេចទាំង២គ្រឿង​កណ្ដាលផ្លូវតែម្ដង​ ស្របពេលដែលនារីម្នាក់​កំពុងបើករថយន្ត​ Prius មកពីក្រោយជាន់​ហ្វ្រាំងមិនទាន់​ ក៏ជ្រុលទៅបុកបន្តរថយន្ត TACOMA ចំខាងស្ដាំចំហៀងក្រោយ បណ្ដាលឲ្យរថយន្ត​ Prius អូសខ្ទេចអស់មួយចំហៀងខាងឆ្វេងយ៉ាងដំណំតែម្ដង ។

ហេតុការណ៍គ្រោះថ្នាក់ចរាចរណ៍ខាងលើនេះ បង្កការភ្ញាក់ផ្អើលយ៉ាងខ្លាំង​ កាលពីវេលាម៉ោង១០:៥០នាទីយប់ ថ្ងៃសៅរ៍​ ទី០៨ ខែធ្នូ​ ឆ្នាំ២០១៨ ស្ថិតនៅលើមហាវិថី​សម្ដេចតេជោ (ផ្លូវ៦០ម៉ែត្រ) កែងផ្លូវ៣០ម៉ែត្រ ទល់មុខក្រុមហ៊ុនលក់រថយន្ត Mercedes ភូមិទួលរកា សង្កាត់ចាក់អង្រែក្រោម​ ខណ្ឌមានជ័យ​ រាជធានីភ្នំពេញ​ ។

ភាគីរថយន្ត​ម្ចាស់រថយន្តទាំងបីគ្រឿងមិនបាន ប្រាប់ឲ្យអ្នកយកព័ត៌មានបានដឹងពីអត្ថសញ្ញាណនោះទេ ។

តាមប្រភពនៅកន្លែងកើតហេតុបានឲ្យភ្នាក់ងារខេមប៉ុស្តិ៍ ដឹងថា នៅមុនកើតហេតុ​ គេឃើញបុរសជនជាតិចិន២នាក់ ទំនងជាស្រវឹងស្រា​ បានបើករថយន្តបង្កម៉ាក TOYOTA TACOMA ពណ៌ស ពាក់ស្លាកលេខភ្នំពេញ​ 2AW-4421 ធ្វើដំណើរតាមបណ្តោយមហាវិថី​សម្ដេចតេជោ​(ផ្លូវ៦០ម៉ែត្រ) ទិសដៅពីជើងមកត្បូង ក្នុងល្បឿនលឿន លុះដល់ចំណុចកើតខាងលើ ដែលជាផ្លូវបែកជាបួន បានបត់ឆ្វេងដើម្បីឆ្លងផ្លូវ តែខ្វះការប្រុងប្រយត្ន័​ បានចូលទៅគន្លងចរាចរណ៍ចំណែកផ្លូវម្ខាងទៀត ទើបត្រូវរថយន្តមួយគ្រឿង ម៉ាក THUNDRA ពណ៍ស​ ពាក់ស្លាកលេខភ្នំពេញ​ 2AO-5756 ធ្វើដំណើរតាមបណ្តោយផ្លូវ៣០ម៉ែត្រ ទិសដៅពីកើតទៅលិច ដោយបត់ស្ដាំចេញមក​ក្នុងល្បឿនលឿន​គួរសមដែរ ទើបធ្វើឲ្យរថយន្តទាំងពីរគ្រឿងពន្លះគ្នាពេញទំហឹងលាន់ដូចរន្ទះ បណ្ដាលរថយន្តរងការខូចខាតខ្ទេចទាំង២គ្រឿង​នៅពាក់កណ្ដាលផ្លូវតែម្ដង​ ស្របពេលដែលនារីម្នាក់​កំពុងបើករថយន្ត​ Prius ពាក់ស្លាកលេខភ្នំពេញ​ 2T-3763 ធ្វើដំណើរតាមបណ្តោយមហាវិថី​សម្ដេចតេជោ​ទិសដៅពីជើងមកត្បូង​មកពីក្រោយ បាន​វ៉ាក់អឺ​ជាន់​ហ្វ្រាំងមិនទាន់​ ក៏ជ្រុលទៅបុកបន្តពីក្រោយរថយន្ត TACOMA ចំខាងស្ដាំចំហៀងក្រោយ បណ្ដាលឲ្យរថយន្ត​ Prius អូសខ្ទេចអស់មួយចំហៀងខាងឆ្វេងយ៉ាងដំណំតែម្ដង ។

ប្រភពខាងលើបន្តទៀតថា ភ្លាមៗនោះគេឃើញ បុរសជនជាតិចិនម្នាក់ជាអ្នកជិះលើរថយន្តជាមួយគ្នានៅរង់ចាំកន្លែងកើតហេតុ​ រួចទាក់ទងទៅអ្នកបកប្រែឲ្យមកជួយដោះស្រាយ ខណៈដែលបុរសជនជាតិចិនម្នាក់ទៀត ដែលផឹកស្រាស្រវឹងទន់ហើយ បានមកបើកបររថយន្ត​បង្កគ្រោះថ្នាក់​ដល់អ្នកផ្សេង និងថែមទាំងមានរបួសក្បាលនិងជើងទៀតនោះ​​ ត្រូវបានជនជាតិចិនប៉ុន្មាននាក់ផ្សេងទៀត បើករថយន្ត​មិនចាំម៉ាក​មួយគ្រឿង​ទៀត មកដល់កន្លែងកើតហេតុ រួចនាំឡើងជិះរថយន្ត​ទាំង​ដើរឡើងត្រេតពេញផ្លូវ​ ចូលក្នុងរថយន្តបើកចេញបាត់ពីកន្លែងកើតហេតុ​ មុនសមត្ថកិច្ចមកដល់​ ។

ក្រោយពេលកើតហេតុកម្លាំងល្បាតប៉ុស្តិ៍នគរបាលចាក់អង្រែក្រោម​ បានចុះមកដល់កន្លែងកើត​ រួចទាក់ទងប្រាប់ចរាចរណ៍ខណ្ឌ ចុះមកពិនិត្យមើលបន្តមួយជំហ៊ានសិន ទើបរាយការណ៍ប្រាប់ទៅកាន់សមត្ថកិច្ច​ជំនាញមកកន្លែងកើតហេតុ​ ។

តែមុនជំនាញចុះមកវាស់វែង ​ភាគីទាំងបីគ្រឿង​ និងមានអ្នកបកប្រែតំណាងជនជាតិចិនម្នាក់​ មកសុំសមត្ថកិច្ចដោះស្រាយមួយជំហានសិន​ ដោយភាគីខាងរថយន្ត​ Pirus​ មិនចង់ចំណាយពេលរង់ចាំដោះស្រាយវែងឆ្ងាយ​បន្តទៀត មិនទាមទារសំណង់អ្វីទេ​ គ្រាន់តែសុំយករថយន្តរបស់ខ្លួនទៅជួសជុលដោយខ្លនឯងប៉ុណ្ណោះ ហើយអ្នកបកប្រែតំណាងជនជាតិចិនម្ចាស់រថយន្ត TACOMA សុំសម្របសម្រួលឲ្យ​ភាគីរថយន្ត THUNDRA យករថយន្តជួសជុលដោយខ្លួនដែរ​ តែភាគីរថយន្ត THUNDRA មិនយល់ព្រម ដោយទាមទារត្រឹមតែចេញថ្លៃជួសជុលរថយន្តប៉ុណ្ណោះ ព្រោះក៏មិនចង់វែងឆ្ងាយដែរ​ តែអ្នកបកប្រែតំណាងជនជាតិចិននោះ​ មិនយល់ព្រមទេ​ ទើបប្រគល់ឲ្យសមត្ថកិច្ចវាស់វែងរថយន្តទាំង២គ្រឿង ដោយអនុញាតិឲ្យ​ម្ចាស់រថយន្ត​ Pirus យករថយន្តជួសជុលដោយខ្លួនឯង រួចក៏បើកចេញបាត់ទៅ ចំណែកឯរថយន្តដែលសមត្ថកិច្ចវាសវែងរួចរាល់នោះ​​ ត្រូវបានរថយន្តមកស្ទូចយកទៅរក្សាទុក​បណ្ដោះអាសន្ន​ នៅ​ការិយាល័យចរាចរណ៍ជើងគោក​ នៃស្នងការដ្ឋាននគរបាល​រាជធានីភ្នំពេញ​ ដើម្បីរង់ចាំសមត្ថកិច្ចជំនាញ​ធ្វើការទាក់ទងហៅភាគីទាំងសងខាងមកដោះស្រាយគ្នាពេលក្រោយ៕

@Amapapa.News

ហាមដាច់ខាតការយកអត្ថបទទៅចុះផ្សាយឡើងវិញ ឬអានធ្វើជាវីដេអូដោយគ្មានការអនុញ្ញាត!

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post