នៅព្រឹកថ្ងៃទី២៨ ខែធ្នូ ឆ្នាំ២០១៨ នេះ ថ្នាក់ដឹកនាំខេត្តព្រះសីហនុ បានអញ្ជើញចូលរួមប្រារព្ធធ្វើពិធីសែនក្រុងពាលី សុំសេចក្ដីសុខសប្បាយក្នុងឱកាសបុណ្យឆ្លងឆ្នាំសកល ឆ្នាំ២០១៨ ឆ្លងចូលឆ្នាំ២០១៩។ នេះបើយោងតាមរដ្ឋបាលខេត្តព្រះសីហនុ។
ក្នុងពិធីសែនក្រុងពាលី មានវត្តមាន ឯកឧត្ដម យន្ត មីន អភិបាល នៃគណៈអភិបាលខេត្តព្រះសីហនុ និងលោកជំទាវ ឯកឧត្តម ជាម ហ៊ីម ប្រធានក្រុមប្រឹក្សាខេត្ត និងមន្ត្រីរាជការ សភាពាណិជ្ជកម្ម ក្រុមការងារខេត្តជាច្រើនរូបទៀត។
បើតាមអ្នករៀបចំកម្មវិធីបានឱ្យដឹងថាគោលបំណងសំខាន់នៃការរៀបចំពិធីនេះគឺដើម្បីបង្កើតព្រឹត្តិការណ៍សប្បាយៗ និងបង្ហាញសក្តានុពលនៃខេត្តព្រះសីហនុ ផងដែរ។
សូមបញ្ជាក់ថារដ្ឋបាលខេត្តព្រះសីហនុ នឹងរៀបចំពិធីបុណ្យឆ្លងឆ្នាំនេះ រយៈពេល៤ថ្ងៃ៣យប់ ចាប់ពីល្ងាចថ្ងៃទី២៨ ខែធ្នូ រហូតដល់ថ្ងៃទី៣១ ខែធ្នូ ឆ្នាំ២០១៨ ដោយមានការប្រគុំតន្ត្រី និងមានតារាល្បីៗចូលរួម រួមទាំងមានការដាក់តាំពិព័រណ៍ផលិតផលប្រមាន២៥០ស្តង់ បាញ់កាំជ្រួច បង្ហោះគោម ប៉េងប៉ោងដើម្បីបង្កើតព្រឹត្តការណ៍កម្សាន្តសប្បាយដល់ពលរដ្ឋនិងភ្ញៀវទេសចរជាតិ អន្តរជាតិ។
