មណ្ឌលគីរីៈ កម្លាំងមន្ត្រីជំនាញ៤នាក់ ដែលសង្ស័យថា ជាប់ពាក់ព័ន្ធការប្រដេញរថយន្តដឹកឈើបង្កគ្រោះថ្នាក់ចរាចរន៍ ធ្វើឲ្យមនុស្សស្លាប់ម្នាក់ និងរងរបួសស្រាលធ្ងន់៣នាក់ ត្រូវបានស្នងការដ្ឋានគរបាលខេត្តមណ្ឌលគិរី បញ្ជូនខ្លួនទៅសាលាដំបូងខេត្តនៅព្រឹកនេះ។
ក្រោយពីសមត្ថកិច្ចនៃស្នងការដ្ឋាននគរបាលខេត្ត សហការជាមួយកម្លាំងអធិការនគរបាលស្រុកកែវស៊ីមា ធ្វើការឃាត់ខ្លួនជនសង្ស័យទាំង៤នាក់ខាងលើអស់រយៈពេលមួយយប់ ដើម្បីសាកសួរបំភ្លឺជុំវិញ ករណីបង្ករឲ្យមានគ្រោះថ្នាក់ចរាចរណ៍ បណ្ដាលឲ្យមានមនុស្សស្រ្តីវ័យចំណាស់ម្នាក់ស្លាប់ និងរងរបួសស្រាលធ្ងន់៣នាក់ នៅចំណុចគីឡូម៉ែត្រលេខ១៣៦ ក្នុងភូមិត្រពាំងផ្អេរ ឃុំស្រែខ្ទុម ស្រុកកែវសីមា ខេត្តមណ្ឌលគិរី កាលពីព្រឹកថ្ងៃទី២៧ ខែធ្នូ ឆ្នាំ២០១៨វេលាម៉ោង៦៖២៤នាទីកន្លងមកនោះ។
ឧត្ដមសេនីយ៍ត្រី សូ សុវណ្ណ ស្នងការរងទទួលផែនយុត្តិធម៌ បានឲ្យដឹងថា ជនជាប់ពាក់ព័ន្ធករណីខាងលើ ទាំងអស់មាន៧នាក់ តែជាក់ស្ដែងឃាត់បាន៤នាក់បញ្ជូនទៅសាលាដំបូងខេត្តចាត់ការតាមនីតិវិធីនៅព្រឹកថ្ងៃទី២៨ ខែធ្នូ ឆ្នាំ២០១៨។
ជនសង្ស័យ ទី១. ឈ្មោះ យូ រ៉ាវុធ ភេទប្រុស អាយុ៥១ឆ្នាំ មុខរបរយោធាការិយាល័យទី២ កងទ័ពជើងគោកប្រចាំគោលដៅខេត្តមណ្ឌលគីរី។ ២. ឈ្មោះ វ៉ាន់ រួន ភេទប្រុស អាយុ៥៤ឆ្នាំ នគរបាលសេដ្ឋកិច្ចក្រសួងមហាផ្ទៃ។ ៣. ឈ្មោះ ស្រ៊ុន ឈួន ភេទប្រុស អាយុ៤៣ឆ្នាំ មុខរបរ មន្ត្រីរដ្ឋបាលព្រៃឈើស្រុកកែវសីមា។ ៤. ឈ្មោះ សៀង ចំរ៉ុង ភេទប្រុស អាយុ៣៥ឆ្នាំ មុខរបរ មន្ត្រីនគរបាលផ្នែកអត្តសញ្ញាណកម្ម។ ដោយឡែក៣នាក់ទៀត បានរត់គេចខ្លួនបាត់ ទី១/ ឈ្មោះ នី អ្នកសារព័ត៌មាន ២/ ឈ្មោះ ណាង អ្នកសារព័ត៌មាន ៣/ ឈ្មោះ កាណួត ជាយោធា សមត្ថកិច្ចកំពុងធ្វើការស្រាវជ្រាវឃាត់ខ្លួនយកមកចាត់ការតាមផ្លូវច្បាប់៕
