ប្រទេសចិនបានឧបត្ថម្ភកាំជ្រួចបច្ចេកវិទ្យាទំនើប (3D) ចំនួន៤កុងតឺន័រ ដើម្បីបាញ់អបអរសាទរពិធីសម្ពោធ វិមានឈ្នះឈ្នះ ដែលមិនធ្លាប់ពីមុនមកនៅកម្ពុជា។ នេះជាការបញ្ជាក់របស់ឯកឧត្តម ថោង ខុន រដ្ឋមន្ត្រីក្រសួងទេសចរណ៍ ថ្លែងប្រាប់ទូរទស្សន៍ក្នុងស្រុកមួយ។
ឯកឧត្តម ថោង ខុន បានបន្តទៀតថា៖ សម្រាប់ថ្ងៃទី២៩ ខែធ្នូ នឹងចាប់ផ្តើមបាញ់នៅម៉ោង៧យប់ រយៈពេល:៤៥នាទី នៅយប់ថ្ងៃទី៣០ ធ្នូ នឹងត្រូវបាញ់ នៅម៉ោង៧យប់ រយៈពេល៣០នាទី ចំណែកឯ នៅយប់ថ្ងៃទី៣១ នឹងត្រូវបាញ់ នៅម៉ោងជិត១២យប់ រយៈពេល៣០នាទី ហើយការបាញ់កាំជ្រួចនេះ នឹងត្រូវធ្វើឡើងរៀងរាល់១៥នាទីម្តង ដោយប្រើប្រាស់កងកម្លាំងរៀបចំដំឡើងបាញ់ប្រមាណជិត១០០នាក់ផងដែរ។
ក្រៅពីការបាញ់កាំជ្រួច កម្មវិធីរយៈពេល៣ថ្ងៃនេះ ក៏មានកម្មវិធីកម្សាន្តជាច្រើន ដូចជាការតាំងពិព័រណ៍ផលិតផលជាតិ និងអន្តរជាតិប្រមាណ៨០០ស្តង់ ប្រដាល់គុនខ្មែរបុរាណ ជិះកង វាយកូនហ្គោល អុកចត្រង្គ ប្រណាំងរទេះគោ រទេះក្របី រទេះសេះ និងសិល្បៈផ្សេងៗទៀត។ ក្នុងកម្មវិធីនោះក៏មានការអញ្ជើញចូលរួមពីសំណាក់មន្ត្រីការពារជាតិមកពីប្រទេសចិន វៀតណាម ថៃ និង ឡាវ ផងដែរ។
សម្ដេចតេជោ ហ៊ុន សែន បានបញ្ជាក់តាមរយៈហ្វេសប៊ុកថា វិមានឈ្នះឈ្នះ គឺជាតំណាងនៃការបង្រួបបង្រួមជាតិ ឯករាជ្យជាតិ សាមគ្គីភាព បូរណភាពទឹកដី វឌ្ឍនភាព និងវិបុលភាពនៅកម្ពុជាទាំងមូល។
សូមបញ្ជាក់ថា វិមានឈ្នះឈ្នះ ត្រូវបានសាងសង់ឡើងលើផ្ទៃដីទំហំ៨ហិចតា ស្ថិតនៅសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ ក្នុងតំបន់អភិវឌ្ឍន៍លី យ៉ុងផាត់ ហើយវិមានឈ្នះ ឈ្នះ នឹងសម្ពោធនៅថ្ងៃទី២៩ ខែធ្នូ ២០១៨ នេះ។
