លោក សម រង្ស៊ី ត្រូវបានសន្និសីទពិភពលោករបស់គណបក្សសង្គ្រោះជាតិដែលបានរៀបចំនៅទីក្រុងអាត្លង់តា រដ្ឋចរចា សហរដ្ឋអាមេរិក កាលពីថ្ងៃទី១-២ ខែធ្នូ ឆ្នាំ២០១៨ តែងតាំងជាប្រធានស្តីទីរបស់គណបក្សសង្គ្រោះជាតិ។ សន្និសីទពិភពលោកនេះអះអាងស្របតាមតម្រូវការចាំបាច់ ដើម្បីសង្គ្រោះគណបក្សសង្គ្រោះជាតិ សង្គ្រោះជាតិខ្មែរយើង ជាពិសេសដើម្បីធ្វើឲ្យមានការដោះលែង លោកប្រធាន កឹម សុខា ឲ្យមានសិទ្ធិសេរីភាពពេញលេញឡើងវិញ ។
លោក សម រង្ស៊ី ក៏បានប្រកាសទទួលយកឋាន:ជាប្រធានស្តីទីរបស់គណបក្សសង្គ្រោះជាតិផងដែរ ដើម្បីមកដឹកនាំវិញក្នុងពេលដែលលោកកឹម សុខានៅជាប់ឃុំឃាំងក្នុងគេហដ្ឋាន។ ប៉ុន្តែ តួនាទីប្រធានស្តីទីនេះ ត្រូវចប់ដោយស្វ័យប្រវត្តិ ពេលលោក កឹម សុខា ត្រូវបាន ដោះលែង និង លើកលែងរាល់ការចោទប្រកាន់ ដើម្បីឲ្យលោកមានសេរីភាពពេញលេញវិញ។
សហមេធាវីការពារក្តីឱ្យលោក កឹម សុខា បានចេញសេចក្តីថ្លែងការណ៍ថាលោក កឹម សុខា មិនបានដឹងឮ និងទទួលស្គាល់ គាំទ្រ សន្និសីទពិភពលោករៀបចំនៅទីក្រុងអាត្លង់តា រដ្ឋចរចា សហរដ្ឋអាមេរិកនោះឡើយ។
នេះជាការសម្រេចមួយដែលទំនងជានឹងធ្វើឱ្យក្រុមអ្នកគាំទ្រលោកកឹម សុខាមិនគាំទ្រពីព្រោះពួកគេបានប្រកាសមិនទទួលស្គាល់សន្និសីទនេះទេ។
លោក មុត ចាន់ថា អតីតមន្ត្រីខុទ្ទកាល័យលោក កឹម សុខា បានបញ្ជាក់ថាការសម្រេចរបស់អ្វីដែលហៅថាសន្និសីទពិភព នៅថ្ងៃទី០២ ធ្នូ នៅអត្លង់តា សហរដ្ឋអាមេរិក ដែលអញ្ជើញលោក សម រង្ស៉ី មកដឹកនាំជាប្រធានស្តីទី ផ្ទុយពីលក្ខន្តិកៈរបស់គណបក្ស និងមិនអាចយកការបានជាដាច់ខាត ដោយហេតុថា៖ ទី១ អ្នកចូលរួមធ្វើសេចក្តីសម្រេចក្នុងសន្និសីទនោះមិនមាននីតិសម្បទាដែលមានសិទ្ធិស្នើឬជ្រើសតាំងប្រធានស្តីទីគណបក្ស ស្របតាមលក្ខន្តិកៈគណបក្សនោះទេ។
ទី២ យោងតាមលក្ខន្តិកៈ អាចធ្វើជាប្រធានស្តីទីណបក្សបាន លុះត្រាតែអវត្តមានប្រធាន ដែលត្រូវផ្ទេរសិទ្ធិឲ្យទៅអនុប្រធានមួយរូបដែលមានអាយុច្រើនជាងគេ (ប្រការ ៤៥ថ្មី នៃលក្ខន្តិកៈ)។ មិនអាចយកអ្នកដទៃណាដែលសមាជគណបក្សមិនបានជ្រើសតាំងជាអនុប្រធានហើយនោះ មកធ្វើជាប្រធានស្តីទីបានឡើយ។ និងទី៣ ចំពោះសេចក្តីសម្រេច ឬសំណើណាមួយរបស់សន្និសីទនេះ គឺគ្រាន់តែជាមតិរបស់មនុស្សមួយក្រុមតែប៉ុណ្ណោះ ដែលមិនអាចចាប់បង្ខំឲ្យគណៈកម្មាធិការអចិន្រ្តៃយ៍ យកមកពិនិត្យ និងឆ្លើយតបឡើយ។