Wednesday, December 26, 2018

យប់ថ្ងៃណូអែល ឆែកGPS តាម​ទាន់ប្តី​កំពុងឱប​ស្រីក្នុងក្លឹប True Face រហូត​ប្តី​វាយ​បែក​ចិញ្ចើមទៀត ស្រែក​រក​សមត្ថកិច្ចឲ្យ​ជួយ​ ទាល់តែប្ដីទៅបាត់​ ទើបសមត្ថកិច្ចមកដល់!

អាម៉ាប៉ាប៉ាញ៉ូស

ភ្នំពេញៈ ស្ត្រី​ម្នាក់​ឆែក​មើ​កតាម​ប្រព័ន្ធ GPS ឃើញ​ប្តី​ចូល​ក្លឹ​ប​បាន​ទៅ​តាម​ទាន់ប្តី​កំពុង​តែ​អោប​ស្រី​ក្មេង បាន​ឈ្លោះ​ទាស់ទែង​ជាមួយ​ប្តី​នៅ​ក្នុង​ក្លឹ​ប​ត្រូវ​សន្តិសុខ​ដេញ​ចេញ​ក្រៅ នាំ​គ្នា​ជិះ​រថយន្ត​មក​ដល់​ពាក់​កណ្តាលផ្លូវ​បាន​ឈ្លោះប្រកែក​គ្នា​ម្តងទៀត ត្រូវ​ប្តី​វាយ​បែក​ចិញ្ចើម​រក​សមត្ថកិច្ច​ជួយ​អន្តរាគមន៍ អត់​មាន​សមត្ថកិច្ច​ បង្ក​ឲ្យ​មានការ​ភ្ញាក់ផ្អើល កាលពី​កាលពី​វេលា​ម៉ោង​១​និង​១៥​នាទី​រំលង​ អធ្រាត្រ​ឈាន​ចូល​ថ្ងៃ​ទី​២៦ ខែធ្នូ ឆ្នាំ២០១៨ នៅ​តាម​បណ្ដោយ​មហាវិថី​ព្រះ​នរោត្តម ​កែង​ផ្លូវ​១៥៤ សង្កាត់​ផ្សារ​ថ្មី​៣ ខណ្ឌដូនពេញ រាជធានីភ្នំពេញ​ ។

តាម​សម្តី​ជន​រង​គ្រោះ​បាន​ប្រាប់​ឲ្យ​ដឹង​ថា រូប​គាត់​ឈ្មោះ សុខុម អាយុ​៣៨​ឆ្នាំ មុខរបរ​មេផ្ទះ ជា​ប្រពន្ធ​ការ​ពេញ​ច្បាប់ របស់​ប្តី​ជា​ជន​បង្ក​ឈ្មោះ សុខ វ​ណ្ណី អាយុ​៣៨​ឆ្នាំ មុខរបរ​ធ្វើការ​នៅ​ក្រុមហ៊ុន​មួយ បាន​រៀប​ការ​ជាមួយ​គ្នា​រយៈពេល​១៦​ឆ្នាំ មានកូន​ស្រី​ចំនួន​២​នាក់ កូន​បង​អាយុ​១៣​ឆ្នាំ និង​កូនពៅ​អាយុ​៨​ឆ្នាំ ។

តាម​សម្ដី​ស្ត្រី​រង​គ្រោះ​បាន​ប្រាប់​ឲ្យ​ដឹង​ថា មុន​កើតហេតុ គឺ​រូប​គាត់​បាន​ទៅ​ចូលរួម​កម្មវិធី​ខួបកំណើត​មិត្តភក្ដិ ពេល​ត្រឡប់​មក​វិញ​បាត់​ប្តី​មិនឃើញ​នៅផ្ទះ​ក៏​ខ​ល​សួរ​ស្រាប់តែ​ប្តី​របស់​គាត់​ប្រាប់​ថា នៅ​ជាមួយ​មេ​នៅ​សង្កាត់​ចាក់​អង្រែ​ក្រោម តែ​គាត់​មានការ​សង្ស័យ​ក៏​ឆែក​មើល​GPS ដែល​ភ្ជាប់​នឹង​រថយន្ត​របស់​ប្តី​ម៉ាក​ស៊ី​ណា ពណ៌​ស ពាក់​ស្លាក​លេខ​ភ្នំពេញ 2AB–2561 ឃើញ​នៅ​មុខ​ក្លឹ​ប​កម្សាន្ត True Face ដែល​គាត់​និយាយ​ថា ជា​ក្លឹ​បលេង​ថ្នាំ​ក្រ​វី គាត់​ក៏​មក​តាម​នឹង​ចូល​ទៅ​ខាងក្នុង ស្រាប់តែ​ឃើញ​ប្តី​របស់​គាត់​នឹង​ស្រី​ស្នេហ៍​កំពុង​តែ​ហ៊ោកញ្ជ្រៀវ​សប្បាយ គាត់​ក៏​បាន​ស្រែក​ឡូឡា​នឹង​ឈ្លោះប្រកែក​គ្នា​ពេញ​ក្នុង​ក្លឹ​ប ក៏​ត្រូវ​បាន​ខាង​ក្រុម​សន្តិសុខ​ក្លឹ​ប​ដេញ​ពួក​គាត់​ទាំង​ពីរ​ចេញ​មក​ក្រៅ និង​បាន​ឡើង​ជិះ​រថយន្ត​ចេញពី​នោះ​មក​ដល់​កន្លែង​កើតហេតុ​បាន​ឈ្លោះប្រកែក​គ្នា​ម្តងទៀត ដោយ​មានការ​ប្រតាយប្រតប់​គ្នា​ក៏​ត្រូវ​ប្តី​របស់​គាត់​វាយ​នឹង​កណ្តាប់ដៃ បណ្តាល​ឲ្យ​គាត់​បែក​ចិញ្ចើម​ស្តាំ​ម្ខាង ។

ភ្លាម​ៗ​នោះ​គាត់​ក៏​បាន​ចុះ​ពី​រថយន្ត​មក​ខាងក្រៅ រក​ជំនួយ​ពី​សមត្ថកិច្ច​ឲ្យ​ជួយ​អន្តរាគមន៍ ដោយ​ឃើញ​មាន​កងកម្លាំង​មួយ​ក្រុម​ស្លៀកពាក់​ស៊ី​វិល​បាន​ប្រាប់​ថា ពួក​គេ​ជា​មន្ត្រី​អាវុធហត្ថ​ខណ្ឌដូនពេញ និង​មាន​អ្នកខ្លះ​ស្រវឹង​ទៀត បាន​ចេញ​មុខ​នៅ​កន្លែង​កើតហេតុ តែ​មិន​បាន​ជួយ​ដោះស្រាយ​ឲ្យ​គាត់​ទេ ថែម​ទាំង​បានឲ្យ​ប្តី​ជា​ជន​បង្ក​បើករថយន្ត​ចេញ​ទៅ​យ៉ាង​រំភើយ រួច​ហើយ​បាន​នាំ​គ្នា​ចេញ​ទៅ​ដែរ​ដោយ​និយាយ​ថា (​ប្តី​ប្រពន្ធ​អាណា​អា​ណឹ​ង​ដោះស្រាយ​ខ្លួនឯង​ទៅ ធ្វើ​ឲ្យ​ប្រជាពលរដ្ឋ​ខឹងសម្បារ​យ៉ាង​ខ្លាំង នឹង​បាន​ស្នើ​​ឲ្យ​លោក រ័​ត្ន ស្រៀ​ង ជួយ​ត្រួតពិនិត្យ​មើល​កម្លាំង​អាវុធហត្ថ​ខណ្ឌដូនពេញ​ផង ព្រោះ​ពេល​ល្បាត​ម្តង​មិន​ដែល​ឃើញ​មាន​ស្លៀក​ឯកសណ្ឋាន​ឲ្យ​បាន​ត្រឹមត្រូវ​ទេ មិនដឹង​ជា​ខាង​អង្គភាព​តម្រូវ​ឲ្យ​ស្លៀកពាក់​បែប​នឹងរ​ឬ​ក៏​គាត់​ស្លៀកពាក់​តាម​ចិត្ត​ឯង ។

បន្ទាប់​ពី​កម្លាំង​អាវុធហត្ថ​ ចេញពី​កន្លែង​កើតហេតុ​ ប្រជាពលរដ្ឋ​រាយការណ៍​ទៅ​សមត្ថកិច្ច​ ប៉ុស្តិ៍​ផ្សារ​ថ្មី​៣ បែរជា​ខាង​សមត្ថកិច្ច​និយាយ​តាម​វិទ្យុទាក់ទង​ថា អត់​មាន​កម្លាំង​ល្បាត​ទេ មេឃ​ភ្លៀង​ចឹ​ង​អត់​មាន​កម្លាំង​ចេញ​ទេ​ប្រជាពលរដ្ឋ​រង់ចាំ​មើល​វត្តមាន​សមត្ថកិច្ច មក​ដោះស្រាយ​ព្រោះ​នារី​រង​គ្រោះ​ចង់​ដាក់​ពាក្យបណ្ដឹង​ប្តី​នាង​តែ​រង់ចាំ​អស់​ជា​ច្រើន​ម៉ោង​នៅ​តែ​មិនឃើញ​វត្តមាន​សមត្ថកិច្ច​មក​ដល់​កន្លែង​កើតហេតុ​ទេ​ ។ ទោះជា​យ៉ាងណា​ជន​រង​គ្រោះជា​ស្ត្រី​ទន់ខ្សោយ បាន​ត្រឹមតែ​ស្រែកយំ​តែ​ម្នាក់ឯង​នៅ​កន្លែង​កើត​ហេតុតែ​ប៉ុណ្ណោះ ៕

@Amapapa.News

Feature Ads