Friday, December 21, 2018

នារីរូបស្រស់​ម្នាក់​ ស្រវឹងបើក​រថយន្ត​​ LEXUS GS300 បួង​ចង្កូតជ្រុលទៅបុកម៉ូតូ និង​ផ្ទះពលរដ្ឋ ខូចខាតយ៉ាងដំណំ

អាម៉ាប៉ាប៉ាញ៉ូស

ភ្នំពេញៈ នារី​រូបស្រស់ម្នាក់ បាន​បើ​កបរ​រថយន្ត​ស៊េរី​ទំនើប​មួយគ្រឿង ​ក្នុងស្ថានភាពស្រវឹង ​និងក្នុងល្បឿនលឿន​ បួងចង្កូត​បត់ឆ្វេងមិន​ប្រយ័ត្ន ​ក៏ជ្រុល​ទៅ​បុក​ម៉ូតូមួយគ្រឿង​ និងបុកទ្វារ​ផ្ទះរបស់ប្រជាពលរដ្ឋ​ពេញទំហឹង​ បង្កឲ្យមានការណ៍​ភ្ញាក់ផ្អើល​ឡើយ​ កាល​ពី​វេលាម៉ោង​១០និង៥០​នាទី​យប់​ ថ្ងៃទី​២០​ ខែធ្នូ​ ឆ្នាំ​២០១៨ ត្រង់ចំណុច​ខាងត្បូងសាលាលីមកុកវីង​ប្រមាណ២០០ម៉ែត្រ​ តាមបណ្ដោយ​ផ្លូវ​១០១៣​ ស្ថិតក្នុងសង្កាត់​ភ្នំពេញ​ថ្មី​ ខណ្ឌសែនសុខ​។

តាមប្រភពព័ត៌មាន​ពីកន្លែងកើតហេតុ បាន​ឲ្យ​ដឹង​ថា ​មុន​ពេល​កើត​ហេតុ ​គេ​ឃើញ​នារី​រូបស្រស់​ម្នាក់ ​បើកបរ​រថយន្ត​មួយ​គ្រឿង​ម៉ាក​ LEXUS ​GS300 ពណ៌ស​ ពាក់ស្លាកលេខ​ ភ្នំពេញ​2AW-9904​ ​ក្នុង​ស្ថានភាព​ស្រវឹង​ជោកជាំ​ តាមបណ្ដោយ​ផ្លូវ​១០១៣​ ក្នុង​ទិសដៅ​ពីលិចទៅកើត​និងក្នុងល្បឿនយ៉ាង​លឿន​ លុះមកដល់ចំណុច​ផ្លូវបំបែកជាបួន​ រថយន្តបង្ក​ខាង​លើ ​ក៏​បាន​បួង​ចង្កូត​បត់ឆ្វេងបំណងឆ្ពោះទៅ១៩៨៦​ ​ដោយ​ខ្វះ​ការ​ប្រុងប្រយ័ត្ន​ រួច​ក៏​ជ្រុល​ចង្កូត​ទៅ​បុក​ម៉ូតូ​មួយ​គ្រឿង​ម៉ាក​ ហុង​ដា​ឃ្លីច​ ពណ៌ស​ ពាក់ស្លាកលេខ​ ភ្នំពេញ​ 1CU-3062 ដែលឈប់ចតចោលនៅលើ​ខឿនតាមចិញ្ចើ​មផ្លូវ​ត្រង់ចំណុចកើតហេតុ​ បណ្តា​ឲ្យ​រង​ការ​ខូចខាត​យ៉ាងដំណំ​​ ហើយ​រថយន្ត​នៅមិនទាន់​អស់​ល្បឿន បន្ត​ជ្រុល​ទៅ​បុក​ថូផ្កា​បួនទៅប្រាំ​ថូ រួមទាំងទ្វារបន្ទប់ជួលមួយផ្ទាំង​ រងការខូចខាតវៀចក្រពឹត។ ចំណែកឯ​រថយន្ត​រងការខូចខាត​ក្រពឹតផ្នែកខាងមុខ​យ៉ាង​ដំណំ​ទៅ​មុខ​លែង​រួច​ ដោយ​ឡែក​អ្នក​បើ​កបរ​រថយន្ត​បង្ក ​បានរងរបួស​បាក់ដៃខាងឆ្វេង​ ហើ​យភ្លាមៗនោះ ក៏ត្រូវបានប្រជាពលរដ្ឋ ជួយដឹកបញ្ជូនយកទៅសង្គ្រោះនៅឯមន្ទីរពេទ្យ​ផងដែរ។

ក្រោយ​​កើត​ហេតុ​សមត្ថកិច្ច​មូល​ដ្ឋាន​ និង​សមត្ថកិច្ច​ជំនាញ ​ក៏​បាន​ចុះ​មកដល់ចំណុច​កើ​ត​ហេតុ​ រួចធ្វើ​ការវាស់វែង និង​ស្ទូច​យករថយន្ត​ខាងលើ​​ទៅរក្សាទុកនៅ​អធិការ​ដ្ឋាន​នគរបាល​ខណ្ឌ​សែនសុខ ​ដើម្បី​រង់ចាំ​ធ្វើ​ការ​ដោះស្រាយ​គ្នា​ទៅ​តាម​ផ្លូវ​ច្បាប់​នៅ​ពេល​ក្រោយ​៕

@Amapapa.News

Feature Ads