ភ្នំពេញៈ បុរសជនជាតិចិនម្នាក់ សង្ស័យបែកថ្នាំ បានកាន់កាំបិតដេញកាប់អ្នកដំណើរបង្កឲ្យរបួស ហើយរត់ទៅបើកទ្វារក្រុមហ៊ុនលក់រថយន្ត Mazda បង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ចចុះអន្តរាគមន៍ នាំគ្នាយកដំបងវាយទម្លាក់កាំបិតពីដៃ ហើយចាប់ខ្លួនតែម្ដង។
ហេតុការណ៍នេះ បង្កឲ្យមានការភ្ញាក់ផ្អើលយ៉ាងខ្លាំង នៅវេលាម៉ោង២៖២០នាទីរសៀលថ្ងៃសៅរ៍ ទី១ ខែធ្នូ ឆ្នាំ២០១៨នេះ នៅតាមបណ្តោយផ្លូវ៤៣២ កែងផ្លូវព្រះមុនីវង្ស ស្ថិតក្នុងសង្កាត់បឹងត្របែក ខណ្ឌចំការមន រាជធានីភ្នំពេញ។
ប្រភពីជនរងគ្រោះសុំមិនបញ្ចេញឈ្មោះ បានឲ្យដឹងថា មុនពេលកើត គេបានឃើញបុរសជនជាតិចិន ទំនងជាបែកថ្នាំ មិនដឹងមិនពីណា ដោយមានកាន់កាំបិតនៅជាប់ដៃ ហើយដោះអាវ រត់សំដៅដេញកាប់អ្នកដំណើរ និងប្រជាពលរដ្ឋដទៃទៀតពេញផ្លូវ៤៣២ ស្ថិតក្នុងសង្កាត់បឹងត្របែក ពេលនោះសមត្ថកិច្ចចុះអន្តរាគមន៍ចូលឃាត់ ក៏ត្រូវជនជាតិចិននោះកាប់មួយកាំបិតចំដៃចំនួន២នាក់ ចំណែកលោកយាយជាអ្នកលក់អំពៅសាង ក៏ត្រូវជាច្រើនកាំបិតផងដែរ បណ្ដាលរងរបួស២នាក់ ហើយជនជាតិចិនខាងលើនេះ បានរត់សំដៅចូលទៅក្នុងក្រុមហ៊ុនលក់រថយន្ត Mazda ហើយកាន់កាំបិតចង្អុលទៅក្នុង តែត្រូវបានអ្នកនៅខាងក្នុងទាញទ្វារបិទ និងទប់មិនឲ្យជនជាតិចិនបែកថ្នាំខាងលើ ចូលបាននោះទេ ហើយជនជាតិចិននោះ បានដើរចេញមកស្រែកឡូឡា ក្រវីកាំបិតបញ្ចេញក្បាត់កុន ពុំមានអ្នកណាហ៊ានចូលជិតទេ ។ ក្រោយមកសមត្ថកិច្ចមូលដ្ឋានសហការគ្នា វាយទម្លាក់កាំបិតពីដៃជនជាតិចិននោះ រួចសម្រុកចូលចាប់ឃាត់ខ្លួនយកមកប៉ុស្តិ៍នគរបាលបឹងត្របែកភ្លាមៗផងដែរ។
ជនជាតិចិន ដែលសង្ស័យបែកថ្នាំខាងលើ មិនទាន់ស្គាល់អត្តសញ្ញាណនោះទេ បច្ចុប្បន្នកំពុងឃាត់ខ្លួនបញ្ជូនទៅប៉ុស្តិ៍សាកសួរសិន៕
