Monday, January 7, 2019

បុរសម្នាក់ ធ្លាក់ពីលើអគារផ្សារទំនើប​ AEON ជាន់ទី៤ ដោយមិនទាន់ដឹងមូលហេតុ

ភ្នំពេញៈ ផ្អើ​លទាំងកណ្ដាលយប់​ ខណៈប្រទះឃើញ បុរសម្នាក់ បានធ្លាក់ពីលើជាន់ទី៤​ នៃអគារផ្សារទំនើប AEON ទី១ ដោយមិនទាន់ដឹងថា មូលហេតុ​ច្បាស់លាស់​នៅឡើ​យនោះទេ​ បង្កការភ្ញាក់ផ្អើលឡើង​កាលពីវេលាម៉ោង១០៖៤០នាទីយប់ ថ្ងៃអាទិត្យ​ ទី៦ ខែមករា​ ឆ្នាំ២០១៩នេះ ស្ថិតនៅផ្លវព្រះសុធារស ស្ថិតក្នុងសង្កាត់ទន្លេបាសាក់​ ខណ្ឌចំការមន​ រាជធានីភ្នំពេញ​។

សពបុរសខាងលើ នៅមិនទាន់មានអ្នកស្គាល់អត្តសញ្ញាណនៅឡើយទេ អាយុប្រហែល២០ឆ្នាំជាង។

តាមការបំភ្លឺពីសាក្សីនៅកន្លែងកើតហេតុ បានប្រាប់សមត្ថកិច្ចឲ្យដឹងថា នៅវេលាម៉ោងខាងលើ គេបានឃើញបុរសម្នាក់ធ្លាក់ពីលើផ្សារទំនើប ជាន់ទី៤ ចុះក្រោមបោកក្បាល ហើយអ្នកដែលបានឃើញនាំគ្នាស្ទុះចេញទៅមើល ឃើញបុរសម្នាក់នោះដេកស្ដូកស្ដឹង និងមានឈាមហូរចេញពីក្បាល​ តែមិនមានអ្នកណាហ៊ានប៉ះពាល់ទេ ទើបបង្កឲ្យមានការភ្ញាក់​ផ្អើលឡើង​ និងរាយការណ៍ប្រាប់សន្តិសុខផ្សារ និងសមត្ថកិច្ចមូលដ្ឋានឲ្យបានដឹងផងដែរ។

បន្តិចក្រោយមកក៏មានសមត្តកិច្ចមូលដ្ឋាន បានចុះទៅដល់កន្លែងកើតហេតុ តែខាងក្រុមសន្តិសុខផ្សារ AEON មិនអនុញ្ញាតអោយក្រុមអ្នកយកព័ត៌មានចុះផ្ដិតយករូបភាពនោះឡើង​ ហាក់បីដូចជា​មានការលាក់បាំង មិនឲ្យក្រុមអ្នកសារព័ត៌មានដឹងពីមូលហេតុ នឹងដំណើររឿងនេះឡើយ។

ជនរងគ្រោះភិនភាគ​ស្លៀកពាក់​ខោខ្លី​ពណ៌ខោ​ អាវយឺត​ដៃខ្លីពណ៌ខៀវ និងមិនមែនជាបុគ្គលិកផ្សារទំនើ​ប AEON នោះទេ គឺប្រជាពលរដ្ឋដើរមកពីខាងក្រៅ ឡើងទៅលើជាន់ទី៤ លោតសម្លាប់ខ្លួនតែម្តង។

ក្រោយ​មក​សពកំពុង រង់ចាំខាងសមត្ថកិច្ចជំនាញចុះមកត្រួតពិនិត្យ​ និងធ្វើ​កោសល្យវិច័យ​ រួចរង់ចាំស្វែងរក​បងប្អូន ឬសាច់ញាតិ ក្រុមគ្រួសារ មកយកទៅធ្វើបុណ្យតាមប្រពៃណី។

ជាមួយនោះផងដែរ សមត្តកិច្ចបាន និងកំពុងអំពាវនាវ ដល់បងប្អូនណាដែលបាត់សមាជិកគ្រួសារ ដូចភិនភាគបានរៀបរាប់ខាងលើ មេត្តាទៅទាក់ទងមកសមត្ថកិច្ចប៉ុស្តិ៍នគរបាលទន្លេបាសាក់​ ឬសមត្ថកិច្ច​ខណ្ឌចំការមន​ ដើម្បីទទួលយកសពយកទៅធ្វើបុណ្យតាមប្រពៃណី៕

Feature Ads