Sunday, January 6, 2019

ស្ដែងដូចក្នុង​​រឿងហុងកុង! ជិះតាមដល់ការដ្ឋាន កាប់បុរសម្នាក់ ២ដាវសាំម៉ូរ៉ៃ ប្រកាច់ស្លាប់ក្នុងថ្លុកឈាមមួយរំពេច

ភ្នំពេញៈ បុរសម្នាក់ បានប្រកាច់​ស្លាប់ក្នុងថ្លុកឈាមមួយរំពេច ខណៈកំពុងឈរសុខៗ ត្រូវក្រុមជនដៃដល់ ជិះម៉ូតូមកពី​ចម្ងាយ រួចចុះកាប់ចំនួន២កាំបិត បង្កការភ្ញាក់ផ្អើល​កាលពីវេលាម៉ោង៦៖៣០នាទីព្រលប់ថ្ងៃទី៥ ខែមករា ឆ្នាំ២០១៩​ ស្ថិតនៅក្នុងការដ្ឋានសំណង់ចិន (ណានតុង ហ្សុងរ៉ាន់ ខនគ្រីត ខាមបូឌា ឯ-ក NANTONG ZHONGRUN CONCRETE (CAMBODIA) Co.ltd)​ ស្ថិតនៅតាមបណ្តោយផ្លូវ៣ស្ថាប័ន ក្នុងសង្កាត់ទួលសង្កែ១ ខណ្ឌឬស្សីកែវ រាជធានីភ្នំពេញ។

ជនរងគ្រោះឈ្មោះ​ រ៉ាន វៃ​ អាយុ៣០ឆ្នាំ មុខរបរសំណង់ផ្នែកជាងពុម្ព ស្នាក់នៅបណ្តោះអាសន្ននៅកន្លែងកើតហេតុ មានស្រុកកំណើត ភូមិសេរីអោ ឃុំក្រស់ ស្រុករមាសហែក ខេត្តស្វាយវៀង។

ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ​ ជនរងគ្រោះកំពុងឈរនៅ​ ក្បែរប៉ុស្តិ៍យាមរបស់ក្រុម សន្តិសុខឯកជនខាងមុខការដ្ឋានកើតហេតុខាងលើ​​ ស្រាប់តែគេឃើញម៉ូតូ២គ្រឿង ជិះគ្នា៤នាក់ ​យ៉ាងលឿនមកឈប់ម៉ូតូ ​រួចរត់សំដៅទៅរកជនរងគ្រោះ ក្នុងនោះមានបុរសម្នាក់ ចុះមកកាន់ដាវ​សាម៉ូរ៉ៃ​ កាប់ទៅលើ​ជនរងគ្រោះ ចំកញ្ចឹងក និងដើមទ្រូង បណ្តាលឱ្យដួលស្លាប់ក្នុងថ្លុកឈាមមួយរំពេចតែម្ដង។ ភ្លាមៗពួកជនល្មើសបាននាំគ្នាឡើ​ងជិះម៉ូតូ គេចខ្លួនបាត់ស្រមោលអស់ ទើ​បបង្កឲ្យមានការភ្ញាក់​ផ្អើ​លឡើង​ និងរាយការណ៍ប្រាប់សមត្ថកិច្ចមូលដ្ឋានឲ្យបានដឹងដំណឹងនេះផងដែរ។

​ក្រោយកើតហេតុ សមត្ថកិច្ចមូលដ្ឋាននិងសមត្ថកិច្ចជំនាញ បានមកត្រួតពិនិត្យនឹងសាកសួរសាក្សីនៅកន្លែងកើតហេតុ ដើម្បីឈានទៅកំណត់មុខសញ្ញា តាមចាប់ក្រុមជនល្មើស។​ចំណែកសពជនរងគ្រោះ សមត្ថកិច្ចបានធ្វើ​កំណត់ហេតុប្រគល់ឲ្យក្រុមគ្រួសារ យកទៅធ្វើបុណ្យតាមប្រពៃណីនៅស្រុកកំណើត៕

Feature Ads