កម្មករសំណង់ ជនជាតិចិន ដេកស្លាប់ក្នុងការដ្ឋានសំណង់អូត្រេះ១

ព្រះសីហនុៈ កម្មករសំណង់ ជនជាតិចិនម្នាក់ បានដេកស្លាប់ក្នុងការដ្ឋាន បង្កការឲ្យមាការភ្ញាក់ផ្អើលកាលពីវេលាម៉ោង៧៖៣០នាទីព្រឹកថ្ងៃទី២ ខែមករា ឆ្នាំ២០១៩ ក្នុងការដ្ឋានសំណង់អូត្រេះ១ (China Town) ក្រុមទី២ ភូមិ៦ សង្កាត់លេខ៤ ក្រុងព្រះសីហនុ ខេត្តព្រះសីហនុ។

ក្រោយពីទទួលបានព័ត៌មាន កម្លាំងសមត្ថកិច្ចមូលដ្ឋាន សហការជាមួយកម្លាំងជំនាញការិយាល័យនគរបាលបច្ចេកទេសវិទ្យាសាស្ត្រ និងគ្រូពេទ្យជំនាញ បានចុះទៅធ្វើការពិនិត្យ ទើបដឹងថា សាកសពឈ្មោះ LE XiNG HE ភេទប្រុស សញ្ជាតិចិន មុខរបរកម្មករសំណង់ក្នុងការដ្ឋានខាងលើ ឆ្នាំកំណើតថ្ងៃទី២២ ខែសីហា ឆ្នាំ១៩៨២ កាន់លិខិតឆ្លងដែនលេខE:891444583 អស់សុពលភាពថ្ងៃទី២៥ ខែធ្នូ ឆ្នាំ២០២៦ ទិដ្ឋាកាលេខEi.01793252 អស់សុពលភាពថ្ងៃទី១១ ខែឧសភា ឆ្នាំ២០១៩។

តាមការពិនិត្យរបស់លោកវេជ្ជបណ្ឌិត សែ ជូសិទ្ធជោត អនុប្រធានមន្ទីរសុខាភិបាកខេត្តព្រះសីហនុ និងនគរបាលបច្ចេកទេសវិទ្យាសាស្ត្រ បានអោយដឹងថា សាកសពពិតជាបានស្លាប់ដោយសារ គាំងបេះដូង ពិតប្រាកដមែន។

បច្ចុប្បន្នសាកសពបានរក្សាទុកនៅមន្ទីរពេទ្យបង្អែកខេត្តព្រះសីហនុ រង់ចាំការសម្រេចពីស្ថានទូត និងក្រុមគ្រួសារសាមី៕