ខេត្តកោះកុង ៖ តាមរបាយការណ៍ពីសមត្ថកិច្ចប៉ូលិស ស្រុកមណ្ឌលសីមា បានអោយដឹងថា ផ្ទះ១ខ្នង មានទំហំ ៧ម៉ែត្រ x ១២ម៉ែត្រ កំពស់២ជាន់ ជាន់លើសង់អំពីឈើ ជាន់ក្រោមសង់ពីថ្ម ត្រូវបានអគ្គីភ័យលេបត្របាក់ទាំងស្រុង កាលពីវេលាម៉ោង១០.២០នាទី នាថ្ងៃទី២០ ខែមករា ឆ្នាំ២០១៩ ហេតុការណ៍នេះបានកើតឡើងនៅត្រង់ចំនុចភូមិចាំយាម ឃុំប៉ាក់ខ្លង ស្រុកមណ្ឌលសីមា ខេត្តកោះកុង។
សមត្ថកិច្ចបានអោយដឹងទៀតថា ហេតុការណ៍ដែលបង្កអោយមានគ្រោះអគ្គីភ័យ(ភ្លើងឆេះផ្ទះ) ខាងលើកើតឡើងគឺបណ្តាលមកពីផ្ទុះសេខ្សែភ្លើង (ភ្លើងឆេះចេញពីបន្ទប់ជាន់ទី២) ទើបបណ្តាលអោយមានការខូចខាតនូវទ្រព្យសម្បត្តិមួយចំនួនរួមមាន៖ប្រាក់រៀលឆេះអស់ចំនួន៨លានរៀល ទូរទស្សន៍១គ្រឿង ទូទឹកកក១គ្រឿង ក្បាលវីស៊ីឌី១គ្រឿង រួមទាំងសម្ភារះប្រើប្រាស់មួយចំនួនធំថែមទៀត។
ប្រភពដដែលបានបន្តថា ក្នុងករណីអន្តរាគមន៍ពន្លត់អគ្គីភ័យខាងលើសមត្ថកិច្ចបានសហការជាមួយកម្លាំងឡានទឹករបស់ក្រុមហ៊ុន អឹល វ៉ាយ ភី គ្រុប ចំណាយអស់ទឹកចំនួន៣ឡានទើបធ្វើអោយអគ្គីភ័យខាងលើបានរលត់ជាស្ថាពរ។
សូមបញ្ជាក់ថាក្នុងហេតុការណ៍គ្រោះអគ្គីភ័យខាងលើមិនបានបង្កអោយមានមនុស្សណាម្នាក់រងរបួសឬស្លាប់នោះទេ៕
