ភ្នំពេញៈ កម្លាំងនគរបាលខណ្ឌទួលគោក នៅព្រឹកថ្ងៃទី២២ ខែមករា ឆ្នាំ២០១៩នេះ បានបញ្ជូនខ្លួននារីម្នាក់ ពាក់ព័ន្ធករណីបង្កអំពើហិង្សាទៅលើជនរងគ្រោះ ដែលបម្រើការជាមួយគ្នា ដោយយកកូនកន្ត្រៃយ៍កាត់អំបោះមកឆូតមុខរបស់ជនរងគ្រោះ បណ្តាលឲ្យមានរបួស មកកាន់តុលាការ ដើម្បីចាត់ការតាមនីតិវិធីច្បាប់។
បើតាមសមត្ថកិច្ច បានឲ្យដឹងថា នារីជាជនសង្ស័យឈ្មោះ ឌុន លី អាយុ២៥ឆ្នាំ មុខរបរ បម្រើការនៅក្នុងខារ៉ាអូខេ (KTV) ស្នាក់នៅផ្ទះលេខ៨B ផ្លូវ២០0៤ សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។ នាងត្រូវបានសមត្ថកិច្ចឃាត់ខ្លួន កាលពីថ្ងៃ២០ ខែមករា ឆ្នាំ២០១៩ នៅក្នុងហាងខេរ៉ាអូខេ “ឌីយ៉ាម៉ង់” ផ្លូវ២៧១ក្រុម ភូមិ១១ សង្កាត់ទឹកល្អក់៣ ខណ្ឌទួលគោក រាជធានីភ្នំពេញ ដោយដកហូតកូនកន្ត្រៃយ៍១។ ចំណែក ជនរងគ្រោះឈ្មោះ កែវ ស្រីទូច ឆ្នាំកំណើត១៩៩៦ មុខរបរ បម្រើការងារនៅខារ៉ាអូខេ (KTV) ស្នាក់នៅផ្ទះជួល ផ្លូវលេ២៧១ សង្កាត់ទឹកល្អក់៣ ខណ្ឌទួលគោក រាជធានីភ្នំពេញ។
សមត្ថកិច្ចបញ្ជាក់ថា ជនរងគ្រោះ និងជនបង្ក ជាអ្នកធ្វើការជាមួយគ្នា ហើយមុនពេលកើតហេតុ ជនរងគ្រោះ និងជនបង្កនៅក្នុងបន្ទប់ផ្លាស់សំលៀកបំពាក់ជាមួយគ្នា ហើយជនបង្កបានឈ្លោះប្រកែកជាមួយជនរងគ្រោះ រឿងដណ្តើមភ្ញៀវ ក៏បានវាយគ្នាដោយចាប់បោចសក់ ដោយជនបង្កមានកូនកន្ត្រៃយ៍ នៅនឹងដៃ ក៏បានចាក់មកលើជនរងគ្រោះ បណ្តាលឲ្យរបួសមុខ ថ្ពាល់ និងដៃ (របួសស្រាល)។
ក្រោយកើតហេតុ សមត្ថកិមូលដ្ឋានកិច្ចបានចុះទៅឃាត់ខ្លួនស្រ្តីជាជនបង្ក ដើម្បីធ្វើសួរនាំ និងកសាងសំណុំរឿងបញ្ជូនមកតុលាការ ដើម្បីចាត់ការតាមផ្លូវច្បាប់៕