ភ្នំពេញៈ បុរសម្នាក់ រងរបួសធ្ងន់ ត្រូវបានដឹកបញ្ជូនទៅសង្គ្រោះនៅមន្ទីរពេទ្យ តែជាអកុសលដោយរបួសធ្ងន់ធ្ងរពេក ជនរងគ្រោះបានដាច់ខ្យល់ស្លាប់នៅក្នុងមន្ទីរពេទ្យ ក្រោយពីជនសង្ស័យមួយក្រុមមានគ្នា៥នាក់ ប្រដាប់ដោយដែកបួនជ្រុង ដែកបំពង់ទីប និងដំបងឈើម្នាក់មួយដើមមកសំពង ជនរងគ្រោះយ៉ាងចាស់ដៃ។
ហេតុការណ៍នេះ បានបង្កឡើងកាលពីវេលាម៉ោង៨យប់ថ្ងៃទី២០ ខែមករា ឆ្នាំ២០១៩ ត្រង់ចំណុចក្រុម៧ ផ្លូវបេតុង ក្នុងភូមិឡកំបោរ ខណ្ឌឬស្សីកែវ សង្កាត់ស្វាយប៉ាក ខណ្ឌឫស្សីកែវ។
ប្រភពព័ត៌មានពីកន្លែងកើតហេតុ បានឲ្យដឹងថា ជនរងគ្រោះឈ្មោះ ខុន ឃីម ភេទប្រុស អាយុ៣៤ឆ្នាំ ជនជាតិខ្មែរ មុខរបរកម្មករសំណង់ ស្នាក់នៅក្រុម៧ ភូមិឡកំបោរ សង្កាត់ស្វាយប៉ាក រងរបួសបែកក្បាលធ្ងន់ធ្ងរ បញ្ជូនទៅសង្គ្រោះនៅមន្ទីរពេទ្យកាល់ម៉ែត (ដោយគ្មានសង្ឃឹមនៅវេលាម៉ោង៤ទៀបភ្លឺ ថ្ងៃទី២១ ខែមករា ឆ្នាំ២០១៩ បានបាត់បង់ជីវិត)។
បើតាមសមត្ថកិច្ច បានឲ្យដឹងថា ករណីនេះ ដំបូងឡើយ កើតចេញពីការទំនាស់ពាក្យសំដីគ្នា បង្កដោយជនបង្កមានគ្នា៥នាក់ ក្នុងវេលាម៉ោង៧យប់ថ្ងៃកើតហេតុ បានប្រមូលលុយគ្នាទិញស្រាបៀរផឹក ដោយឲ្យឈ្មោះ គឹម ហួន ជាអ្នកទៅទិញ ពេលនោះអ្នកទៅទិញ ក៏បានទាស់សំដីជាមួយជនរងគ្រោះនៅកន្លែងទិញស្រា ក្រោយពីប្រកែកគ្នាហើយ ឈ្មោះ គឹម ហួន បានត្រឡប់មកកន្លែងវិញ ហើយរៀបរាប់ប្រាប់បក្ខពួកឲ្យដឹង រួចក៏នាំគា្នទាំង៥នាក់ ទៅរកជនរងគ្រោះវិញ ដោយប្រដាប់ដោយដែកបួនជ្រុង ដែកបំពង់ទីប និងដំបងឈើម្នាក់មួយដើម លុះពេលទៅដល់នៅកន្លែងកើតហេតុខាងលើ ក៏បាននាំគ្នាវាយជនរងគ្រោះ ហើយជនរងគ្រោះក៏បានតដៃមកវិញដែរ ទើបជនបង្កទាំង៥នាក់នោះ ព្រួតវាយជនរងគ្រោះ បណ្តាលឲ្យរងរបួសធ្ងន់ធ្ងរ ដេកស្ដូកស្ដឹងក្នុងថ្លុកឈាមតែម្ដង ហើយនាំគ្នារត់បាត់ស្រមោល ក្រោយមកជនរងគ្រោះត្រូវបានក្រុមគ្រួសារបញ្ជូនទៅសង្គ្រោះនៅមន្ទីរពេទ្យកាល់ម៉ែត។
ក្រោយប្រើហិង្សា សមត្ថកិច្ចក៏បានធ្វើការស្រាវជ្រាវរហូតឈានទៅឃាត់ខ្លួនភាគីបង្កចំនួន៥នាក់នោះ ទី១ឈ្មោះ គឹម ហួន ភេទប្រុស អាយុ៣០ឆ្នាំ ។ ទី២ឈ្មោះ ចេវ ដារា ហៅឡុង ភេទប្រុស អាយុ៣៤ឆ្នាំ។ ទី៣ ឈ្មោះ ខាន់ សុខុន ភេទប្រុស អាយុ២៩ឆ្នាំ។ ទី៤ ឈ្មោះ ភ័ណ្ឌ តុល ភេទប្រុស អាយុ២០ឆ្នាំ ។ ទី៥ ឈ្មោះ ស្រ៊ី វាសនា ហៅពៅ ភេទប្រុស អាយុ១៩ឆ្នាំ ទាំងអស់គ្នាជាជនជាតិខ្មែរ មុខរបរកម្មករសំណង់ ស្នាក់នៅការដ្ឋានសំណង់ ក្នុងក្រុម៧ ភូមិឡកំបោរ សង្កាត់ស្វាយប៉ាក ខណ្ឌឫស្សីកែវ។
បច្ចុប្បន្នជនសង្ស័យខាងលើកំពុងត្រូវបានឃាត់ខ្លួននៅអធិការដ្ឋាននគរបាលខណ្ឌឬស្សីកែវ ដើម្បីសាកសួរ និងកសាងសំណុំរឿងអនុវត្តន៍ទៅតាមនីតិវិធី។ ចំណែកសព ត្រូវបានក្រុមគ្រួសារ ដឹកយកទៅទៅធ្វើបុណ្យតាមប្រពៃណីនៅស្រុកកំណើត៕
