Thursday, January 3, 2019

ឡិច​ស៊ីស RX330 បើកបុកវិមានឯករាជ្យទាំងកំរោល ក្រឡាប់ផ្ញារ​ជើង ម្ចាស់រងរបួសយ៉ាងដំណំ

តាកែវៈ រថយន្តឡិច​ស៊ីសសេរី​ទំនើបមួយគ្រឿង បើកបុកវិមានឯករាជ្យទាំងកំរោល បណ្ដាលឲ្យ​ក្រឡាប់ផ្ញារ​ជើង និងធ្វើឲ្យ​ម្ចាស់ រងរបួសយ៉ាងដំណំ។

គ្រោះថ្នាក់ចរាចរណ៍ រថយន្តបើក​បុកខឿនវិមានឯករាជ្យខេត្តតាកែវនេះ បានកើតឡើងនៅម៉ោង១រំលងអធ្រាត្រថ្ងៃទី៣ ខែមករា ឆ្នាំ២០១៩ ស្ថិតនៅលើកំណាត់ផ្លូវជាតិលេខ២ ចន្លោះគីឡូម៉ែត្រលេខ៧៧-៧៨ ស្ថិតនៅភូមិ០៣ សង្កាត់រកាក្នុង ក្រុងដូនកែវ ខេត្តតាកែវ។

តាមការឲ្យដឹងពីសមត្ថកិច្ចជំនាញក្រុងដូនកែវប្រាប់ថា រថយន្តបង្កម៉ាកឡិចស៊ីស RX330 គ្មានស្លាកលេខ បើកបរដោយឈ្មោះ ហេង សៅបុរី ភេទប្រុស អាយុ៤១ឆ្នាំ មុខរបរអ្នកលក់ដូរ រងរបួសធ្ងន់ និងអ្នករួមដំណើរម្នាក់ឈ្មោះ ស៊ឹម សុឃុន ភេទស្រី អាយុ៣១ឆ្នាំ មុខរបរអ្នកលក់ដូរ រងរបួសស្រាល អ្នក​ទាំងពីរនាក់ រស់នៅភូមិស្នោរ សង្កាត់រកាក្នុង ក្រុងដូនកែវ ខេត្តតាកែវ។

ក្រោយកើតហេតុសមត្ថកិច្ចជំនាញក្រុងដូនកែវ បានចុះធ្វើកំណត់ហេតុ និងយករថយន្តបង្កមករក្សាទុកនៅអធិការដ្ឋាននគរបាលក្រុងដូនកែវ ដើម្បីរង់ចាំដោះស្រាយនៅពេលក្រោយ៕

Feature Ads