header ads

Sponsor

ភ្នំពេញៈ ក្មេងស្ទាវ២នាក់ ជិះម៉ូតូ Today មួយគ្រឿង​ ឌុបគ្នាទៅទិញបារីជក់ គ្រាន់តែងាកមើលមុខក្មេងស្ទាវមួយក្រុមទៀត មានគ្នាជាង២០នាក់​ មកចូលរួមកម្មវិធីខួបកំណើត ​ស្របពេលដែលផឹកស្រវឹងស្រឿងៗផង ក៏ឃើញក្មេងស្ទាវ២នាក់នោះ ជិះម៉ូតូឌុបគ្នាឆ្លងកាត់មុខនៅហាងខារ៉ាអូខេនោះទៀត ទើបងាកមើលមុខគ្នាទៅវិញទៅមក បែរជាឌឺដងដាក់គ្នា រួចនាំគ្នាកាន់ចាន កាន់កែវ សម្រុកចេញពីក្នុងហាង រត់ទៅដេញតាម​ និងគប់សំដៅទៅលើក្មេងស្ទាវទាំង២នាក់នោះ រត់ចូលដល់ក្នុងភូមិស្រែកឆោឡោហៅអ្នកភូមិដទៃទៀត​ ចេញមកតាម​សួរនាំ ផ្អើលសមត្ថកិច្ច និងប្រជាពលរដ្ឋនាំគ្នា​ចោមរោម​ពេញមុខខារ៉ាអូខេ “គ្រួសារ ឡាលីន”​ ទាំងយប់។

ហេតុការណ៍បង្កឲ្យមានភ្ញាក់ផ្អើលនេះ បានកើតឡើងកាលពីវេលាម៉ោង៩៖២០នាទីយប់ ថ្ងៃអង្គារ ទី១៥ ខែមករា​ ឆ្នាំ២០១៩ ស្ថិតតាមបណ្តោយផ្លូ៩៩​ កែងផ្លូវ៤៩៨ ត្រង់ចំណុចហាងខារ៉ាអូខេយីហោខារ៉ាអូខេ “​គ្រួសារ ឡាលីន​ - Lalin Family KTV” ភូមិ៤​ ស្ថិតក្នុងសង្កាត់ផ្សារដើមថ្កូវ ខណ្ឌចំការមន​ រាជធានីភ្នំពេញ។

អ្នកឃើញហេតុការណ៍ផ្ទាល់ បានរៀបរាប់ប្រាប់ឲ្យភ្នាក់ងារ CAM POST ឲ្យដឹងថា នៅមុនកើតហេតុ​ គេឃើញនៅក្នុងហាងខារ៉ាអូខេខាងលើ​ មានរៀបចំកម្មវិធីខួបកំណើត ដោយឃើញមានក្មេងស្ទាវប្រុសស្រី​ ជិះឌុបគ្នា ចូលមកបន្តបន្ទាប់ ក្រោយមកក៏មានក្មេងស្ទាវ២នាក់ ជិះម៉ូតូ Today ពណ៌ស មួយគ្រឿង​ ពាក់ស្លាកលេខ ភ្នំពេញ​ 1Z-8835 ឌុបគ្នា​ បំណងទៅទិញបារីជក់ ដោយធ្វើដំណើរឆ្លងកាត់ពីមុខ​ហាងខារ៉ាអូខេខាងលើ​ ហើយក៏ងាកមើលឃើញមានគេធ្វើកម្មវិធីខួបកំណើត រួចក៏ជិះទៅបាត់។

អ្នកឃើញហេតុការណ៍បន្តថា មួយសន្ទុះក្រោយមកក៏ឃើញក្មេងស្ទាវ២នាក់នោះ​ ជិះត្រលប់មកវិញ រួចងាកមើលទៅកន្លែងគេធ្វើខួបកំណើតនោះទៀត ពេលនោះក៏មានក្មេងស្ទាវមួយក្រុមទៀត មានគ្នាជាង២០នាក់​ មានខ្មែរផង​ វៀតណាម​ផង​ ដែលមកចូលរួមកម្មវិធីខួបកំណើត ក្នុងហាងខារ៉ាអូខេ “គ្រួសារ ឡាលីន”​ ខាងលើនោះ​ ទំនឹងជាផឹកស្រវឹងស្រឿងៗផង​ ខណៈដែលឃើញក្មេងស្ទាវទាំង២នាក់នោះ ជិះម៉ូតូឌុបគ្នាឆ្លងកាត់មុខនោះទៀត ហើយងាកមើលមុខគ្នាទៅវិញទៅមក ទំនងជាឌឺដងដាក់គ្នា ទើបស្រែកដាក់ក្មេងស្ទាវ២នាក់នោះថា “ហែង​ មើលអីហា” ក្មេងស្ទាវទាំង២នាក់នោះក៏ឈប់ម៉ូតូនៅមុខនោះចម្ងាយពីហាងជិត១០ម៉ែត្រ ហើយក៏ឆ្លើយវិញថា​ “គ្រាន់តែខ្ញុំមើលមុខសោះ មិនបានដែរ​” ស្រាប់តែក្រុមក្មេងស្ទាវមានគ្នាជាង២០នាក់នោះ ស្រែកថា​ “ពួកហែងឈ្លើយម៉េសហា” ​ហើយក៏សម្រុកចេញពីក្នុងហាង កាន់ទាំងចាន ទាំងកែវ និងខ្លះទៀតរើសដុំថ្ម​ និងដុំឥដ្ឋ​ ឃើញដូច្នេះក្មេងស្ទាវទាំង២នាក់នោះ ទុកម៉ូតូចោលរត់ចូលក្នុងភូមិ​ ហើយក្រុមក្មេងស្ទាវនោះរត់ដេញតាម​ គប់សំដៅទៅលើក្មេងស្ទាវទាំង២នាក់នោះ រហូតដេញតាមចូលដល់ក្នុងភូមិ ទើបក្មេងទាំង២នាក់នោះ ស្រែកឆោឡោថា​ “ជួយផងគេដេញវ៉ៃខ្ញុំហើយ”។

អ្នកឃើញហេតុការណ៍បន្តទៀតថា បន្ទាប់មកក៏ឃើញមានអ្នកភូមិជាច្រើនទៀត ចេញមកជួយ ហើយរើសដុំថ្ម​គប់ទៅវិញទៅមក​ បណ្ដាលឲ្យក្មេងស្ទាវទាំង២នាក់នោះ រងរបួស​ឈាមពេញដៃ​ ទើបអ្នកភូមិទាំងនោះ​ក៏រត់ចេញមកតាមក្រុមក្មេងស្ទាវមានគ្នាជាង២០នាក់នោះ ហើយឃើញបែកកញ្ចក់ទ្វារហាងខាងមុខ រួចរត់មកចូលពួនក្នុងហាង​បាត់ស្រមោល​អស់ ទើបខឹងចិត្តពេក​មិនឃើញមានអ្នកណាចេញមកដោះស្រាយ​ ក៏នាំគ្នាព្រួតវាយកម្ទេចម៉ូតូ Honda Dream ពណ៌ខ្មៅ​ មួយគ្រឿង​ ពាក់ស្លាកលេខ ភ្នំពេញ​ 1BX-4602 ដែលជារបស់ភាគីក្រុមក្មេងស្ទាវមានគ្នាច្រើនដែលជិះដេញតាមហើយរត់ចោលម៉ូតូនោះ​ ទើបបង្កការភ្ញាក់ផ្អើលប្រជាពលរដ្ឋនាំគ្នា​ចោមរោម​ពេញមុខខារ៉ាអូខេ គ្រួសារ ឡាលីន ​នោះ​ និងរាយការណ៍ប្រាប់សមត្ថកិច្ចមូលដ្ឋានចុះមក​អន្តរាគមន៍​ផងដែរ។

តាមប្រភពព័ត៌មានពីកន្លែងកើតហេតុ បានឲ្យប្រាប់ភ្នាក់ងារ CAM POST ថា បន្ទាប់ពីមានការដេញវាយគ្នាឡើងផ្អើលរួច​ គេឃើញមានកម្លាំងនគរបាលប៉ុស្តិ៍ផ្សារដើមថ្កូវ និងកម្លាំងអាវុធហត្ថខណ្ឌចំការមន​ ចុះមកពិនិត្យមើលជាក់ស្ដែង​ រួចយកម៉ូតូ២គ្រឿង​ មានម៉ូតូ Today មួយគ្រឿង​ និងម៉ូតូ Honda Dream មួយគ្រឿង​)​ យកទៅរក្សាទុកជាបណ្តោះអាសន្ន​ នៅប៉ុស្តិ៍នគរបាលផ្សារដើមថ្កូវ​ ដើម្បីរងចាំភាគីទាំងសងខាងចូលមកដោះស្រាយគ្នា។

ក្រោយមកក្មេងស្ទាវទាំង២នាក់នោះ​ បានទៅដាក់ពាក្យបណ្ដឹងនៅប៉ុស្តិ៍ឲ្យសមត្ថកិច្ចអន្តរាគមន៍តាមច្បាប់ផងដែរ​ មួយសន្ទុះក្រោយមកកម្លាំងនគរបាលប៉ុស្តិ៍ផ្សារដើមថ្កូវ បានមកនាំខ្លួនយុវជនម្នាក់ ជាម្ចាស់ម៉ូតូ Honda Dream ខាងលើនោះ​ យកទៅធ្វើការសាកសួរបំភ្លឺនៅប៉ុស្តិ៍នគរបាលផ្សារដើមថ្កូវ ចំណែកឯក្រុមក្មេងស្ទាវជាង២០នាក់ ដែលនៅសល់មានប្រុសមានស្រីនោះ​ ត្រូវបានម្ចាស់ហាង​ ទូទាត់លើសម្ភារៈខូចខាត​រួចរាល់​សិន​ ទើបអនុញាតឲ្យចេញមកក្រៅ​៕

ហាមដាច់ខាតការយកអត្ថបទទៅចុះផ្សាយឡើងវិញ ឬអានធ្វើជាវីដេអូដោយគ្មានការអនុញ្ញាត!

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post