បន្ទាយមានជ័យៈ អតីតអនុប្រធានមន្ទីរពេទ្យបង្អែកមង្គលបូរី បច្ចុប្បន្នជាអនុប្រធានសុខាភិបាលខេត្តបន្ទាយមានជ័យចូលនិវត្តន៍ លោក ទេព សារ៉េត ត្រូវតុលាការសម្រេចឃុំខ្លួន ពាក់ព័ន្ធនឹងបណ្តឹងបៀតបៀនកេរ្តិ៍ខ្មាស់អ្នកជំងឺ ប្រព្រឹត្តឡើងនៅក្នុងបន្ទប់ព្យាបាល(គេហដ្ឋានខ្លួន) រហូត៤ថ្ងៃជាប់គ្នា។
យោងតាមប្រភព បានឲ្យដឹងថា លោក ទេព សារ៉េត ត្រូវតុលាការដាក់នៅក្រោមការត្រួតពិនិត្យដោយសម្រេចមិនឃុំខ្លួន ព្រោះមានការចចារបង់លុយឲ្យដើមបណ្តឹង ចំនួន១០០០០ដុល្លារ(មួយម៉ឺនដុល្លារ)។
នៅក្នុងដីការសម្រេចមិនឃុំខ្លួនជាបណ្តោះអាសន្ន របស់លោក ម៉ម ច័ន្ទវណ្ណះ ចៅក្រមស៊ើបសួរសាលាដំបូងខេត្តបន្ទាយមានជ័យ និងលោក តេង សាម៉ៃ តំណាងអយ្យការ ក្នុងសំណុំរឿងព្រហ្មទណ្ឌលេខ១០២ ចុះថ្ងៃទី១៨ ខែមករា ឆ្នាំ២០១៩ ដីកាសន្និដ្ឋានបញ្ជូនឲ្យស៊ើបសួរ លេខ៨៧អយខ ចុះថ្ងៃសៅ ១៤កើត ខែបុស្ស ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៩ ខែមករា ឆ្នាំ២០១៩។
ឈ្មោះ ទេព សារ៉េត ភេទប្រុស កើតឆ្នាំ១៩៥៦ សញ្ជាតិខ្មែរ មុខរបរ វេជ្ជបណ្ឌិតផ្នែកជំងឺទូទៅ ដែលសព្វថ្ងៃបានបើកកន្លែងលក់ថ្នាំ ពិនិត្យមើលអេកូសាស្ត្រ និងព្យាបាលជំងឺ នៅភូមិគោកស្វាយឃុំឬស្សីក្រោក ស្រុកមង្គលបូរី ខេត្តបន្ទាយមានជ័យ។
បើតាមប្រភពបែកធ្លាយបានឲ្យដឹងថា អ្នកជំងឺបានដាក់ពាក្យបណ្តឹងទៅតុលាការ ថា លោក ទេព សារ៉េត បានបៀតបៀនកេរ្តិ៍ខ្មាសដល់ទៅ៤ថ្ងៃជាប់ៗគ្នា ដោយប្រព្រឹត្តចាប់ពីថ្ងៃទី១៤-១៥-១៦និង១៧ ក្នុងខែមករា ឆ្នាំ២០១៩។
សូមបញ្ជាក់ថា នៅកន្លែងបើកព្យាបាលរបស់លោក ទេព សារ៉េត គឺមានតែស្លាកយីហោ មើលអេកូសាស្រ្ត មិនអាចមានសិទ្ធិព្យាបាលអ្នកជំងឺនៅកន្លែងនោះបានទេ ប៉ុន្តែជាក់ស្តែងនៅក្នុងផ្ទះលោក ទេព សារ៉េត បានទទួលអ្នកជំងឺឲ្យសម្រាកព្យាបាលជាច្រើនគ្រែ ដូចកន្លែងគ្លីនិកធំៗដែរ។
លោក កែវ សុភ័ត្រា ប្រធានសុខាភិបាលខេត្តបន្ទាយមានជ័យ មិនបានបកស្រាយបញ្ជាក់ពីទីកន្លែងលោក ទេព សារ៉េត អាចទទួលព្យាបាលបានឬអត់នោះទេ គ្រាន់តែលោកបញ្ជាក់ថា ពិតជាមានអ្នកជំងឺប្តឹងមែន តែរឿងនេះគាត់បានដោះស្រាយរួចរាល់អស់ហើយ។៕