ភ្នំពេញៈ រឿងស្ទះចរាចរណ៍នៅភ្នំពេញ ក៏ដូចបណ្ដាខេត្ត ឥឡូវធ្វើឲ្យអ្នកបើកបរត្អូញត្អែរ និងកាន់តែធុញទ្រាន់ទៅៗ ហើយក៏មានការបន្ទោសគ្នាទៅវិញទៅមក ដូចជាខ្លះថា មកពីម៉ូតូបើកចូលក្នុងបន្ទាត់ខណ្ឌបែងចែកផ្លូវហៅថាឡេន (Lane) របស់ឡាន អ្នកម៉ូតូថា ឡានឥឡូវមកដណ្តើមឡេនម៉ូតូ ធ្វើឲ្យអ្នកបើកម៉ូតូឡើងលើចិញ្ចើមផ្លូវ រីឯអ្នកបើកកង់បី ជាពិសេស PassApp ក៏ចេះតែបើកចូលកន្លែងណាក៏ដោយ ឲ្យតែទំនេរចេះតែចូលហើយ រីឯខ្លះទៀតបន្ទោសការចតរថយន្តនៅលើផ្លូវចូលហាង ឬក៏លក់ដូរចូលទ្រូងផ្លូវថ្នល់ ឬក៏យកចំណីផ្លូវធ្វើរោងការ ធ្វើរោងខួបកំណើត ខួបអាពាហ៍ពិពាហ៍របស់អ្នកធំ ឧកញ៉ាៗ ឬពិធីបុណ្យផ្សេងៗដែលបណ្តាលឲ្យស្ទះចរាចរណ៍ផងដែរ។
ប៉ុន្តែទោះបីជាចង្អៀតផ្លូវស្ទះចរាចរណ៍យ៉ាងណាក៏ដោយ ក៏អ្នកបើកបរមានការភ័យខ្លាចនាំគ្នាគេចចូលខាងដែរ នៅពេលឃើញឡានពន្លត់អគ្គិភ័យ ឡានប៉ូលិស ឬក៏ប៉េអឹមស៊ីរ៉ែន បើកស៊ីរ៉ែន ចេញអន្តរាគមន៍ពន្លត់អគ្គិភ័យ និងចេញអន្តរាគមន៍ករណីអ្វីមួយ ឬក៏ក្បួនថ្នាក់ដឹកនាំ គណៈប្រតិភូ គឺត្រូវតែនាំគ្នាអែបចូលខាងអស់។ តែបើឡានពេទ្យសង្គ្រោះបន្ទាន់វិញ សង្កេតឃើញថា ទោះជាខំស៊ីរ៉ែនចង់បែកសំឡេងទៀត ក៏ពុំសូវមានអ្នកបើកបរណាយកចិត្តទុកដាក់អែបខាងឲ្យដែរ ទោះជាផ្លូវទូលាយ ធម្មតាក៏ដោយ ជាពិសេសនោះនៅពេលស្ទះចរាចរណ៍តែម្ដង។
រថយន្តសាម៉ុយមួយគ្រឿង បើកដោយបុរសម្នាក់ ដឹកអ្នកជំងឺម្នាក់ រួមទាំងបងប្អូន២នាក់ទៀត ចេញពីត្រាំខ្នារគោលបំណង យកអ្នកជំងឺមកមន្ទីរពេទ្យភ្នំពេញ បានជ្រុលចង្កូតទៅបុកជាមួយរថយន្តតូយូតាអីរ៉ាស់ បើកដោយបុរសម្នាក់ មានរួមដំណើរ៣នាក់ពេញទំហឹង បណ្ដាលឲ្យរងរបួសទាំងសងខាង។
ឧបទ្ទវហេតុគ្រោះថ្នាក់ចរាចរណ៍នេះ បានកើតឡើងនៅវេលាម៉ោង១០៖៣០នាទីយប់ ថ្ងៃពុធ ទី២០ ខែកុម្ភៈ ឆ្នាំ២០១៩ នៅត្រង់ចំណុចជិតស្ថានីយ៍ប្រេងឥន្ទនៈសូគីមិច មុខផ្ទះលក់បាយឆាមីឆា យីហោ “ម៉ាក់ ស្រីតា” ស្ថិតតាមបណ្ដោយផ្លូវ៣០ម៉ែត្រ ក្នុងសង្កាត់ពងទឹក ខណ្ឌដង្កោ រាជធានីភ្នំពេញ។
តាមប្រភពពីកន្លែងកើតហេតុ បានឲ្យដឹងថា នៅមុនពេលកើតហេតុគេឃើញ រថយន្តសាម៉ុយមួយគ្រឿង ពាក់ស្លាកលេខរដ្ឋ 12 2-0748 ធ្វើដំណើរពីជើងទៅត្បូង ដោយដឹកអ្នកជំងឺពីត្រាំខ្នារ មកភ្នំពេញ បើកក្នុងល្បឿនលឿន មកដល់ចំណុចកើតហេតុ បានជ្រុលចង្កូតទៅបុកជាមួយរថយន្តតូយូតាអីរ៉ាស់ ពណ៌ក្រហម ពាក់ស្លាកលេខ ភ្នំពេញ 2AX-9670 ធ្វើដំណើរពីត្បូងទៅជើងទិសដៅបញ្ច្រាសគ្នា ក្នុងល្បឿនលឿនដូចគ្នាពេញទំហឹង បណ្ដាលឲរថយន្តសាម៉ុយក្រឡាប់ផ្ងារជើង និងរថយន្តតូយូតាធ្លាក់ផ្លូវ តែសំណាងល្អរងរបួសស្រាលទាំងសងខាង ចំណែករថយន្តទាំងពីរគ្រឿងរងការខូចខាតយ៉ាងដំណំ។
ក្រោយពីកើតហេតុ អ្នកជំងឺត្រូវបានបញ្ជូនតាមរថយន្តសាមុយមន្ទីរពេទ្យបង្អែកដង្កោ យកទៅសង្គ្រោះ ហើយនៅកន្លែងកើតហេតុសមត្ថកិច្ចមូលដ្ឋាន បានទាក់ទងជំនាញចុះមកវាស់វែង យករថយន្តទាំង២គ្រឿង ទៅរក្សាទុកនៅការិយាល័យចរាចរណ៍ផ្លូវគោក នៃស្នងការាជធានីភ្នំពេញ ដើម្បីរងចាំដោះស្រាយនៅពេលក្រោយ។
បើទោះបីជាច្បាប់ចរាចរណ៍ផ្លូវគោក បានចែងយ៉ាងច្បាស់ថា រថយន្តសាមុយសង្គ្រោះបន្ទាន់ ត្រូវបានផ្តល់អាទិភាព ក្នុងករណីបំពេញភារកិច្ចសង្គ្រោះបន្ទាន់ នៅមាត្រា ១៦ និងមាត្រា ១៧ ថា៖«...អ្នកបើកបរត្រូវបន្ថយល្បឿនក្នុងករណីដូចខាងក្រោម៖ ... កាលណាមានយានយន្តដែលកំពុងបំពេញភារកិច្ចរបស់នគរបាល យោធា កងរាជអាវុធហត្ថ ក្បួនគណៈប្រតិភូ ក្បួនថ្នាក់ដឹកនាំជាន់ខ្ពស់ យានយន្តពន្លត់អគ្គិភ័យ យានយន្តសង្គ្រោះរបស់មន្ទីរពេទ្យ មានបន្លឺសូរសព្ទ ឬក៏ភ្លើងសញ្ញា ឬក៏យានយន្តផ្សេងទៀត បន្លឺសូរសព្ទ ឬភ្លើងសញ្ញាអ្នកប្រើប្រាស់ផ្លូវទាំងអស់ ត្រូវបន្ថយល្បឿនហើយបើកបរអែបទៅខាងស្តាំ បើចាំបាច់ត្រូវឈប់នៅកៀនបំផុត តាមដែលអាចធ្វើទៅបានដើម្បីសម្រួលផ្លូវឲ្យយានយន្តទាំងនេះ ធ្វើដំណើរប្រកបដោយសុវត្ថិភាព»៕