ភ្នំពេញៈ អ្នកគ្រូប្រចាំថ្នាក់ទី២ក សាលាបឋមសិក្សាច្រាំងចំរេះ ត្រូវម្តាយកូនសិស្សធ្វើដំណើរទៅដាក់ពាក្យបណ្តឹងនៅប៉ុស្តិ៍ច្រាំងចំរេះទី២ កាលពីរសៀលថ្ងៃទី២១ ខែកុម្ភៈ បន្ទាប់ពីប្រើហិង្សាដោយយកដៃកក់សិស្សពីក្រោយ បណ្តាលឲ្យជាំទាំងដុំ។
អ្នកគ្រូដែលត្រូវអាណាព្យាបាលសិស្សប្តឹងនោះ ឈ្មោះ ផ្លុង គឹមហេង ជាប្រពន្ធនាយកសាលាបឋមសិក្សាច្រាំងចំរេះ និងជាគ្រូប្រចាំថ្នាក់ទី២ក។ ចំណែកម្តាយក្មេង ដែលប្តឹងនោះឈ្មោះ ម៉ៅ សុភារម្យ អាយុ៣៦ឆ្នាំ។ រីឯកូនសិស្សឈ្មោះ បូ រិទ្ធសុវណ្ណដាលិន ភេទស្រី អាយុ៧ឆ្នាំ។
តាមម្តាយក្មេងស្រី បានអោយដឹងថា អ្នកគ្រូប្រចាំថ្នាក់រូបនោះ បានប្រើហិង្សាមកលើកូនស្រីរបស់គាត់ជាច្រើនដងមកហើយ។ នៅព្រឹកថ្ងៃទី២១ ខែកុម្ភៈ នៅពេលកូនស្រីត្រឡប់មកពីរៀនដោះអាវឃើញជាំខ្នង ក៏បានសួរនាំដឹងថា អ្នកគ្រូប្រចាំថ្នាក់ប្រើហិង្សា ក៏នាំកូនមកប្តឹងតែម្តង។
អាណាព្យាបាលរូបនោះ ក៏បានចាត់ទុកថា ការប្រើហិង្សានេះ ជាអំពើឃោរឃៅ និងមានចរិតព្រៃផ្សៃពីសំណាក់គ្រូបង្រៀន ដែលមានតួនាទីអប់រំណែនាំ មិនត្រូវប្រើអំពើហិង្សាលើកុមារដែលជាសិស្សនោះទេ។ ទោះបីជាយ៉ាងណាមានមតិខ្លះថា ការវាយប្រៀនប្រដៅគោលបំណងដើម្បីអោយក្មេងចេះ តែវាជ្រុលដៃ។
តាមលោកនាយប៉ុស្តិ៍ច្រាំងចំរេះទី២ បានអោយដឹងថា នៅព្រឹកនោះនៅពេលអ្នកគ្រូហៅសិស្សឡើងក្តាខៀនធ្វើលេខគុណអត់ចេះ ក៏បានវាយខ្នងមួយដៃជ្រុល បណ្តាលឲ្យជាំតែម្តង។
កន្លងមកក្មេងនោះរពិល ត្រូវអ្នកគ្រូប្រចាំថ្នាក់វាយជាច្រើនលើក នឹងបន្ទាត់តែលើកនេះវាយនឹងដៃ ទើបបណ្តាលឲ្យជាំ។
បន្ទាប់ពីម្តាយដាក់ពាក្យបណ្តឹង នៅវេលារសៀលនោះ នគរបាលក៏បានហៅអ្នកគ្រូ ព្រមទាំងនាយកសាលា ដែលជាប្តីមកសាកសួរ ព្រមទាំងធ្វើការសម្របសម្រួលគ្នា ដោយអ្នកគ្រូនិងលោកនាយក ក៏បានសុំទោស ហើយនគរបាលធ្វើកិច្ចសន្យាអប់រំឈប់ប្រើហិង្សារួចឲ្យត្រឡប់ទៅវិញ៕