ភ្នំពេញៈ ប្រុងប្រយ័ត្នទាំងអស់គ្នា មានក្រុមចោរ២នាក់ ប្រដាប់ដោយកាំភ្លើងខ្លីមួយដើម បានជិះម៉ូតូឌុបគ្នា ធ្វើល្បិចជាមកទិញទឹកសុទ្ធ រួចចូលទៅធ្វើសកម្មភាពភ្ជង់ប្លន់ យកទ្រព្យសម្បត្តិ ពីនារីរូបស្រស់៣នាក់ជាភ្ញៀវ កំពុងធ្វើសក់ ផាត់មុខ ក្នុងហាង “កន្និកា ស្រីទូច អ៊ុតសក់” យកបានទូរស័ព្ទ កាបូប និងលុយមួយចំនួនទៀត រួចគេចខ្លួនបាត់ដោយសុវត្ថិភាព បង្កឲ្យមានការភ្ញាក់ផ្អើលដល់អ្នកជិតខាង រាយការណ៍ប្រាប់សមត្ថកិច្ច ចុះមកធ្វើការសាកសួរភ្លាមៗផងដែរ។
ហេតុការណ៍ភ្ជង់ប្លន់នេះ បង្កឲ្យមានការភ្ញាក់ផ្អើលឡើងនៅវេលាម៉ោងប្រមាណ៩យប់ ថ្ងៃព្រហស្បតិ៍ត ទី២៦ ខែកុម្ភៈ ឆ្នាំ២០១៩ នៅត្រង់ចំណុចហាងអ៊ុតស៊ក់មួយកន្លែងឈ្មោះ “កន្និកា ស្រីទូច អ៊ុតសក់” ក្បែរខារ៉ាអូខេ បេសស្តារ Best Star នៅលើផ្លូវ៥៩៨ កែងផ្លូវ៣១៧ ស្ថិតក្នុងសង្កាត់បឹងកក់២ ខណ្ឌទួលគោក រាជធានីភ្នំពេញ។
តាមប្រភពព័ត៌មានពីម្ចាស់ហាងខាងលើ បានឲ្យដឹងថា មុនពេលកើតហេតុ មានភ្ញៀវនារីៗ បានមកធ្វើសក់ ផាត់មុខ ក្នុងហាងរបស់ខ្លួន បន្ទាប់មកក៏មានជនសង្ស័យ២នាក់ ជិះម៉ូតូសង់ប៉ិចមួយគ្រឿង (មិនចាំស្លាកលេខ) ឌុបគ្នាមកឈប់មុខហាង រួចធ្វើល្បិចជាទិញទឹកសុទ្ធ ដោយម្នាក់អង្គុយលើម៉ូតូ និងម្នាក់ទៀត ដើរចូលមក។
ម្ចាស់ហាងបន្តថា មិនបាន២នាទីផង ពួកវាបានដើរចូលមកធ្វើសកម្មភាពដកកាំភ្លើងខ្លីភ្ជង់គំរាម នារី៣នាក់ដែលជាភ្ញៀវនៅក្នុងហាង ប្លន់យកទូរស័ព្ទដៃ ម៉ាក IPhone-6 ពីរគ្រឿង ពីឈ្មោះ ស្រីពៅ និងកាបូបស្ពាយ១ មានលុយមួយចំនួន ពីនារីម្នាក់ទៀតឈ្មោះ អ៉ឹង ចន្ទ័ដារ៉ាលីន និងនារីម្នាក់ទៀតមិនស្គាល់ឈ្មោះ យកបានលុយមួយចំនួនថែមទៀត រួចនាំគ្នាប្រញាប់ប្រញាល់ រត់ចេញមកជិះម៉ូតូឌុបគ្នាគេចខ្លួនចេញបាត់ស្រមោល ទើបនាំគ្នាឆោឡោ បង្កឲ្យមានការភ្ញាក់ផ្អើលដល់អ្នកជិតខាង រាយការណ៍ប្រាប់សមត្ថកិច្ច ចុះមកធ្វើការសាកសួរភ្លាមៗផងដែរ។
បច្ចុប្បន្ន ក្រោយពីសមត្ថកិច្ចសាកសួរបំភ្លឺពីនារីរងគ្រោះហើយបាននាំនារីរងគ្រោះមកដាក់ពាក្យបណ្ដឹង នៅប៉ុស្ដិ៍នគរបាលរដ្ឋបាលបឹងកក់ទី២ ដើម្បីធ្វើការស្រាវ កំណត់មុខសញ្ញាក្រុមចោរប្លន់ប្រដាប់អាវុធនោះបន្តទៀត៕
