កោះកុងៈ ខ្លាំងណាស់តើ លោក អ៊ី ម៉េងលាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកោះកុង ដែលទើបតែឡើងថ្មីជំនួសលោកប្រធានមន្ទីរចាស់ ដែលមានកំហុសធ្ងន់ធ្ងរ ត្រូវបានមន្ត្រីក្រោមឱវាទ ប្តឹងពីបទលួចលក់ដីរដ្ឋនោះ ឥឡូវកំពុងដើរតាមគន្លង លោកប្រធានចាស់ និងខ្លាំងជាងលោកប្រធានចាស់ទៅទៀត ព្រោះលោកប្រធានចាស់ហ៊ានលក់ដីមន្ទីរតែកន្លះហិកតាប៉ុណ្ណោះ។ ចំណែកលោកប្រធានថ្មីឈ្មោះ អ៊ី ម៉េងលាង ថ្លើមធំហ៊ានយកដីមន្ទីរដល់ទៅជាង១០ហិកតាឯណោះ ទៅជួលឱ្យបុគ្គលឯកជន បើកហាងលាងរថយន្ត ទីតាំងធ្វើអាជីវកម្មផ្សេងៗ និងពុះឡូតិ៍លក់ចែកគ្នា ។
រឿងរ៉ាវបែកពាងប្រហុករបស់លោកប្រធានថ្មីរូបនេះ កើតចេញពីមន្ត្រីក្រោមឱវាទរាយការណ៍ដោយផ្ទាល់ទៅអធិការកិច្ចរបស់ក្រសួងកសិកម្ម ហើយត្រូវបានក្រុមន្ត្រីអធិការកិច្ចចុះស្រាវជ្រាវស៊ើបអង្កេតកាលពីថ្ងៃទី២៧ ខែសីហា ឆ្នាំ២០១៨កន្លងទៅ ។
ប្រភពមន្ត្រីក្រោមឱវាទបានទម្លាយឱ្យដឹងទៀតថា បន្ទាប់ពីក្រុមអធិការកិច្ចចុះស្រាវជ្រាវស៊ើបអង្កេតរួចបាន២ថ្ងៃ រដ្ឋមន្ត្រីក្រសួងកសិកម្ម បានចេញលិខិតព្រមានមួយលេខ៨៥៦៣ ក.ស.ក ចុះថ្ងៃទី២៩ ខែសីហា ឆ្នាំ២០១៨ ទៅលើកំហុសឆ្គងរបស់លោក អ៊ី ម៉េងលាង ចំនួន១៦ចំណុច ដែលក្នុងនោះ ចំណុចទី១៤ បានបញ្ជាឱ្យលោកប្រធានមន្ទីររូបនេះ ចុះស្រាវជ្រាវរកដីថ្នាលដាំដើមកាស្យារបស់ខណ្ឌរដ្ឋបាលព្រៃឈើចំនួន៣ទីតាំង ដែលទីតាំងទី១- មានចំនួន២២៥.០០០ម៉ែត្រការ៉េ ទីតាំងទី២-មានចំនួន១៤១.៨០៩ម៉ែត្រការ៉េ និងទីតាំងទី៣-ចំនួន ១០.០៨៦ម៉ែត្រការ៉េ ។
ប្រភពដដែលបានទម្លាយថា រហូតមកដល់ពេលនេះ លោក អ៊ី ម៉េងលាង នៅមិនទាន់បានធ្វើការបំភ្លឺឆ្លើយតបទៅអគារធិការដ្ឋាននៃក្រសួងកសិកម្មវិញនៅឡើយទេ ហើយក្រុមមន្ត្រីអធិការកិច្ច ក៏សម្ងំស្ងាត់ឈឹងដែរ៕
