ភ្នំពេញៈ អធិការនគរបាលខណ្ឌមានជ័យ លោកវរសេនីយ៍ឯក តេង ស៊ីណូ បានជំរុញ និងផ្ដែផ្ដាំទៅកម្លាំងនគរបាលខណ្ឌមានជ័យទាំងអស់ ត្រូវបង្កើនកិច្ចការពារសន្តិសុខជូនប្រជាពលរដ្ឋ និងរក្សាសណ្តាប់ធ្នាប់សង្គមឲ្យកាន់តែល្អ ហើយលោកនឹងចាប់ដៃជាមួយកម្លាំងអាវុធហត្ថខណ្ឌមានជ័យ បើកប្រតិបត្តិការលក្ខណៈទ្រង់ទ្រាយធំរួមគ្នាមួយ បង្ក្រាបទីតាំងបទល្មើសខុសច្បាប់មួយ ដើម្បីបង្កើនចំណងមិត្តភាព និងជាស្នាដៃចុងក្រោយ ហើយការងារនេះ លោកនៅមានភារកិច្ចមើលការខុសត្រូវ មុនពេលលោកចូលនិវត្តន៍ក្នុងអំឡុងពេលជិតចូលឆ្នាំខ្មែរឆាប់ៗខាងមុខនេះ។ តំណែងរបស់លោក ជំនួសដោយលោក ម៉េង វិមានតារា បច្ចុប្បន្នជាអធិការរងទទួលផែនព្រហ្មទណ្ឌ នៃអធិការដ្ឋាននគរបាលខណ្ឌមានជ័យ។
ការប្រកាសនេះ បានធ្វើឡើងនៅក្នុងពិធីជប់លៀងមួយកាលពីយប់ថ្ងៃទី១២ ខែកុម្ភៈ ឆ្នាំ២០១៩នេះ ដោយមានការចូលរួមពីអស់លោកអធិការរង នាយផ្នែក នាយប៉ុស្តិ៍ មេបញ្ជាការ មេបញ្ជាការរង និងកម្លាំងនគរបាល និងអាវុធហត្ថ ព្រមទាំងភ្ញៀវកិត្តិយសជាច្រើនរូបទៀតផងដែរ។
លោកវរសេនីយ៍ឯក តេង ស៊ីណូ អធិការនគរបាលខណ្ឌមានជ័យ នឹងជាអធិការវ័យចំណាស់មួយរូប បានប្រកាសនៅលើវេទិកាថា មុនពេលប្រកាសផ្ទេរភារកិច្ច និងបញ្ចប់អាណត្តិរបស់លោកឆាប់ៗខាងមុខនេះ លោកនឹងសហការជាមួយលោក ហែម រិទ្ធី មេបញ្ជាការកងរាជអាវុធហត្ថខណ្ឌមានជ័យ ដើម្បីឲ្យកម្លាំងនគរបាលខណ្ឌមានជ័យ សហការជាមួយកម្លាំងអាវុធហត្ថខណ្ឌមានជ័យ បើកប្រតិបត្តិការលក្ខណៈទ្រង់ទ្រាយធំរួមគ្នាមួយ បង្ក្រាបទីតាំងបទល្មើសខុសច្បាប់មួយ នៅក្នុងខណ្ឌមានជ័យ ដើម្បីបង្កើនចំណងមិត្តភាព និងជាស្នាដៃចុងក្រោយ របស់លោកមុននឹចូលនិវត្តន៍ផងដែរ។
លោកវរសេនីយ៍ឯក តេង ស៊ីណូ បានកាន់តំណែងជាអធិការខណ្ឌមានជ័យ អស់រយៈកាលប្រមាណជាង៤ឆ្នាំ មុនចូលនិវត្តន៍ ក៏បានប្រកាសដល់លោកអធិការរង នាយផ្នែក នាយប៉ុស្តិ៍ និងកងកម្លាំងនគរបាល នៃអធិការដ្ឋាននគរបាលខណ្ឌមានជ័យទាំងអស់ ត្រូវធ្វើយ៉ាងណា ពង្រឹងលើការងាររួមគ្នា ជាពិសេសត្រូវសហការគ្នា ជាមួយកម្លាំងគណៈបញ្ជាការឯកភាពខណ្ឌមានជ័យ និងកម្លាំងអាវុធហត្ថខណ្ឌមានជ័យ ឲ្យបានម៉ឺងម៉ាត់ ដើម្បីចូលរួមបង្កើនការយកចិត្តទុកដាក់ ក្នុងការចេញល្បាតពួនស្ទាក់ និងត្រៀមលក្ខណៈទប់ស្កាត់បទល្មើសផ្សេងៗបន្តទៀត ដើម្បីការពារសុវត្ថិភាពជូនបងប្អូនប្រជាពលរដ្ឋ ក្នុងមូលដ្ឋានខណ្ឌមានជ័យ។
គួររំលឹកឡើងវិញថា លោក តេង ស៊ីណូ ដំបូងឡើយជាអធិការរងនគរបាលខណ្ឌច្បារអំពៅ តែត្រូវបានប្រកាសតែងតាំងជាអធិការនគរបាលខណ្ឌមានជ័យ ជំនួសលោក ហ៊ី ណារិន ត្រូវបានអង្គភាពប្រឆាំងអំពើពុករលួយ កោះហៅទៅសាកសួរ ហើយត្រូវបានឃាត់ខ្លួនកាលពីថ្ងៃ ទី៣០ ខែកញ្ញា ឆ្នាំ២០១៤ ពាក់ព័ន្ធការប្រព្រឹត្តអំពើពុករលួយ កិបកេងលុយរដ្ឋ។
សូមបញ្ជាក់ថា លោក ហ៊ី ណារិន អតីតអធិការនគរបាលខណ្ឌមានជ័យ ត្រូវបានអង្គភាពប្រឆាំងអំពើពុករលួយ កោះហៅទៅសាកសួរ ហើយត្រូវបានឃាត់ខ្លួនកាលពីថ្ងៃទី៣០ ខែកញ្ញា ឆ្នាំ២០១៤ ជាប់ពាក់ព័ន្ធនឹងការកិបកេងលុយបុគ្គលិក ក្រោមឱវាទមានចំនួនជាង ២,៧០០លានរៀល (ស្មើជិត ៧០ម៉ឺនដុល្លារ) ហើយនិងជាប់ចោទចំនួន ៨ករណីផ្សេងថែមទៀត ក្នុងការដែលគាត់បានប្រព្រឹត្តចាប់ពី ឆ្នាំ២០១២ ដល់ ឆ្នាំ២០១៤។
បន្ទាប់ពីតួនាទីអធិការនេះនៅទំនេរជិតបីខែ លោក តេង ស៊ីណូ ត្រូវបានប្រកាសតែងតាំង ជាអធិការនគរបាលខណ្ឌមានជ័យ ដែលបានប្រព្រឹត្តទៅកាលពីព្រឹកថ្ងៃទី១៥ ខែធ្នូ ឆ្នាំ២០១៤កន្លងទៅនេះ នៅស្នងការដ្ឋាននគរបាលរាជធានីភ្នំពេញ ក្រោមអធិបតីភាព អតីតស្នងការនគរបាលរាជធានីភ្នំពេញ ឧត្តមសេនីយ៍ ជួន សុវណ្ណ។
បន្ទាប់ពីឡើងកាន់តំណែងជាអធិការខណ្ឌមានជ័យ លោកវរសេនីយ៍ឯក តេង ស៊ីណូ ក្នុងនាមជាអធិការនគរបាលខណ្ឌ លោកបានដឹកនាំ បង្កើនការងារបង្ការ បង្ក្រាប ការពារសន្តិសុខ សុវត្ថិភាពសណ្ដាប់ធ្នាប់ ព្រមជាមួយគ្នាលោកក៏បានដាក់ផែនការបន្ថែមទៀត ដល់អធិការទទួលបន្ទុកផ្សេងៗ និងប៉ុស្តិ៍រដ្ឋបាលទាំង៧ និងកងកម្លាំងនគរបាលគ្រប់ថ្នាក់ ដូចជា៖ ការងារប្រឆាំងគ្រឿងញៀនបន្តយុទ្ធនាការបង្ក្រាបគ្រឿងញៀន និងយកចិត្តទុកដាក់បង្ក្រាបមេក្លោងជួញដូរអោយបាន។ ការងារព្រហ្មទណ្ឌ៖ពង្រឹងសមត្ថភាពបង្កា បង្ក្រាប ត្រូវពិនិត្យឡើងវិញ គោលដៅប្រទាក់ក្រឡា អោយបានត្រឹមត្រូវ និងល្បាតពិនិត្យតាមគោលដៅ និងបើកើតមានបទល្មើសត្រូវបង្ក្រាបអោយបាន។ ថ្នាក់ប៉ុស្តិ៍នគរបាលរដ្ឋបាល ពាក់ព័ន្ធឥរិយាបថ គឺធ្វើបានល្អជាមួយប្រជាពលរដ្ឋ តែសូមបន្តយកចិត្តទុកបន្ថែមទៀតលើការងារផ្តល់សេវាជូនប្រជាពលរដ្ឋ។ ការងារភូមិឃុំមាន សុវត្ថិភាព សូមកោតសសើរដល់ប៉ុស្តិ៍ ដែលបានខិតខំអនុវត្តកន្លងមក និងសូមបន្តយកចិតទុកដាក់ ផ្សព្វផ្សាយបន្ថែមទៀត និងជំរុញឲប្រជាពលរដ្ឋចូលរួមអនុវត្ត និងផ្តល់ព័ត៌មាន។ និងត្រូវតែពង្រឹងគោលជំហរ សតិអារម្មណ៍ ឲ្យបានល្អ ហើយត្រូវជឿជាក់លើរាជរដ្ឋាភិបាល ការពារសមិទ្ធិផលដែលរដ្ឋាភិបាលបានកសាង ស្របតាមរបបប្រជាធិបតេយ្យ សេរីពហុបក្ស និងនីតិរដ្ឋ៕
