√ RX330 ផ្ទុះកង់មុខ រេចង្កូតទៅបុកទ្រូងផ្លូវ មុខរ៉េនក្លឹប បាក់អស់៣ផ្ទាំង ខ្ទាតទៅប៉ះរថយន្ត NAVARA មួយគ្រឿងទៀត ទាំងថ្ងៃ

ភ្នំពេញៈ ស្ត្រីម្នាក់បើករថយន្ដ LEXUS RX330 ផ្ទុះបែកកង់មុខខាងឆ្វេង ក៏រេចចង្កូតទៅបុករបាំងថ្មក្បាលព្រួញពុះចែកទ្រូងផ្លូវ នៅមុខរ៉េនក្លឹប បណ្ដាលឲ្យរបាំងថ្មខូចខាតអស់៣ផ្ទាំង ខ្ទាតទៅប៉ះរថយន្ត NISSAN NAVARA មួយគ្រឿងទៀត បណ្ដាលឲ្យរងការខូចខាតបន្តិចបន្តួចប៉ុណ្ណោះ ចំណែករថយន្តបង្ករងការខូចខាតខ្ទេចផ្នែកមុខយ៉ាងដំណំ។

គ្រោះថ្នាក់ចរាចរណ៍នេះ បានកើតឡើងនៅវេលាម៉ោង២៖១០នាទីរសៀល ថ្ងៃចន្ទ ទី១១ ខែកុម្ភៈ ឆ្នាំ២០១៩នេះ នៅត្រង់ចំណុចមុខសាខាឆ្នោតឡាក់គីដ្រាហ្គនឡូតូ (ជិតរ៉េនក្លឹប) ស្ថិតលើកំណាត់ផ្លូវជាតិលេខ២ ភូមិទួលរកា២ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។

សាក្សីដែលឃើញហេតុការណ៍ផ្ទាល់បានរៀបរាប់ភ្នាក់ងារ ខេមប៉ុស្តិ៍ ឲ្យដឹងថា មុនពេលកើតហេតុ គេឃើញរថយន្ដបង្ក ម៉ាក LEXUS RX330 ពណ៌ស ពាក់ស្លាកលេខភ្នំពេញ 2V-5798 បើកបរដោយស្ត្រីម្នាក់ រួមដំណើរជាមួយស្ត្រីម្នាក់ទៀត បានធ្វើដំណើរពីត្បូងទៅជើង ក្នុងល្បឿនគួរសម លុះមកដល់ចំណុចកើតហេតុ រថយន្តបានផ្ទុះបែកកង់មុខខាងឆ្វេង ទើបធ្វើឲ្យរេចង្កូតទៅបុករបាំងថ្មក្បាលព្រួញពុះចែកទ្រូងផ្លូវពេញទំហឹងតែម្ដង ធ្វើអោយរបាំងថ្មខូចខាតអស់៣ផ្ទាំង ខ្ទាតទៅប៉ះរថយន្ត NISSAN NAVARA មួយគ្រឿងទៀត ដឹកឈើនិងដែកសំណង់ ពាក់ស្លាកលេខភ្នំពេញ 2AK-6819 បណ្ដាលឲ្យរងការខូចខាតផ្នែកខាងឆ្វេងយ៉ាងដំណំផងដែរ ចំណែកឯរថយន្តបង្ករងការខូចខាតខ្ទេចផ្នែកខាងឆ្វេងនិងខាងមុខខ្ទេចយ៉ាងដំណំ និងផ្ទុះកង់ខាងឆ្វេងផងដែរ។

ក្រោយមកម្ចាស់រថយន្ត NISSAN NAVARA បានបើករថយន្តមកអែបខាងសិន ដើម្បីរង់ចាំធ្វើការដោះស្រាយគ្នា ព្រោះខ្លាចកកស្ទះចរាចរណ៍។

ក្រោយកើតហេតុសមត្ថកិច្ចប៉ុស្តិ៍នគរបាលចាក់អង្រែក្រោម បានចុះមកកន្លែងកើតហេតុ រួចទាក់ទងទៅកាន់ផ្នែកចរាចរណ៍ខណ្ឌមានជ័យ ចុះមកពិនិត្យមើលជាក់ស្ដែង ហើយបានរាយការណ៍ទៅកាន់សមត្ថកិច្ចជំនាញ ដើម្បីចុះមកធ្វើការវាស់វែង រួចយករថយន្ដបង្កហេតុ ទៅរក្សាទុកនៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីដោះស្រាយចំពោះការខូចខាតទ្រព្យសម្បត្តិរបស់រដ្ឋទៅតាមផ្លូវច្បាប់៕