ភ្នំពេញៈ រថយន្តកូរ៉េធុនធំមួយគ្រឿង ដឹកទឹកកកអនាម័យ យកទៅដាក់ឲ្យម៉ូយ សង្ស័យអ្នកបើកបរអត់ងងុយ ងោកមួយភាំង ក៏រេចង្កូតចូលទៅផ្លូវម្ខាងទៀត សំណាងម៉ូតូមួយគ្រឿងទៀតគេចផុត ទើបផ្អៀងរហូតក្រឡាប់តែម្ដង បណ្ដាលឲ្យបាក់ជញ្ជាំងនិងតំបូលរថយន្ត ចាក់ទឹកកកចោលរាយប៉ាយពេញផ្លូវ កាលពីវេលាម៉ោង៤៖២០នាទីទៀបភ្លឺ ឈានចូលថ្ងៃសុក្រ ទី៨ ខែមីនា ឆ្នាំ២០១៩ នៅតាមបណ្តោយផ្លូវ៦០ម៉ែត្រ ជិតការដ្ឋានអាគារខ្ពស់ ស្ថិតក្នុងភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
ប្រភពព័ត៌មានពីអ្នកបើកបររថយន្តដឹកទឹកកកខាងលើ បានរៀបរាប់ប្រាប់ឲ្យភ្នាក់ងារ CAM POST ថា នៅមុនពេលកើតហេតុ រូបគាត់បានបើករថយន្តកូរ៉េដឹកទឹកកកខាងលើ ពណ៌ស ពាក់ស្លាកលេខ កណ្ដាល 3A-1367 ដឹកទឹកអនាម័យដុំៗ និងល្អិតៗ ដែលច្រកបាវរួចហើយនោះ យកទៅដាក់ឲ្យម៉ូយនៅតាមកន្លែងផ្សេងៗ និងដេប៉ូផ្សេងៗ ដោយធ្វើដំណើរតាមបណ្តោយផ្លូវ៦០ម៉ែត្រ ក្នុងទិសដៅពីត្បូងទៅជើង លុះដល់ចំណុចកើតហេតុខាងលើ ស្រាប់តែងងុយគេងហើយក៏ងោកមួយភាំង ទើបរេចង្កូតចូលទៅផ្លូវម្ខាងទៀត ហើយក៏មានម៉ូតូមួយគ្រឿងទៀតធ្វើដំណើរពីជើងមកត្បូងដែរ តែចេះអ្នកបើកម៉ូតូគេចផុត ហើយរថយន្តបានផ្អៀងរហូតក្រឡាប់តែម្ដង បណ្ដាលឲ្យបាក់ជញ្ជាំងរថយន្ត និងតំបូលរថយន្ត ចាក់ទឹកកកចោលរាយប៉ាយពេញផ្លូវតែម្តង និងបណ្ដាលឲ្យទឹកកកកន្លះឡានប្រលាក់ដីខ្សាច់អស់ប្រើលែងបាន និងខ្លះទៀតនៅល្អ អាចយកទៅប្រើប្រាស់បាន។
ចំណែកឯអ្នកបើកបរ និងអ្នករួមដំណើរជាមួយ មិនមានរបួសអ្វីនោះទេ គ្រាន់តែភ័យតក់ស្លុតតែប៉ុណ្ណោះ បង្កឲ្យមានការភ្ញាក់ផ្អើលដល់អ្នកដំណើរឆ្លងកាត់នោះឃើញ រាយការណ៍ប្រាប់សមត្ថកិច្ចមូលដ្ឋានចុះមកពិនិត្យផងដែរ។
ភ្លាមនោះ អ្នកបើកបររថយន្តក៏ប្រញាប់ទូរស័ព្ទប្រាប់ឲ្យបុរសដែលជាមេការបានដឹង ហើយបើករថយន្តកូរ៉េ ដឹកទឹកកកមួយគ្រឿងទៀតមកដល់កន្លែងកើតហេតុ ដើម្បីសាងយកទឹកកកដែលនៅល្អៗ ទៅដាក់ឲ្យម៉ូយបន្តទៀត ចំណែកឯទឹកកកដែលប្រលាក់ដីខ្សាច់នោះ ត្រូវបានកម្មករចាក់ទឹកកកចោល ប្រមូលយកតែបាវប៉ុណ្ណោះ។
ក្រោយពេលកើតហេតុ សមត្ថកិច្ចមូលដ្ឋានប៉ុស្តិ៍នគរបាលចាក់អង្រែលើ ក៏បានចុះមកកន្លែងកើតហេតុពិនិត្យមើលជាក់ស្ដែងដែរ គឺមិនប៉ះពាល់ដល់សម្បត្តិរដ្ឋនោះទេ និងអនុញ្ញាតឲ្យអ្នកបើកបររថយន្តនោះ ហៅរថយន្តមកស្ទូចយករថយន្តទៅជួសជុលដោយខ្លួនឯងតែម្ដង៕