ភ្នំពេញៈ លាន់ដូចរន្ទះ! បុរសម្នាក់ ស្រវឹងធ្លាក់ភ្នែក បើកបររថយន្ត LEXUS RX400H មួយគ្រឿង យ៉ាងលឿន ទៅបុករបាំងថ្មពុះចែកផ្លូវ បណ្ដាលឲ្យរថយន្តរងការខូចខាតរថយន្តខាងមុខផ្នែកខាងឆ្វេងយ៉ាងដំណំ បើកទៅមុខលែងរួច ត្រូវពលរដ្ឋធ្វើដំណើរឆ្លងកាត់រាយការណ៍ប្រាប់ឲ្យសមត្ថកិច្ចចុះមកពិនិត្យមើលជាក់ស្ដែង និងមិនបណ្ដាលឲ្យអ្នកបើកបររងរបួសនោះទេ។
ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលា៣៖០៥នាទីទាបភ្លឺ ឈានចូលថ្ងៃសុក្រ ទី៨ ខែមីនា ឆ្នាំ២០១៩នេះ នៅតាមបណ្ដោយមហាវិថីសហព័ន្ធរុស្ស៊ី នៅត្រង់ចំណុចស្តុបសួនច្បារក្ដាន់២ ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
ប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញមានរថយន្ត ម៉ាក LEXUS RX400h មួយគ្រឿង ពណ៌ស្ករ ពាក់ស្លាកលេខ ភ្នំពេញ 2AG-3186 បើកបរដោយបុរសម្នាក់ ក្នុងស្ថានភាពស្រវឹងស្រាជោគជាំ ធ្វើដំណើរតាមបណ្ដោយផ្លូវសហព័ន្ធរុស្ស៊ី ក្នុងល្បឿនយ៉ាងលឿន ទិសដៅពីកើតទៅលិច លុះមកដល់ចំណុចកើតហេតុខាងលើ ស្រាប់តែជ្រុលទៅបុករបាំងថ្មពុះចែកផ្លូវ លាន់ដូចរន្ទះ បណ្ដាលឲ្យរថយន្តរងការខូចខាតផ្នែកឆ្វេងយ៉ាងដំណំ និងផ្ទុះកង់មុខខាងឆ្វេង បើកទៅមុខលែងរួច ចំណែកអ្នកបើកបររថយន្ត មិនមានរបួសនោះទេ ហើយត្រូវបានប្រជាពលរដ្ឋធ្វើដំណើរឆ្លងកាត់ រាយការណ៍ប្រាប់ឲ្យសមត្ថកិច្ចមូលដ្ឋានចុះមកពិនិត្យមើលជាក់ស្ដែង។
ក្រោយពេលកើតហេតុ សមត្ថកិច្ចមូលដ្ឋានប៉ុស្តិ៍នគរបាលស្រះចក បានចុះមកដល់កន្លែងកើតហេតុ រួចរាយការណ៍ប្រាប់សមត្ថកិច្ចផ្នែកវាស់វែង នៃអធិការដ្ឋាននគរបាលខណ្ឌដូនពេញ ចុះមកពិនិត្យមើលជាក់ស្ដែង និងរាយការណ៍ប្រាប់សមត្ថកិច្ចជំនាញ ចុះធ្វើការវាស់វែង និងស្ទូចយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការនគរបាលរាជធានីភ្នំពេញ រងចាំដោះស្រាយសងការខូចខាតតាមផ្លូវច្បាប់៕