ភ្នំពេញៈ ស្នងការនគរបាលរាជធានីភ្នំពេញ ឧត្តមសេនីយ៍ឯក ស ថេត ចង់ឲ្យស្ត្រីឡើងធ្វើជាមេប៉ុស្តិ៍ និងអធិការវិញម្តង ខណៈបច្ចុប្បន្ននេះ មេប៉ុស្តិ៍ និងអធិការនគរបាលខណ្ឌទាំង១២ ក្នុងរាជធានីភ្នំពេញ សុទ្ធតែបុរស។
ស្នងការនគរបាលរាជធានីភ្នំពេញ ឧត្តមសេនីយ៍ឯក ស ថេត ថ្លែងបែបនេះ ក្នុងពិធីអបអរសាទរទិវាអន្តរជាតិ៨មីនា លើកទី១០៨ ក្រោមប្រធានបទ “លើកកម្ពស់សមភាពយេនឌ័រ និងការគាំពារសង្គម ដើម្បីអភិវឌ្ឍធនធានមនុស្ស” នៅថ្ងៃទី៧ ខែមីនា ឆ្នាំ២០១៩នេះ។
លោក ស ថេត បានថ្លែងថា “ស្ត្រីជានគរបាល មានទេពកោសល្យខ្ពស់ ក្នុងការសួរចម្លើយជនសង្ស័យ ព្រោះពួកគាត់ប្រើប្រាស់ពាក្យសម្តីល្អ និងទន់ភ្លន់។ លោកចង់ឲ្យនៅក្នុងរាជធានីភ្នំពេញ មានមេប៉ុស្តិ៍ និងអធិការជាស្រ្តី ដើម្បីឲ្យក្លាយជាគំរូល្អ។ ប៉ុន្តែស្រ្តីខ្លួនឯង ត្រូវបង្កើនសមត្ថភាពឲ្យសាកសមទៅនឹងតំណែង ដែលថ្នាក់ដឹកប្រគល់ឲ្យ”។
ស្នងការរាជធានីភ្នំពេញ បានបន្តថា ពេលបង្ក្រាបបទល្មើស ស្រ្តីជានគរបាល ក៏ត្រូវការជួយក្នុងការចាប់ចងជនសង្ស័យជាស្រ្តីផងដែរ៕