ភ្នំពេញៈ រថយន្តចំនួន៥គ្រឿង និងម៉ូតូកង់បីមួយគ្រឿង រងខូចខាត បន្ទាប់ពីរថយន្តកូរ៉េឃ្លប់ចំណុះ៣តោនមួយគ្រឿង បើកលឿនជាន់ហ្វ្រាំងមិនជាប់ ក៏បុករះរុញគៀបជាប់គ្នា ក្នុងដំណើរស្របទិសគ្នា បង្កឲ្យកកស្ទះចរាចរណ៍ ត្រង់ចំណុចភ្លើងស្តុប ផ្លូវវេងស្រេង កែងផ្លូវទួលពង្រ ភូមិត្រពាំងថ្លឹង សង្កាត់ចោមចៅ១ ខណ្ឌពោធិសែនជ័យ កាលពីវេលាម៉ោង៩និង៤០នាទីព្រឹក ថ្ងៃទី១២ ខែមិនា ឆ្នាំ២០១៩ ហើយក្នុងចំណោមរថយន្ត៥គ្រឿង ជួបគ្រោះថ្នាក់ចរាចរណ៍ មានរថយន្តមួយគ្រឿង ខាងមុខគេ រងខូចខាតតិចតួច បានបើកចេញទៅមុនបាត់ ដោយមិននៅវែងឆ្ងាយ។
តាមប្រភពពីពលរដ្ឋ ឃើញហេតុការណ៍ បានឲ្យដឹងថា មុនកើតហេតុ រថយន្តបង្កម៉ាក ហ៊ីយ៉ាន់ដាយ ឃ្លប់ ចំណុះ៣តោន ពណ៌ស ពាក់ស្លាកលេខ ភ្នំពេញ 3C-1380 ជារថយន្ត របស់ក្រុមហ៊ុនដឹកក្រដាស បើកល្បឿនលឿនពីកើតទៅលិច លុះដល់ចំណុចកើតហេតុ បានបុករថយន្តសាំយ៉ុង ពណ៌ស ពាក់ស្លាកលេខ ភ្នំពេញ 2AB-5024 ខ្ទេចគូទ ហើយរេទៅបុករុញ រថយន្ត កូរ៉េ ឃ្លប់ ម៉ាក Bongo ពណ៌ស ពាក់ស្លាកលេខ ភ្នំពេញ 2AC-3131 ទៅផ្ទប់ជាមួយរថយន្តស្ទូច ម៉ាក ហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3E-5918 ហើយរថយន្តបន្តកៀរ ម៉ូតូកង់បីមួយគ្រឿង ពណ៌ស ពាក់ស្លាកលេខ ភ្នំពេញ 1HE-2421 រងខូចខាតខ្ទេចគូទក្រោយ រុញទៅឡើងខឿនចិញ្ចើមផ្លូវ ហើយរថយន្តបង្ក បើកបុករុញរថយន្តសាំយ៉ុងនោះ បានរុញបន្តទៅបុក រថយន្តហ៊ីយ៉ាន់ដាយ ប្រភេទទំនើបមួយគ្រឿង ដែលបើកខាងមុខគេ តែខូចខាតបន្តិចបន្តួច មិនបាននៅទាមទាររកសំណងឡើយ បន្តដំណើរចាកចេញទៅបាត់ បន្សល់ទុកតែរថយន្តចំនួន៤គ្រឿង ម៉ូតូកង់បីមួយគ្រឿង នៅកន្លែងកើតហេតុ។
ហេតុការណ៍ខាងលើនេះ បង្កឲ្យកកស្ទះចរាចរណ៍ ហើយត្រូវបានសមត្ថកិច្ច ចុះទៅសម្រួល យករថយន្តក្នុងគ្រោះថ្នាក់ ទៅដាក់គៀនខាង រងចាំជំនាញមកវាស់វែង ដើម្បីរកដំណោះស្រាយ៕