ភ្នំពេញៈ ប្រជាពលរដ្ឋជាង១០គ្រួសារ បានលើកម្រាមដៃដប់អំពាវនាវដល់សម្ដេចតេជោ ហ៊ុនសែន ជួយរកយុត្តិធម៌ដោះស្រាយបញ្ហា អ្នកមានអំណាចម្ចាស់ដីឡូតិ៍មួយកន្លែង ស្ថិតក្នុងភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ បានរំលោតបោះបង្គោលធ្វើរបងបិតផ្លូវសាធារណៈមិនឲ្យប្រជាពលរដ្ឋដើរឆ្លងកាត់ចេញចូលឡើយ។
តាមការបញ្ជាក់ពីប្រជាពលរដ្ឋ បានឲ្យដឹងថា ម្ចាស់ដីឡូតិ៍ខាងលើនេះ ល្បីថា ជាអ្នកធំ អ្នកមានអំណាច មានចេតនាចង់បានហួសហេតុ ព្យាយាមសាងសង់របងគ្រឹះរឹង ម្តងហើយម្តងទៀត មកលើដីផ្លូវសាធារណៈ ហើយត្រូវបានបងប្អូនប្រជាពលរដ្ឋពេញភូមិ នាំគ្នាបះបោររារាំងមិនឲ្យធ្វើ ព្រោះវាប៉ះពាល់ផ្លូវសាធារណៈ។ កន្លងមកប្រជាពលរដ្ឋ ក៏ធ្លាប់បានរាយការណ៍ទៅថ្នាក់ភូមិ រហូតដល់លោកអភិបាលខណ្ឌ ហើយឮតែដោះស្រាយជូន ប៉ុន្ដែមិនដែលឃើញរកដំណោះស្រាយជូនប្រជាពលរដ្ឋទាល់តែសោះ ឬក៏លោកអភិបាលថ្មី ដែលទើបមកកាន់មិនហ៊ានជាមួយអ្នកមានអំណាច ជាម្ចាស់ដីនោះ ឬក៏លោកត្រូវថ្នាំងងុយដេកគេហើយ ឯណាទៅភូមិឃុំមានសុវត្ថិភាព៩ចំណុច?
ប្រជាពលរដ្ឋបន្ថែមទៀតថា រឿងនេះមិនមែនតែមួយលើកនោះទេ គឺច្រើនលើកច្រើនសារមកហើយ រឿងរំលោភយកដីផ្លូវធ្វើជាប្រយោជន៍ផ្ទាល់ខ្លួន តាមផ្លូវ១៩៩០ ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ ហើយកាលពីព្រឹកថ្ងៃទី១១ ខែមីនា ឆ្នាំ២០១៩ ជាថ្មីម្ដងទៀត ម្ចាស់ទីតាំង បានឲ្យជាងសាងសង់របងបេតុងគ្រឹះរឹងមាំមកលើផ្លូវសាធារណៈ។
គួររំលឹងផងដែរថា ទីតាំងផ្លូវ១៩៩០នេះ កន្លងមកសាលាខណ្ឌក៍ដូចជាភូមិបាលខណ្ឌសែនសុខ បានដាក់ម៉ាស៊ីនវាស់វែងដីធ្លី(LMP)ចុះវាស់វែងរួចហើយ ដោយមានផ្លូវទំហំទទឹងចំនួន ១០ម៉ែត្រ ស្រាប់តែព្រឹកថ្ងៃទី១១ មីនា ម្ចាស់ដីឡូតិ៍ខាងលើ មកធ្វើរបងរឹងមាំបម្រុងរំលោភយកទៅវិញ។
ជាចុងក្រោយប្រជាពលរដ្ឋសូមសំណូមពរដល់សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ជួយដោះស្រាយបញ្ហាខាងលើនេះជូនប្រជាពលរដ្ឋផង ដើម្បីឲ្យប្រជាពលរដ្ឋបានរស់នៅដោយមានសេចក្ដីសុខ និងមានផ្លូវសាធារណៈដើរចេញដើរចូលទៅផ្ទះធម្មតាដូចដើមវិញផង៕