√ អីក៏ខ្លាំងម៉្លេះ! ខឹងគេមិនហៅផឹកស៊ី បើករថយន្តបុករះ ស្លាប់ និងរបួសជាង១០នាក់

ភ្នំពេញៈ បុរសម្នាក់ បានបើករថយន្តមួយគ្រឿងម៉ាកឡិចស៊ីស បុករះបងប្អូនប្រជាពលរដ្ឋ បណ្តាលឲ្យមានអ្នករងរបួសធ្ងន់ស្រាលជាង១០នាក់ ក្នុងនោះបាត់បង់ជីវិត២នាក់ នៅនឹងកន្លែង។

គ្រោះថ្នាក់ចរាចរណ៍ដ៏រន្ធត់ខាងលើនេះ បានកើតឡើងកាលពីវេលាម៉ោង១១៖៣០នាទីព្រឹក ថ្ងៃទី២៨ ខែមីនា ឆ្នាំ២០១៩ ស្ថិតនៅខាងក្រោយអធិការនគរបាលខណ្ឌទួលគោក ផ្លូវលេខ៣២៤ ភូមិ៤ ក្រុម១៣ សង្កាត់បឹងសាឡាង ខណ្ឌទួលគោក រាជធានីភ្នំពេញ។

ជនបង្កឈ្មោះ ទឹម កំទេស ភេទប្រុស អាយុ៣៥ឆ្នាំ មុខរបរ ធ្វើសារធម៌ដូង ស្នាក់នៅផ្ទះលេខ២៥ ផ្លូវលេខ៣២៤ ភូមិ៤ ក្រុម១៣ សង្កាត់បឹងសាឡាង ខណ្ឌទួលគោក រាជធានីភ្នំពេញ។ ចំណែកឯជនរងគ្រោះ ដែលរងរបួសធ្ងន់ស្រាលជាង១០នាក់ខាងលើនោះ មិនត្រូវបានស្គាល់អត្តសញ្ញាណនៅឡើយទេ។

តាមប្រភពព័ត៌មានពីបងប្អូនប្រជាពលរដ្ឋ ដែលនៅកន្លែងកើតហេតុ បានប្រាប់ភ្នាក់ងារ CAM POST ឲ្យដឹងថា មុនពេលកើតហេតុបងប្អូនប្រជាពលរដ្ឋ បាននាំគ្នារៀបចំធ្វើពិធីសែនលោកតា រួច ក៏មានកម្មវិធីផឹកស៊ីតិចតួច ជារៀងរាល់ឆ្នាំ ពេលនោះបងប្អូនប្រជាពលរដ្ឋ បានឃើញជនបង្ក រួចក៏បាននាំគ្នាហៅមកហូបអីជុំគ្នា តែជនបង្កមិនបានមកហូបនោះទេ ដោយបានអង្គុយនៅមុខផ្ទះរបស់ខ្លួន ។ មួយស្ទុះក្រោយមក ជនបង្កបានដើរចូលទៅក្នុងផ្ទះ លឺសំឡេងឈ្លោះគ្នាប្រកែតគ្នា រួចជនបង្កក៏បានវាយកញ្ចក់ផ្ទះបែក ហើយក៏ថយរថយន្តខាងលើចេញមកក្រៅ។

ភ្លាមៗនោះ ស្រាប់តែឃើញជនបង្កខាងលើ បានបើករថយន្តមួយគ្រឿង ម៉ាកឡិចស៊ីស RX300 ពណ៌ស្ករ ពាក់ស្លាកលេខ ភ្នំពេញ 2AN-2395 បានបើកទៅបុករះតែម្តង ដោយនៅខាងមុខនោះ គឺមានបងប្អូនប្រជាពលរដ្ឋ ដែលកំពុងអង្គុយហូបអីនៅទីនោះ បណ្តាលឲ្យមានមនុស្សជាច្រើននាក់ បានរងរបួសធ្ងន់ស្រាលជាង១០នាក់ ក្នុងនោះបាត់បង់ជីវិត២នាក់។

ក្រោយកើតហេតុ ជនបង្កបានព្យាយាមរត់គេចខ្លួន តែត្រូវបានកម្លាំងសមត្ថកិច្ចចេញមកអន្តរាគមន៍ឃាត់ខ្លួនបានជនបង្កយកមកអធិការខណ្ឌទួលគោក និងបានទាក់ទងទៅសមត្ថកិច្ចជំនាញផ្នែកចរាចរណ៍ជើងគោក នៃស្នងការនរបាលរាជធានីភ្នំពេញ ដើម្បីចុះមកធ្វើការវាស់វែង និងយកជនបង្ក រួមទាំងរថយន្តទៅកាន់ការិយាល័យ ដើម្បីចាត់ការបន្តតាមនីតិវិធីច្បាប់៕