ភ្នំពេញៈ នៅម៉ោងជាង៧ព្រឹកថ្ងៃទី១៣ មីនា ២០១៩នេះ អាជីវករលក់ដូរ ក្នុងផ្សារឈូកមាស ស្ថិតនៅសង្កាត់គោកឃ្លៀង ខណ្ឌសែនសុខ ប្រមាណ២០០នាក់ បានផ្ទុះការតវ៉ា ខណៈដែលម្ចាស់ផ្សារដំឡើងថ្លៃតូប និងទាមទារឲ្យធ្វើកុងត្រាថ្មី។
តាមការបញ្ជាក់ពីបងប្អូនអាជីវករ បានប្រាប់ឲ្យដឹងថា ខាងម្ចាស់ផ្សារ បានធ្វើការដំឡើងថ្លៃតូប ហើយទាមទារឲ្យពួកគាត់ធ្វើកុងត្រាថ្មី រយៈពេល២ឆ្នាំម្ដង ប៉ុន្ដែពួកគាត់ (អាជីវករ) មិនមានលទ្ធភាព ហើយក៏ធ្វើការតវ៉ា សំណូមពរឲ្យខាងម្ចាស់ផ្សារ ក៏ដូចជាអំពាវនាវទៅដល់លោកឧកញ៉ា ហុង ពាវ ដែលជាឧកញ៉ាចិត្តធម៌មួយរូប ដើម្បីឲ្យជួយរកដំណោះស្រាយ៤ចំណុច ដែលក្រុមអាជីវករកំពុងជួបបញ្ហា។
ចំណុចទី១ សុំឲ្យតម្លៃជួលតូបនៅដដែល ។ ចំណុចទី២ និងទី៣សុំឲ្យដំឡើងតែ៥ភាគរយបានហើយជារាងរាល់ឆ្នាំផងដែរ។ ចំណុចទី៤ សុំធ្វើការកុងត្រា៤ឆ្នាំម្ដង។
សូមបញ្ជាក់ថា ក្រុមអាជីវករ មិនត្រឹមតែធ្វើការតវ៉ានៅខាងមុខផ្សារឈូកមាសប៉ុណ្ណោះទេ ក៏មានហែញត្តិទៅដាក់នៅក្រុមហ៊ុនបុរីពិភពថ្មី AEON2 ដោយមានលើករូបថតសម្ដេចតេជោ និងសម្ដេចកិត្តិព្រឹទ្ធបណ្ឌិត ព្រមទាំងរូបលោកឧកញ៉ា ហុង ពីវ ដើម្បីទាមទារ និងសុំអន្តរាគមន៍រកដំណោះស្រាយជូនពួកគាត់ផងដែរ៕
