ភ្នំពេញៈ ជនសង្ស័យម្នាក់ ក្នុងចំណោម២នាក់ ត្រូវបានប្រជាពលរដ្ឋសហការជាមួយសមត្ថកិច្ច ធ្វើការឃាត់ខ្លួន ក្រោយពីធ្វើសកម្មភាពឆក់កាបូបស្ពាយចំហៀងពីនារីម្នាក់ មិនបានសម្រេច តែធ្វើឲ្យម្ចាស់កាបូបដួលអូសលើដងផ្លូវ រងរបួសរលាត់ដៃរលាត់ជើង និងបែកចង្កា។ ហេតុការណ៍នេះបង្កឲ្យមានការភ្ញាក់ផ្អើលកាលពីម៉ោង១១:៣០នាទីយប់ ថ្ងៃសៅរ៍ ទី១៦ ខែមីនា ឆ្នាំ២០១៩ តាមផ្លូវសហព័ន្ធរុស្ស៊ី មុខព្រលានយន្តហោះ ស្ថិតក្នុងភូមិក្បាលដំរី១ សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។
ជនសង្ស័យធ្វើសកម្មភាពខាងលើឈ្មោះ មី រ៉ាវុធ ហៅវុធ អាយុ៣០ឆ្នាំ មុខរបរមិនពិតប្រាកដ ស្នាក់នៅភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ ត្រូវឃាត់ខ្លួន និងម្នាក់ទៀត ជាបក្ខពួក បានរត់គេចខ្លួនបាត់នោះ ឈ្មោះ អាចារ្យ អាយុប្រហែល២៥ឆ្នាំ។ ចំណែកនារីរងគ្រោះឈ្មោះ ស៊ាង ហ៊ី អាយុ២៦ឆ្នាំ មុខរបរកម្មការិនីរោងចក្រ ស្នាក់នៅភូមិជ្រៃកោង សង្កាត់ចោមចៅ២ ខណ្ឌពោធិ៍សែនជ័យ។
នារីរងគ្រោះបានឲ្យដឹងថា មុនកើតហេតុ នាងដើរឆ្លងផ្លូវចូលទៅព្រលានយន្តហោះអន្តរជាតិភ្នំពេញ គោលបំណងទៅទទួលបងប្អូនមកពីកូរ៉េ ខណៈឆ្លងជិតផុតផ្លូវ ស្រាប់តែមានជនសង្ស័យ២នាក់ ជិះមួយគ្រឿងម៉ាក YAMAHA GT ពណ៌ក្រហមលាយខ្មៅ ពាក់ស្លាកលេខ ភ្នំពេញ 1FW-7394 មកពីក្រោយ ហើយធ្វើសកម្មភាពឆក់កាបូបស្ពាយចំហៀង ពណ៌លឿងលាយខ្មៅ ដែលនាងស្ពាយ បណ្តាលឲ្យអូសដួលលើដងផ្លូវ រងរបួសពកថ្ងាស ឈាមចង្កា និងរលាត់ដៃរលាត់ជើងរងរបួស។
ប្រភពដដែលឲ្យដឹងទៀតថា ពេលឆក់នោះ នាងបានប្រទាញប្រតប់គ្នា បណ្តាលឲ្យម៉ូតូជនសង្ស័យដួល ហើយជនសង្ស័យទាំង២នាក់ ព្យាយាមរត់គេចខ្លួន ប៉ុន្តែត្រូវបានប្រជាពលរដ្ឋ សហការជាមួយសមត្ថកិច្ចមូលដ្ឋាន ដេញចាប់បានម្នាក់។ ចំណែកបក្ខពួកម្នាក់ទៀត រត់គេចខ្លួនបាត់។
បច្ចុប្បន្នជនសង្ស័យ ត្រូវបានឃាត់ខ្លួនសាកសួរបណ្តោះអាសន្ននៅផ្នែកជំនាញ នៃអធិការដ្ឋាននគរបាលខណ្ឌពោធិ៍សែនជ័យ៕
ផ្ដល់សិទ្ធិដោយ៖ campost.news