កំពង់ឆ្នាំងៈ សង្ឃវៀតណាម បានរងរបួសធ្ងន់ ក្រោយជួបហេតុការណ៍គ្រោះថ្នាក់ចរាចរណ៍រវាងរថយន្តនិងម៉ូតូបុកគ្នា កាលពីវេលាម៉ោងប្រមាណ១៖២០នាទីរសៀលថ្ងៃទី៦ ខែមីនា ឆ្នាំ២០១៩ ចន្លោះបង្គោលគីឡូម៉ែត្រលេខ១០១-១០២ ស្ថិតក្នុងភូមិទ័ពត្បែង ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង។
សមត្ថកិច្ច បានឲ្យដឹងថា ជនរងគ្រោះឈ្មោះ ប៊ួយ យ៉ាំងវិន ភេទប្រុស អាយុ៦៧ឆ្នាំ ជាសង្ឃវៀតណាម រស់នៅក្នុងវត្ត ស្ថិតក្នុងភូមិកណ្តាល សង្កាត់ផ្សារឆ្នាំង ក្រុងកំពង់ឆ្នាំង ជិះម៉ូតូម៉ាកវីវ៉ាពាក់ស្លាក់លេខ កំពង់ឆ្នាំង1D-3290 ទិសដៅពីលិចទៅកើត មកដល់ចំណុចកើតហេតុ ត្រូវបានរថយន្តបើកបរបញ្ច្រាសទិសគ្នា បុកឲ្យឲ្យរងរបួសបាក់ដៃ។
សមត្ថកិច្ច បានបន្តឲ្យដឹងថា ក្រោយកើតហេតុ សមត្ថកិច្ចបានឃាត់រថយន្តពីរគ្រឿង ដើម្បីធ្វើការត្រួតពិនិត្យភិនភាគរករថយន្ត ដែលបង្ក។ ចំណែកជនរងគ្រោះ ត្រូវបានសមត្ថកិច្ច និងប្រជាពលរដ្ឋហៅរថយន្តសង្គ្រោះដឹកយកទៅសង្គ្រោះបន្ទាន់នៅមន្ទីរពេទ្យផងដែរ។
ដោយឡែករថយន្តទាំងរថយន្តពីរគ្រឿង និងម៉ូតូ ត្រូវបានសមត្ថកិច្ចនាំយកមករក្សាទុក រង់ចាំដោះស្រាតាមនិតិវិធីច្បាប់៕