ភ្នំពេញៈ កុំប្រមាថជីវិតអ្នកដទៃពេលបើកបរ រៀនយកចិត្តគេដាក់ក្នុងចិត្តខ្លួនឯងផង ពេលបើកបរ ស្រលាញ់ជីវិតអ្នក សូមបើកបរគោរពច្បាប់ចរាចរណ៍ឲ្យបានត្រឹមត្រូវ ជៀសវាងកើតមានគ្រោះថ្នាក់ចរាចរណ៍។ យុវជនចិត្តស្លុយ បើកម៉ូតូសណ្ដោងរ៉ឺម៉ក លឿនដូចហោះ វ៉ាជែង កាច់ចង្កេះឡើងស្ទាវ តែខ្វះការប្រុងប្រយ័ត្ន ធ្លាក់ជង្ហុកគំរបលូ បណ្ដាលឲ្យធ្លាក់ពីលើរ៉ឺម៉កបោកនឹងថ្នល់ រ៉ឺម៉កបុករបាំងថ្ម ហើយមិនទាន់អស់ល្បឿន រេចង្កូតមកវិញកិនយុវជនចិត្តស្លុយ សន្លប់ស្ដូកស្ដឹងកណ្ដាលផ្លូវ រ៉ឺម៉កនៅតែបន្តទៅមុខទៀតឡើងចិញ្ចើមផ្លូវបុកជាប់របងដែក ផ្អើលបងៗអ្នករត់កង់បីជួយសង្គ្រោះ ងើបដឹងខ្លួនឡើង បើកចេញលឿនស្លេវ ប៉ះបុកទាំងអ្នកជួយទៀត។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង១២៖៣០នាទីរំលងអធ្រាត្រ ឈានចូលថ្ងៃសៅរិ៍ ទី១៦ ខែមីនា ឆ្នាំ២០១៩នេះ នៅលើកំណាត់ផ្លូវព្រះមុនីវង្ស នៅត្រង់ចំណុចខាងមុខចំហៀងខាងស្ដាំភោជនីយដ្ឋានទន្លេបាសាក់២ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។
ប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញយុវជនចិត្តស្លុយ បើកម៉ូតូសណ្ដោងរ៉ឺម៉កមួយគ្រឿង ក្នុងលឿនដូចហោះ ធ្វើដំណើរតាមផ្លូវព្រះនរោត្តម បត់ចូលមកផ្លូវព្រះមុនីវង្ស ដោយបានវ៉ាជែង កាច់ចង្កេះចុះឡើងៗឡើងស្ទាវ តែដោសារតែខ្វះការប្រុងប្រយ័ត្ន ស្រាប់តែធ្លាក់ជង្ហុកគំរបលូ បណ្ដាលឲ្យយុវជនចិត្តស្លុយ ធ្លាក់ពីលើរ៉ឺម៉កបោកនឹងថ្នល់ រីរ៉ឺម៉កបានទៅបុករបាំងថ្ម ហើយមិនទាន់អស់ល្បឿនទេ បានរេចង្កូតវិលត្រលប់មកវិញ កិនពីលើយុវជនចិត្តស្លុយនោះ បណ្ដាលឲ្យសន្លប់ស្ដូកស្ដឹងកណ្ដាលផ្លូវតែម្ដង ហើយរ៉ឺម៉កនៅតែបន្តទៅមុខទៀតឡើងចិញ្ចើមផ្លូវបុកជាប់របងដែក ទីតាំងបណ្ដាញអគ្គិសនីកម្ពុជា ក្បែរភោជនីយដ្ឋានទន្លេបាសាក់២ កល់ជាប់ទៅមុខលែងរួច។
បង្កឲ្យមានការភ្ញាក់ផ្អើលដល់ក្រុមអ្នករត់ម៉ូតូឌុប និងកង់បីដែលឈប់ចាំដឹកម៉ូតូនៅជិតនោះ រួមទាំងអ្នកដំណើរ នាំគ្នាមកជួយមើលយុវជនចិត្តស្លុយនោះ ខណៈនោះដែលមានរថយន្តគិលានសង្គ្រោះគ្លីនិកហុងហាក់ បានមកដល់ដែរ តែអ្នករបួសនោះដឹងខ្លួនវិញ មិនព្រមឡើងរថយន្តសង្គ្រោះនោះទេ ហើយស្ទុះងើបតែដោយសារវិលពេកក៏អង្គុយសិន បន្តិចក្រោយមក ក៏ងើបដើរសំដៅទៅអង្គុយលើម៉ូតូសណ្ដោងរ៉ឺម៉ក តែសភាពយុវជននោះនៅវិលមុខខ្លាំង ក៏ដេកលើរ៉ឺម៉កនោះ បានមួយសន្ទុះ គ្រាន់តែបងប្អូនប្រជាពលរដ្ឋឃើញលេខទូរស័ព្ទនៅជាប់អាវខាងមុខ ពីក្រោម Logo លេខ72 ដែលពួកគាត់សន្ឋិដ្ឋានថាជា Logo ក្រុមហ៊ុនផលិតទឹកសុទ្ធ ប្រហែលៗ នៅខណ្ឌច្បារអំពៅ ទើបហៅលេខទូរស័ព្ទនោះឲ្យទាក់ទងប្រាប់ឲ្យអ្នកកាន់លេខនោះបានដឹង ស្រាប់តែយុវជនចិត្តស្លុយ បញ្ចេះម៉ូតូសណ្ដោយរ៉ឺម៉កនោះ បើកចេញលឿនស្លេវ ប៉ះបុកទាំងអ្នកជួយទៀត ចេញទៅដោយមិនអរគុណសូម្បីតែមួយម៉ាត់ រួចបត់ឆ្វេងត្រលប់មកតាមផ្លូវព្រះមុនីវង្ស បួងចង្កូតឡើងស្ទាវដដែល ក្នុងល្បឿនលឿនដូចហោះ ឡើងទៅលើស្ពានព្រះមុនីវង្សបាត់ស្រមោល៕