ភ្នំពេញៈ គណៈបញ្ជាការឯកភាពខណ្ឌចំការមន ចុះបិទក្លឹប “ម៉ៃអាមី” ទីតាំង១៥៩ ដោយសង្ស័យអត់ច្បាប់អនុញ្ញាត។
ការចុះទៅបិទក្លឹបខាងលើនេះ ធ្វើឡើងកាលពីវេលាម៉ោង៤៖៣០នាទីរសៀលថ្ងៃទី៧ ខែមីនា ឆ្នាំ២០១៩ នៅចំណុចមុខស្ថានីយទូរទស្សន៍អប្សរា ស្ថិតនៅតាមបណ្តោយផ្លូវ៣៦០ ភូមិ៨ សង្កាត់បឹងកេងកង១ ខណ្ឌចំការមន រាជធានីភ្នំពេញ ។
លោក ព្រុំ សំខាន់ អភិបាលខណ្ឌចំការមន បានអោយដឹងថា នៅរសៀលនេះ កម្លាំងចម្រុះដឹកនាំដោយគណៈបញ្ជាការឯកភាពខណ្ឌ សហការជាមួយនគរបាលប៉ុស្តិ៍មានការចូលរួមពីមន្ទីរទេសចរណ៍ និងក្រសួងបរិស្ថាន ក្រោយពីមានពាក្យបណ្ដឹងប្រជាពលរដ្ឋថា ក្លឹបម៉ៃអាមីមានទីតាំង១៥៩ បញ្ចេញសំឡេងមកក្រៅខ្លាំងៗ ធ្វើអោយប៉ះពាល់ រំខានការដេកពួនរបស់ប្រជាពលរដ្ឋអ្នករស់នៅជិតខាង ទើបអាជ្ញាធរចុះមកត្រួតពិនិត្យ និងសួរនាំរកលិខិតអនុញ្ញាតបើកក្លឹបកម្សាន្តដែរទេ។
លោក ព្រុំ សំខាន់ អភិបាលខណ្ឌ បានបញ្ជាក់ថា យោងតាមការអនុញ្ញាតពីលោក ឃួង ស្រេង អភិបានក្រុងភ្នំពេញ ទីតាំងខាងលើ ត្រូវបានបិទជាបណ្ដោះអាសន្នសិន ដោយក្លឹបខាងលើនេះ គ្មានការអនុញ្ញាត ដោយឡែកម្ចាស់ទីតាំងបានចូលរួម តែមិនព្រមផ្ដិតមេដៃក៏ដោយ តែសូមប្រាប់ថា មិនផ្ដិតមេដៃតែមិនអាចបើកក្លឹបនេះ ចាប់ពីម៉ោងកម្លាំងសរសេរធ្វើកំណត់ហេតុ តែនៅរឹងទទឹងបើកដំណើរការនោះ កុំថាគណៈបញ្ជាការចុះចាប់ទាំងយប់ឲ្យសោះ។
បន្តិចក្រោយមក ម្ចាស់ទីតាំងខាងលើ បានស្ដាប់ការពន្យល់ណែនាំរួច ក៏បានចូលរួមថែមទាំងផ្ដិតមេដៃផ្អាកជាបណ្ដោះអាសន្ន រង់ចាំធ្វើការចូលខ្លួនដោះស្រាយរឿងប៉ះសំឡេងរំខាន និងមានលិខិតអនុញ្ញាត ទើបអាចបើកដំណើរការឡើងវិញ ។
ជាចុងក្រោយសូមអោយម្ចាស់ទីតាំងបិទស្លាកក្នុងក្លឹបខ្លួនថា (គ្មានការជួញដូរ ឬប្រើប្រាស់នូវសារធាតុញៀនខុសច្បាប់ ជាពិសេសការរួមភេទ និងជួញដូរមនុស្សខុសច្បាប់ សូមប្អូនជាយុវជនទាំងអស់ ជៀសអោយឆ្ងាយពីគ្រឿងញៀន ដោយវាធ្វើអោយខូចអនាគត និងខាតបង់ទ្រព្យសម្បត្តិក្នុងគ្រួសារ យើងជាទំពាំងស្នងឬស្សី បើសិនជាមានករណីដូចខាងលើមេត្តារាយការណ៍មកអាជ្ញាធរអោយបានលឿនបំផុត)៕
