ភ្នំពេញៈ គួរឲ្យសង្វេគខ្លាំងណាស់ បុរសជាអ្នករើសអេតចាយ២នាក់ ដើររើសអេតចាយតាមផ្លូវ ឮសំឡេងយំង៉ាៗ ស្មានតែឆ្មាយំ លុះរកមើលឃើញទារិកាម្នាក់ ទើបនឹងកើតបានប៉ុន្មានថ្ងៃ សង្ស័យត្រូវឪពុកម្ដាយយកមកបោចោល នៅក្នុងថង់ខ្មៅមួយនៅក្បែរបង្គោលភ្លើង និងមានសម្ភារៈទារកនៅក្បែរនោះដែរ រួចលើកបី នាំគ្នាបើកម៉ូតូសណ្ដោងរ៉ឺម៉កអេតចាយ ទៅប្រគល់ឲ្យក្រុមការងារវិទ្យុ ABC ជាអ្នកមើលថែ។
ហេតុការណ៍ភ្ញាក់ផ្អើលខាងលើនេះ បានកើតឡើងនៅវេលាម៉ោង៤៖៣០នាទីទៀបភ្លឺថ្ងៃព្រហស្បតិ៍ ទី២១ ខែមីនា ឆ្នាំ២០១៩នេះ នៅត្រង់ចំណុចជាប់បង្គោលភ្លើងមួយ មុខការដ្ឋានសំណង់អគារខ្ពស់ លើកំណាត់ផ្លូវ៦០ម៉ែត្រ ក្នុងភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
តាមការបញ្ជាក់របស់បុរសទាំងពីរនាក់នោះ បានអោយដឹងថា មុនពេលកើតហេតុ គាត់បានបើករ៉ឺម៉កអេតចាយឌុបគ្នា រើសអេតចាយ តាមផ្លូវនានា លុះពេលមកផ្លូវ៦០ម៉ែត្រ ចំណុចខាងលើ ស្រាប់តែឃើញថង់ខ្មៅមួយ មានសម្ភារៈទារកនៅក្បែរនោះ គាត់ក៏បើកមើល ស្រាប់តែឃើញទារក ដែលទើបនឹងកើតបានប៉ុន្មានថ្ងៃ ច្រកក្នុងថង់ខ្មៅនោះ ដោយមិនដឹងថា អ្នកណាយកមកបោះចោលនោះទេ នៅក្បែរបង្គោលភ្លើង ដោយស្ទាបទៅនៅមានដង្ហើម ទើបលើកមកបី តែមិនស្គាល់លេខទូរស័ព្ទសមត្ថកិច្ច ហើយងាកមើលឆ្វេងស្ដាំ មិនឃើញមានមនុស្ស ឬសាច់ញាតិក្មេង ទើបនាំគ្នាបីឡើង បើកម៉ូតូសណ្ដោងរ៉ឺម៉កអេតចាយ ធ្វើដំណើរតាមផ្លូវ៦០ម៉ែត្រ រហូតទៅដល់មុខវិទ្យុABC រួចប្រាប់អ្នកលក់នៅក្នុង Mart ABC ២៤ម៉ោង ថា គាត់បានប្រទះឃើញទារិកា ដែលគេយកមកបោះបង់ចោល។
ហើយក្រុមការងារវិទ្យុ ABC មានលោក ដំឡូង ពិធីករវិទ្យុABC និងកញ្ញា ដាវណ្ណ បានចេញមកទទួល និងធ្វើការសាកសួរព័ត៌មាន បានអោយដឹងថា បុរសដែលជាអ្នកបើករ៉ឺម៉កអេតចាយឈ្មោះ បញ្ញា អាយុប្រហែល៣០ឆ្នាំ ចំណែកឯបុរសជាអ្នកដើររើសអេតចាយ និងជាអ្នកប្រទះឃើញឈ្មោះ ភឿន តួ ។ ក្រោយពីសួរនាំរួច បងប្រុសជាអ្នករើសអេតចាយចិត្តល្អទាំង២នាក់ បានត្រឡប់ទៅដើររើសអេតចាយវិញ។
បច្ចុប្បន្នទារិកាដ៏គួរឲ្យអាណិតខាងលើ ត្រូវអ្នករើសអេតចាយទាំង២នាក់នោះ ប្រគល់ឲ្យក្រុមការងារវិទ្យុ ABC យកទៅស្នាក់នៅវិទ្យុហើយ ដើម្បីមើលថែបន្ត តែស្ថានភាពទារិកានោះ កាន់តែខ្សោយ ព្រោះទំនងជានៅក្នុងថង់យូរ និងស្រែកយំឡើងខ្មៅមុខអស់ហើយ ទើបប្រញាប់យកក្មេងទៅសង្គ្រោះនៅឯមន្ទីរពេទ្យ គន្ធបុប្ផា ភ្លាមៗតែម្ដង។
សូមអរគុណទឹកចិត្ត ដែលមិនងាយរកបានរបស់បងប្រុសអ្នករើសអេតចាយទាំង២នាក់ខាងលើ រួមទាំងក្រុមការងារវិទ្យុABC ដែលតែងតែជួយទទួលយកក្មេងៗ ដែលគេបោះបង់ចោល យកទៅមើលថែបន្ត នេះទទួលបានម្នាក់ទៀតហើយ បន្ថែមលើក្មេងៗដែលឪពុកម្ដាយ បោះបង់ចោល និងខ្លះទៀតមានបញ្ហាសតិ ដែលកំពុងរស់នៅវិទ្យុABC របស់អាចារ្យអេ៕
