Friday, March 1, 2019

អាជ្ញាធរស្រុកឈូក ព្រមានចាត់វិធានការមេក្លោង ដើរញុះញង់ឲ្យគេទៅចាប់យកដីស្របច្បាប់

កំពតៈ លោក ហេង ពៅ អភិបាលរងស្រុកឈូក និងជាសមាជិកក្រុមការងារវាស់វែងដីធ្លីថ្នាក់ខេត្តកំពត នៅថ្ងៃទី១ ខែមីនា ឆ្នាំ២០១៩នេះ បានប្រាប់ថា កាលពីថ្ងៃទី២៨ ខែកុម្ភៈ លោកក្នុងនាមអាជ្ញាធរដែនដី បានដឹកនាំក្រុមការងារដីធ្លីថ្នាក់ស្រុក សហការជាមួយ អាជ្ញាធរមូលដ្ឋានភូមិ-ឃុំ ចុះដល់កន្លែងហេតុការណ៍ ដែលក្រុមអនាធិបតេយ្យដឹកនាំ ដោយលោក ហេង សឿន ទៅរំលោភ និងសង់ផ្ទះ លើដីប្រជាពលរដ្ឋរស់នៅ ក្នុងមូលដ្ឋានជាក់ស្តែង។

ឈ្មោះ ហេង សឿន ត្រូវបានប្រជាពលរដ្ឋ និងអាជ្ញាធរនៅឃុំត្រពាំងភ្លាំង ស្រុកឈូក ខេត្តកំពត ចាត់ទុកជាមេក្លោង ក្នុងការដឹកនាំក្រុមអនាធិបតេយ្យមកពីស្រុកផ្សេងៗ រួមមាន៖ ស្រុកទឹកឈូ, ស្រុកដងទង់ ឃុំវាលរេញ ក្នុងស្រុកព្រៃនប់ ខេត្តព្រះសីហនុ មកចាប់ដីនៅចំណុចភូមិព្រៃពាយ ដោយអះអាងថា ជាដីសម្បទានសង្គមកិច្ចរបស់រដ្ឋ បង្កឲ្យមានភាពអនាធិបតេយ្យ រវាងអ្នកមានដីកាន់កាប់នៅទីនោះ និងអ្នកមកចាប់ដីថ្មី ប៉ះពាល់លើដីមានម្ចាស់ ហើយបំផុសឲ្យបងប្អូនទាំងនោះ ដាក់ពាក្យបណ្ដឹងចូលទៅរដ្ឋបាលសាលាខេត្តកំពត ដើម្បីរាយការណ៍បំផ្លើសពីការពិត ជូនលោកអភិបាលខេត្តកំពត ពីសកម្មភាពរបស់ក្រុមការងារ ចុះវាស់វែងដីធ្លី ជូនប្រជាពលរដ្ឋ ដែលមានឈ្មោះត្រឹមត្រូវ តាមគោលការរបស់រាជរដ្ឋាភិបាលកំណត់ ជូនបងប្អូននៅតំបន់នោះ។ ចំពោះសកម្មភាពទាំងនេះ ត្រូវបានប្រជាពលរដ្ឋ ដែលមានដីស្របច្បាប់ ស្នើដល់អាជ្ញាធរចាត់វិធានការតាមច្បាប់ឲ្យខាងតែបានចំពោះបុគ្គលរូបនេះ។

ពេលនោះលោកបានឃើញ ក្រុមលោក ហេង សឿន ពិតជាបានសង់លំនៅដ្ឋានលើដីកាន់កាប់របស់ប្រជាពលរដ្ឋពិតប្រាកដមែន ដែលប៉ុន្មានថ្ងៃនេះកន្លងមក គឺសង់ផ្ទះតូចៗ បានចំនួន៥ផ្ទះ នៅលើទីតាំងប្រជាពលរដ្ឋ១០៣គ្រួសារ ហើយនៅថ្ងៃទី២៨​ ខែកុម្ភៈ ម្សិលមិញ ក្រុមលោក ហេង សឿន បានបន្តសាងសង់ផ្ទះថែមទៀត។

លោកអភិបាលរងស្រុក បានបន្តទៀតថា ដោយឃើញបទ​ល្មើសជាក់ស្តែងដូច្នេះ លោក និងក្រុមការងារបានហៅឲ្យលោក ហេង សឿន មកសហការ ដើម្បីឲ្យបញ្ឈប់ជាបន្ទាន់រាល់សកម្មភាព ប្រព្រឹត្តបទល្មើសខាងលើ តែលោក ហេង សឿន បានច្រានចោល មិនធ្វើការសហការនោះទេ ហើយពួកគេនៅតែបន្តសកម្មភាពខាងលើនេះដដែល។

លោក ហេង សឿន បានឆ្លើយមកវិញថា រូបគេមិនស្តាប់អ្នកណាទាំងអស់ រូបគេស្តាប់តែលោកអភិបាលខេត្តកំពត ជាវ តាយ តែប៉ុណ្ណោះ។ ពេលឃើញដូច្នោះ រូបលោកនឹងធ្វើរបាយកាណ៍ជូនថ្នាក់លើ រួចហើយ។

លោក ជឹង ផល្លា អភិបាលរងខេត្តកំពត និងជាប្រធានគណៈកម្មាធិការវាស់វែងដីធ្លីថ្នាក់ខេត្ត បានឲ្យដឹងថា លោកបានទទួល និងជ្រួតជ្រាបព័ត៌មានខាលើនេះហើយ។ លោកបានបញ្ជាក់ថា លោកបានទទួលបានការណែនាំពីលោក ជាវ តាយ អភិបាលខេត្ត ដោយឲ្យអាជ្ញាធរ ស្រុកឃុំ ត្រូវចាត់ការតាមនីតិវិធីច្បាប់ បើរកឃើញបុគ្គលណាមួយ បានប្រព្រឹត្តបទល្មើសនោះ។

បើតាមមន្រ្តីសាលាខេត្តកំពត គណៈកម្មការ ដែលប្រឹងធ្វើការវាស់វែងបំពេញទិន្នន័យក្បាលដីស្របតាមនីតិវិធី ត្រូវលោក ហេង សឿន ចោទប្រកាន់ និងសុំស្នើដកចេញទៅវិញ ដោយចោទថា ក្រុមការងារមិនយុត្តិធម៌មានភាពលំអៀង។ ក្នុងរយៈពេលកន្លងមកនេះ ក្រុមការងារគណៈកម្មការបានចុះវាស់វែងដីធ្លីនៅតំបន់នោះយ៉ាងយកចិត្តទុកដាក់ ជិតបានបញ្ចប់បេសកម្មរបស់ខ្លួន ដោយរលូន ហើយមានការទទួលស្គាល់ពីគ្រប់អាជ្ញាធរ និងប្រជាពលរដ្ឋ ដែលបានវាស់វែង ចាប់តាំងពីបទបញ្ជា ០១ បប របស់រាជរដ្ឋាភិបាលកម្ពុជា រហូតបន្តវាស់វែងពី០១ ស្ទើរតែចប់សព្វគ្រប់ទាំងស្រុង ដោយវាស់ជាក់ស្ដែងតាមឈ្មោះ ដែលបានប្ដឹងទៅសាលាខេត្តចំនួន១៨៩ឈ្មោះនោះ។

នៅពេលគណៈកម្មការវាស់វែងជិតចប់សព្វគ្រប់ ឈ្មោះ ហេង សឿន ថា នៅសល់១ក្រុមទៀត គឺ១០៥ឈ្មោះទៀត ដែលមិនទាន់វាស់វែង តែត្រូវលោកអភិបាលខេត្តព្រមាន ក្នុងដំណោះស្រាយមួយ ជាមួយក្រុមប្រជាពលរដ្ឋ១៨៩ឈ្មោះខាងលើ កាលពីថ្ងៃទី៤ ខែកក្កដា ឆ្នាំ២០១៨ កន្លងមកនេះ នៅឯសាលាខេត្តកំពតថា «កុំបង្កើតកូនចៅបន្តទៀត»។

លោក ហេង សឿន ជាច្រើនឆ្នាំកន្លងមកនេះ តែងតែដើរញុះញង់ក្រុមអនាធិបតេយ្យ ហើយត្រូវបានអាជ្ញាធរមូលដ្ឋាន ក៏ដូចជាប្រជាពលរដ្ឋនៅទូទាំងភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត ចាត់ទុកជាមេក្លោងពូកែប្រឌិតរឿង បំផ្លើសព័ត៌មានមិនពិត បង្កើតឯកសារក្លែងក្លាយ នាំក្រុមអានាធិបតេយ្យ តាមភូមិសាស្ត្រ នៃបណ្តាស្រុកខាងលើ ទៅដើរប្តឹងតវ៉ា គ្មានហេតុផល ទៅអាជ្ញាថ្នាក់ខេត្ត ក្រសួងពាក់ព័ន្ធ ក៏ដូចជារាជរដ្ឋាភិបាលផងដែរ ជាពិសេសនៅពេលថ្មីៗកន្លងមកនេះ។

អាជ្ញាធរគ្រប់ថ្នាក់ មេត្តាចាត់វិធានការចំពោះបុគ្គលឈ្មោះ ហេង សឿន និងបក្ខពួក ដែលតែងបង្ករបញ្ហាដីធ្លីមិនឈប់ឈរ ធ្វើឲ្យប្រជាពលរដ្ឋរកស៊ីទទួលទាន ដាំដុះមិនបាន ហើយក្រុមនេះក៏តែងបង្កការគំរាមកំហែងដល់អាជ្ញាធរ និងប្រជាពលរដ្ឋនៅមូលដ្ឋាន តាមរយៈកាំបិត ពូថៅ ច្រូងច្រាង ចុះមកវាស់ដីបែបអនាធិបតេយ្យគ្មានស្ដាប់បង្គាប់សមត្ថកិច្ចឬអាជ្ញាធរណាទេ។

ទាក់ទិនករណីនេះសារព័ត៌មានមិនអាចទំនាក់ទំនងរកការបំភ្លឺពីលោក ហេង សឿន បានទេនៅថ្ងៃទី១ ខែមីនា ឆ្នាំ២០១៩នេះទេ៕

Feature Ads