√ រថយន្តកូរ៉េដឹកទំនិញ ជាន់ហ្វ្រាំងមិនស៊ី ជ្រុលទៅបុករថយន្ត៣គ្រឿង បន្តកន្ទុយគ្នា អស់ជិត៣ពាន់ដុល្លារ ដើម្បីបញ្ចប់រឿង

ភ្នំពេញៈ រថយន្តកូរ៉េដឹកទំនិញ ២តោនកន្លះមួយគ្រឿង បើកលឿនជាន់ហ្វ្រាំងមិនទាន់ ក៏ជ្រុលបុករះរថយន្ត៣គ្រឿង បណ្តាលឲ្យខូចខាតយ៉ាងដំណំ រថយន្តទី១ ម៉ាក LEXUS RX300 ទី២ម៉ាក Mazda និងទី៣ម៉ាកកូរ៉េខូចខាតតិចតួច សុំមិនទាមទារសំណង បើកចេញទៅបាត់។

គ្រោះថ្នាក់ចរាចរណ៍នេះមិនបណ្ដាលឲ្យមានអ្នករងរបួសធ្ងន់នោះទេ កើតឡើងកាលពីវេលាម៉ោង៨៖៥០នាទីព្រឹក ថ្ងៃអង្គារ ទី២៦ ខែមីនា ឆ្នាំ២០១៩ នៅចំណុចផ្លូវជាតិលេខ២ ស្ថិតនៅក្នុងភូមិទួលរកា១ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។

បើតាមសម្ដីបុរសបើកបររថយន្តបង្កឈ្មោះ ផាត រិទ្ធី ភេទប្រុស អាយុ២៦ឆ្នាំ មុខរបរបើកបរ ស្នាក់នៅភូមិព្រែកថី ឃុំរកាខ្ពស់ ស្រុកស្អាង ខេត្តកណ្ដាល បានរៀបរាប់ប្រាប់ថា មុនកើតហេតុ គាត់ បើករថយន្តដឹកទំនិញបង្កហេតុ ម៉ាកហ៊ីយ៉ាន់ដាយ ពណ៌ស ពាក់ស្លាកលេខ 3D-9469 ពីតាខ្មៅមកចាក់អង្រែក្រោម តាមផ្លូវជាតិលេខ២ ទិសដៅពីត្បូងទៅជើង លុះមកដល់ចំណុចខាងលើ ក៏មានរថយន្តជាច្រើនគ្រឿង កំពុងបើកយឺតៗបន្តកន្ទុយគ្នា ដោយសារខាងមុខមានការដ្ឋានជួសជុលផ្លូវ ហើយរូបគេបានជាន់ហ្វ្រាំង ដើម្បីបន្ថយល្បឿន តែហ្វ្រាំងជាន់២ទៅ៣ជើងហើយ នៅតែមិនស៊ី ទើបគាត់កាច់ចង្កូតទៅបុករថយន្ត LEXUS RX300 RX300 ពណ៌ប្រផេះ ពាក់ស្លាកលេខភ្នំពេញ ២AD-2450 ពីក្រោយ ហើយរុញរថយន្ត LEXUS RX300 នោះបន្តទៅបុករថយន្ត Mazda ពណ៌ក្រហម ពាក់ស្លាក់លេខភ្នំពេញ 2AD-3622 ហើយរុញទៅបុករថយន្តកូរ៉េ១គ្រឿងទៀត កណ្ដាលផ្លូវតែម្ដង បណ្ដាលឲ្យខូចខាតខាងមុខខាងក្រោយយ៉ាងដំណំ តែដោយសារតែមិនមានអ្នករងរបួស សមត្ថកិច្ចប៉ុស្តិ៍ និងសមត្ថកិច្ចផ្នែកវាស់វែងខណ្ឌមានជ័យ បានចុះមកបាញ់គំនូស រួចមកវាស់វែង និងរថយន្តមកដាក់អែបនៅចិញ្ចើមផ្លូវ។

សមត្ថកិច្ចផ្នែកវាស់វែងខណ្ឌមានជ័យ បានអោយដឹងថា គ្រោះថ្នាក់ចរាចរណ៍ខាងលើនេះ តាមការអាះអាងពីបុរសអ្នកបើកបររថយន្តកូរ៉េ២តោនកន្លះ បានបញ្ជាក់ថា មូលហេតុមកពីរថយន្តរបស់គាត់ កំពុងបើកសុខៗ ស្រាប់តែជាន់ហ្វ្រាំងមិនស៊ី ទើបជ្រុលបុករថយន្តបន្តដល់ទៅ៣គ្រឿងបន្តគ្នា តែរថយន្តកូរ៉េមួយគ្រឿងទៀត ខូចខាតតិចតួច សុំមិនទាមទារសំណងទេ ក៏បើកចេញទៅបាត់ នៅសល់២គ្រឿង ហើយជៀសវៀង កំពុងអោយមានការកកស្ទះចរាចរណ៍ ហើយណាមួយគ្មានអ្នករបួស សមត្ថកិច្ចក៏បាញ់គំនូស រួចអោយរថយន្តទាំងអស់ បើកមកដាក់នៅអែបចិញ្ចើមផ្លូវ ដើម្បីដោះស្រាយគ្នា។

ក្រោយកើតហេតុបុរសម្នាក់ជាតំណាងភាគីរថយន្តបង្កហេតុ បានចេញមកដោះស្រាយដល់រថយន្តម៉ាស្តាចំនួន១,៤០០ដុល្លារ និងរថយន្តឡិចស៊ីស ១៥០០ដុល្លារ ដើម្បីបញ្ចប់រឿងនៅកន្លែងកើតហេតុ។

សមត្ថកិច្ចក៏បានណែនាំដល់ភាគីខាងតំណាងរថយន្ត សូមមេត្តាឧស្សាហ៍ឆែកមើលគ្រឿងក្រោមរថយន្តឲ្យបានញឹកញាប់ផង នេះសំណាងហើយ បុកនៅចំណុចជិតទីប្រជុំ តែបើសិនបើកទៅមុខ១០០ម៉ែត្រទៀត នៅមុខសាលារៀនច្បាស់ជាគ្រោះថ្នាក់ធំជាងនេះមិនខាន ជាពិសេសទីប្រជុំជនតែម្ដងការពារគ្រោះថ្នាក់យថាហេតុ ៕