√ អាជ្ញាធររាជធានី ចុះបិទហាងស្រាមួយកន្លែងឈ្មោះ KARA PUB ដោយសារមានបណ្ដឹងពីប្រជាពលរដ្ឋ រឿងបង្កសំឡេងរំខាន

ភ្នំពេញៈ ក្រុមការងារដឹកនាំដោយលោក មាន ចាន់យ៉ាដា អភិបាលរងរាជធានីភ្នំពេញ ដែលមានការចូលរួមដោយលោក ព្រុំ សំខាន់ អភិបាលរងខណ្ឌចំការមន លោកស្រី គឹម សុវណ្ណ ប្រធានមន្ទីរទេសចរណ៍រាជធានីភ្នំពេញ លោក ហេង ទេពហ៊ ប្រធានការិយាល័យទេសចរណ៍ខណ្ឌចំការមន លោក សំរិទ្ធ សាមឿន ចៅសង្កាត់រងបឹងកេងកងទី១ លោក ហ៊ុយ គឹមលី ប្រធានការិយាល័យមន្ទីរបរិស្ថានរាជធានីភ្នំពេញ បានចុះធ្វើការបិទអាជីវកម្មឈ្មោះ KARA PUB (ក្រោយវត្តលង្កា) មូលហេតុដោយសារមានបណ្ដឹងពីប្រជាពលរដ្ឋអំពីការបង្កសំឡេងរំខានធ្ងន់ធ្ងរ។

ការចុះបិទអាជីវកម្មហាងស្រា KARA PUB ធ្វើឡើងនៅវេលាម៉ោង៩៖១២នាទីយប់ ថ្ងៃអាទិត្យ ទី៣ ខែមីនា ឆ្នាំ២០១៩នេះ ផ្ទះលេខ១៣ ផ្លូវ៥១ (ក្រោយវត្តលង្កា) ស្ថិតក្នុងសង្កាត់បឹងកេងកងទី១ ខណ្ឌចំការមន រាជធានីភ្នំពេញ។

សូមបញ្ជាក់ថា ដោយអាជីវកម្មខាងលើធ្លាប់បានទទួលការណែនាំពីអាជ្ញាធរមូលដ្ឋាន យោងតាមកំណត់ហេតុ ចុះថ្ងៃទី១៩ ខែកុម្ភៈ ឆ្នាំ២០១៩ រហូតដល់ថ្ងៃទី២ ខែកុម្ភៈ ឆ្នាំ២០១៩នេះ អាជីវកម្មខាងលើនៅតែបង្កសំលេងរំខានដល់អ្នកជិតខាងទៀត ដូច្នេះក្រុមការងារបានសម្រេចបិទដំណើរការអាជីវកម្មខាងលើជាផ្លូវការតែម្ដង ចាប់ពីថ្ងៃធ្វើកំណត់ហេតុនេះតទៅ ដោយម្ចាស់អាជីវកម្មទទួលអនុវត្តតាមសំណើដោយមិនមានការជំទាស់អ្វីឡើយ បើមានការអនុវត្តខុសពីការណែនាំ ម្ចាស់អាជីវកម្មសូមទទួលខុសត្រូវចំពោះមុខច្បាប់៕