ភ្នំពេញៈ ក្រោយឃាត់ខ្លួនតាមដីកាបញ្ជាឲ្យចូលខ្លួន នៅវេលាម៉ោង២៖២០នាទីរសៀលថ្ងៃទី ២ ខែមេសា ឆ្នាំ២០១៩នេះ លោក ផែង វណ្ណៈ អ្នកលេងហ្វេសប៊ុកដ៏ល្បីមួយរូប ត្រូវបានសមត្ថកិច្ចបញ្ជូនមកដល់សាលាដំបូងរាជធានីភ្នំពេញហើយ ដើម្បីប្រគល់អោយអយ្យការអមសាលាដំបូងធ្វើការសាកសួរ។
សូមបញ្ជាក់ថា លោក ផែង វណ្ណៈ ត្រូវកម្លាំងអាវុធហត្ថលើផ្ទៃប្រទេស ឃាត់ខ្លួន នាព្រឹកថ្ងៃទី២ ខែមេសា ឆ្នាំ២០១៩ តាមបញ្ជាតុលាការ រួចបញ្ជូនទៅបញ្ជាការដ្ឋានកងរាជអាវុធហត្ថលើផ្ទៃប្រទេស ដើម្បីសាកសួរ។
មន្ត្រីអាវុធហត្ថ បានឲ្យដឹងថា ការចាប់ខ្លួន លោក ផែង វណ្ណៈ អ្នកលេងហ្វេសប៊ុកដ៏ល្បីឈ្មោះ និងជាមន្ត្រីសមត្ថកិច្ចផងនោះ គឺអនុវត្តតាមដីកាបញ្ជាឲ្យចូលខ្លួនរបស់លោក អ៊ុ សុភក្តិ ព្រះរាជ អាជ្ញារងអមសាលាដំបូងរាជធានីភ្នំពេញ និងយោងតាមពាក្យបណ្តឹងរបស់លោក គី តិច មេធាវីតំណាងនាយករដ្ឋមន្រ្តី។
យោងតាមដីកាព្រះរាជអាជ្ញារងអមសាលាដំបូងរាជធានីភ្នំពេញលោក អ៊ុ សុភក្តិ ចេញកាលពីថ្ងៃទី១ ខែមេសា ឆ្នាំ២០១៩ បញ្ជាឲ្យលោក ផែង វណ្ណៈ ត្រូវចូលខ្លួននៅអយ្យការអមសាលាដំបូងរាជធានីភ្នំពេញ ឲ្យបានមុនថ្ងៃទី៣០ ខែមេសា ឆ្នាំ២០១៩ ដើម្បីសាកសួរ ពាក់ព័ន្ធករណី ញុះញង់ឱ្យប្រព្រឹត្តបទជាអាទិ៍ និងបរិហារកេរ្តិ៍ជាសាធារណៈ៕
ផ្ដល់សិទ្ធិដោយ៖ campost.news