ក្រចេះ៖ រថយន្ដជនជាតិចិន បើកបុករថយន្ដកែច្នៃដឹកឈើពីក្រោយ បណ្ដាលឲ្យមនុស្សម្នាក់ស្លាប់ នៅកន្លែងកើតហេតុ។ គ្រោះថ្នាក់ចរាចរណ៍នេះ កើតឡើងនៅវេលាទៀបភ្លឺថ្ងៃទី១ ខែមេសា ឆ្នាំ២០១៩ នៅលើផ្លូវជាតិ៧ ស្ថិតនៅឃុំអូរគ្រៀង ស្រុកសំបូរ ខេត្តក្រចេះ។
ប្រជាពលរដ្ឋបានឲ្យដឹងថា រថយន្ដជនជាតិចិនជិះគ្នា២នាក់ បានបើកបុកជាមួយរថយន្ដកែច្នៃដឹកឈើពីក្រោយ បណ្ដាលឲ្យនារីជនជាតិចិនម្នាក់ ស្លាប់ភ្លាមៗនៅកន្លែងកើតហេតុ។
ពលរដ្ឋបន្តទៀតថា ករណីគ្រោះចរាចរណ៍នេះក្នុងទិសដៅស្របគ្នា គឺពីជើងទៅត្បូងដល់ចំណុចខាងលើ រថយន្ដជនជាតិនោះបានបុករថយន្ដច្នៃតែម្ដង ប្រហែលជាវ៉ាក់អើ ជាន់ហ្វាំងមិនទាន់ ។ ក្រោយមក កម្លាំងនគរបាល និងអាវុធហត្ថ ស្នាក់ការសន្តិសុខ៧១០បានចុះទៅដល់កន្លែងកើតហេតុ។
លោក ប៊ុន ឈឿន អធិការនគរបាលស្រុកសំបូរ បានឲ្យដឹងថា បន្ទាប់ពីកើតហេតុ លោកបានបញ្ជាឲ្យនគរបាលជំនាញចុះទៅកន្លែងកើតហេតុ ចំណែកសាកសពជនជាតិចិននោះ បើតាមនគរបាលប៉ុស្តិ៍អូរគ្រៀងរាយការណ៍មកលោកថា គឺជនជាតិចិនម្នាក់ទៀត បានជួលរថយន្ដឯកជនដឹកទៅភ្នំពេញ ។ ដោយឡែករថយន្ដទាំងពីរគ្រឿង នគរបាលជំនាញ ចុះធ្វើវាស់វែងរួច ត្រូវបានយកទៅរក្សាទុកនៅអធិការដ្ឋាននគរបាលស្រុកសំបូរ រង់ចាំដោះធ្វើការស្រាយ៕
